50
Babilon kha Byapianaw
1 Babilon khuapi, Khaldi hae ram konglangte Bawipaw nynh profeh Jeremiah a hopyapaw tuh:Ref 50.1—51.64: Isa 13.1—14.23, 47.1-15
2 Minphuin hae kha thaesah oh,
thuruh leite alan kha sae oh lah
thaesah oh, hynhte ho oh:
Babilon khuapi tuh law athua vae,
Bel pachia tuh maethyanaw a mue vae,
Marduk pachia tuh a lungroh vae.
Babilon a zohtuh hae tuh
maethyanaw mue hae zah,
mih lungroh vae.
3 Pawccecize palung lang e minphuin phuin kheit nynh Babilon kha yn ccianua vae, ccungccaw lu kheit san a um lei lan ciate ccungccaw phe a daesah cih; ccungccaw te sarangpaw hae tuh pong a ccue cih hae.
4 Bawipaw nynh a hopaw tuh: Tuin nin vae tuh Israel hae te Judah hae tuh pynkheihlan a cceih cih hae zah, Bawipaw mih Pachia kha rawkhuite a ccung cih hae.
5 Zion langkhe mih mitmae hawite, Zion lang cceihpaw laanpi kha a khia cih hae, te ning kho a um vae cih leipaw, zungzae tynpaw byakinnaw khate Bawipaw kalan a cceih cih hae zah a tungkuh vae cih hae.
6 Ka ccungccaw hae tuh azopaw tuu hae nynh thua vae hae; mih tuurin hae nynh mua hae vawlan khe a cciakhaesei vae hae; mua muakheit kyate muakheit kalan cceih hae zah, mih tuukhia kha a ning vae hae.
7 A muihpaw balyn nynh minmin kha a ae cih hae zah, mih rhaw hae nynh, “Aening tuh ah sei khyh oh, pawccecize a paeenaw hae ahmepaw ramno athuapaw te mih paaw hae nynh a doliakuh hae paw Bawipaw tungvaw khe minmin nynh a sei hae keiccu nynh thua,” cite a hoku vae hae.
8 Babilon kyate ccue oh, Khaldi hae ram kyate pou oh lah, miaa phu a cciakhaepaw miaatepaw hae hawte thua oh.Ref 50.8: Bya 18.4
9 Pawccecize thahlang e minphuin le hae paw aphu kha ka tuhou cih zah, Babilon lang ka cciakhae cih hae; Babilon kha paccynnuakute a tuk cih hae zah a lah cih hae. Mih the tuh kuih ccakaete a kihan leipaw, thekawthyapaw rhawkawpaw the hawte athua cih.
10 Khaldi ram tuh luadepaw lang a tang cih zah, luadetu hae tuh phe a byn cih hae, cite Bawipaw nynh a ci.
11 Pou ka rho ccungccaw hae kha
a rohtu hae, nanning tuh
lungtua lungpawte na um oh zemah,
lonua vawlan sakalialaw a leihpaw
vaetua tohlaw hawte
na thua oh zemah,
rangtepaw hawte na sia oh zemah,
12 nae nung tuh maethyanaw a mue cih zah,
nanning ae saahnung oh tuh
thethya a ccou cih.
Babilon tuh ram hae kyaze
anyaa huaccepaw, ramkaw, ramrou te
laesia ram lang a tang cih.
13 Bawipaw thinrianaw keiccuze
ccungccaw um leite,
ccungccaw phe adaepaw ram athua cih.
Babilon pe po a cceihpaw
miakaw tuh a siikuh cih hae zah,
a vaemaw keiccuze
saryanaw roi a sawnua cih hae.
14 The te li a ccyngkuh hae paw balyn,
Babilon kha koihlute
rhawtuk lan paccynnuakuh oh;
nae the kha nungban leite kaw oh,
pawccecize aning nynh
Bawipaw tungvaw phe a sei vae.
15 Teitei lang balyn te Babilon kha,
“Aning tuh a shung vae;
a rhaw thungkhawnawpaw tuh
a khuliakuh vae,
a khualungrua tuh
ating vae,” cite sianua oh.
