8
1 Bawipaw nynh a hopaw tuh: Tuin ccyh vae tuh Judah siapharan hae ru, Judah bawi hae ru, ranpibawi hae ru, profeh hae ru te Jerusalem um hae paw ru kha mih shaw lungkhu te law athua cih;
2 minmin nynh a la ry hae paw te rya a la lawpya hae paw, a la zui hae paw, a la ccung hae paw te a la beik hae paw khuanin, sawpaw te vaaw bawi hae malang khe pazaesaku athua cih hae; khah-e hae kha suelua thua lan khyh zah uu thua lan khyh hae; lae vawlan khe ia hawte athua cih hae.
3 Ahoy leipaw e minphuin kya-e ahiinhy hae paw balyn nynh ka deenaw hae hmin miakaw kyakhe hiinnaw laeze chinaw kha a ryhua cih hae, cite vaaw Bawipaw nynh a ci.
Seinaw te Byapianaw
4 Nang nynh minmin kya na hopya lan hae paw tuh, Bawipaw nynh hynhte a ho:
Ccungccaw tuh he a khuliaku vae ze,
bua thokuh khyh tou?
A cciasei ze, kithui khyh tou?
5 Pawccemou e ccungccaw hae nynh
ka kyate maeleihkuh hae zah,
kithui leite a um zungzae hae?
Hynbya kha ccavyng kyngkuh hae zah,
kithui lan a mya vae hae.
6 Pekite ka ngaepya hae zemah,
asasite byaho khyh hae;
“Pawmou ka cyisei!” cite ho hae zah
humhung nynh mah
a hoyleinaw kha ngaesikuh khyh.
Rhawtuknaw lang
a ccue cciamangpaw marang hawte,
mih balyn mawte
mih laanpi raveih langkhe
a maekuh hae.
7 Vaawlui kya azouthyapaw
kaepaw-pavaw nynh heize
amaw ccyh kha a nyku;
vahu, ccipae te ccusae-pavaw nynh mah
mih ki ccyh kha a nyku hae;
thuasalama ka ccungccaw hae nynh tuh
Bawipaw phungzae kha nyh khyh hae.
8 “Aening tuh ah haw oh zah,
Bawipaw kawbya tuh
aening kya a um,” cite
pawtemou na ho kho oh?
Ccawzeitu hae kya-e ahynpaw bawpe nynh
hynbya kha a rae.
9 Mihaw hae kha maethyalaw
athua cih hae, a siikuh cih hae zah
kaang a kae cih hae;
Bawipaw bya kha he a ei hae te,
minmin kya pawcihawpaw
hawnaw mou a um?
10 Tukeiccuze mih zu hae kha
ming hae kalan ka pya cih hae zah,
mih loo kha taetu hae kalan
ka pya cih hae,
pawccecize adih huapaw kyate
ale huapaw kyacia
mih balyn mawte ahme leite
mue lan a karankuh hae;
profeh kyate ranpibawi kyacia
mih balyn mawte a hyn a hu hae.Ref 8.10-12: Jer 6.12-15
11 Daenaw a um vae khyh ze,
“Daenaw, daenaw,” cite ho hae zah,
ka ccungccaw hae vaemaw kha
oihsah khyh hae.Ref 8.11: Eze 13.10
12 Maethya lan umpaw kha cyih hae zah,
anungsikuhpaw rya kha a law hae;
tuhzemah mih maethah khyh,
maethya mah nyh khyh hae.
Tukeiccuze a khuliakuh hae paw kyakhe
a khuliakuh bua cih hae;
minmin kha de he ka tah hae te,
vua athua cih hae,
13 Minmin kha suelua ka ry hae,
thuasalama misu ku kya
misu thae um khyh,
thaeku ku kya thaeku thae um khyh,
anaw heize anaan,
minmin ka pya hae paw kha
minmin kyate phe azo vae.
14 Pawccemou phang ah haung oh?
Sueluakuh oh sih, akoihkhawkuhpaw
khuapi hae kalan cceih oh sih lah,
tuin kya chih oh sih;
Bawipaw tungvaw
ah sei oh keiccuze,
Bawipaw ah Pachia nynh
ro khylan oun vua vae,
chi sii thungkuhpaw tui kha
nia lan oun pya vae.
15 Ngaengannaw kha ah ngaehoi oh zemah
hoynaw ah mue khyh oh,
dannaw ccyh kha ah ngaehoi oh zemah
16 Mih marang hae naduh kya-e
accaepaw roi tuh
Dan ram kyate phe thaekuh;
mih marangtepaw hae nynh
a siarua hae paw roi keiccuze
ram pynpi tuh ahy.
Minmin nynh oun thua hae zah
ram te ram kya umpaw balyn kha thuasah,
khuapi te khuaccaaw hae kha
thuasah pong a ae hae.
17 Dotua, zingsah kho athua leipaw
huparepaw hae kha
nae kalan kae sawnua cih oh zah,
ae khyh cih oh, cite
Ccungccaw hae hanlan Profeh A Rah
18 Ka lungpawnaw phe zo,
ngaethyanaw nynh yn thuanua,
lungrote ka um.
19 Asawnaw ram um hae paw
ka ccungccaw ryachi hae
siaruanaw kha ngaetua oh:
“Bawipaw tuh Zion kya
um vae khyh tou?
A Siapharan tuh amaw kya
um vae khyh tou?” cite a sia hae.
(“Pawccemou mih zohtuh hae,
ramccang zohtuh hae khate
ka thin yn riasah hae?”)
20 “Loohrue ccyh athang vae,
hawnin ccyh mah alia vae,
aening tuh khum ah thua
lae khyh oh,” a ci hae.
21 Ka ccungccaw ryachi hae tuh
vaemaw a mue hae keiccuze
kae mah vaemaw ka mue,
rawkhuite ka um zah,
thinphangnaw te phe ka beih.
22 Gileadnote8.22 Gilead tuh Jordan vaw nithua lang a umpaw ram thua zah, thingku hae tuh isei lang rae lan a minthaan. ram kya dannawpaw
isei um khyh tou?
Tuin ram kya sibawi so um khyh tou?
Pawccemou ka ccungccaw
ryachi hae hynh a dan khyh hae?