Pawccecize hynh-e hynh
Bawipaw liarunaw nynh thua:
a tungvaw liaru oh,
aning nynh a la cyi hawte
a tungvaw cyihru oh.
16 Babilon ram kya ccacii a tupaw te
loohrue ccyh lya rungkou te
looh a ruepaw kha theih oh;
ccungccaw rohtupaw
thaloi keiccuze mih balynte
mih ccungccaw hae kalan
a ki cih hae zah,
mimaw ram lang khaleih
17 Israel tuh chindeih hae nynh sawde te a dee hae paw tuu hae hawte nynh thua. Assiria siapharan nynh masaty ae hae zah, atu athangnaw kya Babilon Siapharan Nebukhadnezzar nynh a ru kha a ree.
18 Tukeiccuze, Israel Pachia, vaaw Bawipaw nynh hynhte a ho: Assiria siapharan kha de ka tah hawte, Babilon siapharan te a ram kha de ka tah cih.
19 Israel kha a paeenaw hmin lang ka kikhae cih zah, Karmel mua te Bashan mua vawlan khe ram a paeekuh cih, Efraim sangpyng hae te Gilead mua vawlan khe phe byn lan a ae cih hae.
20 Tuin nin te tuin ccyh khe, Israel a hoyleinaw kha ccung athua cih zah muih thua lan khyh; Judah seinaw kha muih thua lan khyh; pawccecize ka haang vae hae paw, a laehy hae paw seinaw kha ka ngaethya cih hae, cite Bawipaw nynh a ci.
21 Merathaim ram kha rawsete
ccianua thung oh,
Pekod ram kya um hae paw kha tuk oh,
minmin kha phe thang lan khaleih roh oh,
nanning kaw kae pya
oh paw balyn kha cyih oh,
22 Tuin ram kya rhawtuknaw roi te
myarya lepaw ronaw roi kha accae!
23 Laephi pynpi a tudepaw khynlyng tuh
bae thua zah phe khya vae!
Babilon tuh minphuin hae laku kya
ri lan umpaw lang a tang vae!
24 Pou Babilon, namaw toulou kha
kaang na syakhawkuh zah na kae vae,
thuasalama tuh-e tuh na nyh khyh;
Bawipaw kha na rawse ngan keiccuze
nang kha ae muih hae zah ae kyng vae hae.
25 Bawipaw nynh a zunghe inn kha hung zah,
a thinrianaw zunghe hae kha
a toikhaekuh vae,
pawccecize vaaw Bawipaw PACHIA nynh
Khaldi ram kya cyi lan a hoipaw rya nynh thua.
26 Teitei langte balyn yn ccianua oh lah,
a ccung-inn hae kha hung oh;
looh apumkuhpaw hawte pum oh lah,
khaleih roh oh;
paw sanmah alaepaw um nan sah.
27 A tangnua hae balyn kha theih oh,
sawchianaw kalan marya cciasah bung oh.
Minmin hanlan ngaethya lan kou um, mih ccyh,
minmin detahnaw nin tuh a thua vae!
28 Ngaetua oh! Bawipaw ah Pachia phulawnaw, a beikinn a ropya hae keiccuze phulawnaw kong kha Zion kya siakhae khylan, Babilon ram kyate ccue hae zah a lue hae paw roi tuh accae.
29 Babilon dou khylan thekawthya hae paw balyn kha pum oh. Babilon kha po voilu lan ryahmin tahnuakuh oh, lu kheit san lue nan sah. A cyisahnaw thyhte amaw kha liaru oh; a cyi hawte a tungvaw cyihru oh, pawccecize Israel Pachia Athyaapaw, Bawipaw kha pawlangria leite a dou vae.Ref 50.29: Bya 18.6
30 Tukeiccuze a ccangvae hae tuh khualae e laanpi hae kya a khuliakuh cih hae zah, tuin nin khe a rhawkaw hae balyn tuh ro athua cih hae, cite Bawipaw nynh a ci.
31 Vaaw Bawipaw PACHIA nynh a hopaw tuh:
Pou lungkhungpaw,
nang kha kae rawse,
pawccecize nang kha
de kae tah cihnaw ccyh,
na ccyh tuh a thua vae.
32 A lungkhungpaw ccungccaw tuh
a thykuh cih zah a khuliakuh cih,
a thotu lu kheit san um lan khyh,
a khuapi kha maee te ka soi cih zah,
a pepan umpaw atyn-are kha pong a u cih.
33 Vaaw Bawipaw nynh hynhte a ho: Israel hae tuh tuaasahkunaw a teing hae, Judah hae mah tuhcite a teingbua hae; minmin a kyngtu hae balyn nynh minmin kha ccavyng kyng hae zah, cciasah lan phe a mya hae.
34 Thuasalama minmin Shawkhawtu tuh a thung, a min tuh vaaw Bawipaw a cikuh. Aning nynh mih byathan kha a hokhae ccaccing cih hae zah, ram kha a daesah cih, thuasalama Babilon khuaccaaw hae kha tuh sasulalae a nung cih hae.
35 Bawipaw nynh a hopaw tuh:
Khaldi hae, Babilon khuaccaaw hae,
bawi hae te mihaw hae tungvaw
thaloi accah cih!
36 A pawe hae paw tungvaw
thaloi accah cih zah,
mingaee lang a tang cih hae!
Babilon rhawkaw hae tungvaw
thaloi accah cih zah,
minmin tuh aroh cih hae!
37 Babilon marang hae te
a marangle hae tungvaw thuasah,
amaw kya umpaw ramccang
rhawkaw hae balyn tungvaw thuasah
thaloi accah cih zah,
nopi hawte athua cih hae!
Babilon a sisua hae balyn kyakhe
thaloi accah cih zah,
a luade cih hae!
38 Khuaakannaw keiccuze
Babilon tui tuh karae arou cih!
Pawccecize Babilon tuh
zohtuh ram thua zah,
minmin tuh zohtuh hae khate
39 Tukeiccuze loramsaw hae tuh ram-ui hae ryte Babilon kya a umkheih cih hae zah, kalauh pavaw hae mah a um cih hae, Babilon tuh ccungccaw umnaw hmin, she takyh kya ccungccaw umpaw hmin thua boi vae lan khyh.Ref 50.39: Bya 18.2
40 Pachia nynh Sodom, Gomorrah te mih pepan e khua hae kha a ro lya hawte, tuin kya a umtu te khuasahtu lu kheit san um vae lan khyh.Ref 50.40: Gen 19.24-25
41 Dotua, minphuin phuin kheit tuh
palung langte yn cceih cciamang vae;
minphuin athungpaw te
siapharan hae patae tuh laephi adianaw kyate
mih lungtho hae.
42 Minmin tuh li te ccoi kha
a ccyngkuh hae, mih rysawthah zah
thawccinaw hoi khyh hae.
Mih roi tuh rili roi te nynh aloku;
pou ccanung Babilon,
rhawtuk lan a paccynkuhpaw
rhawkawpaw hawte,
minmin nynh marang ccikute
nang kha ae ccianua vae hae.
43 Babilon siapharan nynh
tuh-e kong tuh thae zah,
a kuih a khua phe chih,
lungriathaenaw nynh thuanua zah,
neitangia ccihpaw nopi hawte a teing.
44 Jordan vaw kin thing alungnaw kyate zungzae hinlalyhpaw sarangpaw hae rampaeekunaw hae kalan yn cceihthungpaw chindeih hawte, minmin kha Babilon kyate ccaring ka dee kangmaw cih hae zah, ka popaw kha Babilon kya ka nung cih. Pawccecize kae yn lopaw hummou a um? Hum nynh mou kae kha tungku lan yn ko kho? Ka malang a thadyn nganpaw tuurintu a um tou?
45 Tukeiccuze Bawipaw nynh Babilon tungvaw a paccyn nuapaw te Khaldi ram kha rawsete eenaw a raenuapaw kha thaetua oh: Accaccing lante, tuuphu kya-e a nohua hae paw kha ccaring a sue cih hae; accaccing lante, mih tuukhia kya-e tuu hae nynh a tung hae paw keiccuze a siikuh cih hae.
46 Babilon kyng lya-e roi keiccuze laephi tuh ahy cih; a rawnaw roi tuh minphuin hae nynh a thae cih hae.