43
Izip Ram lang Jeremiah Cciakhaenaw
1 Bawipaw mih Pachia nynh Jeremiah kha ccungccaw balyn kalan hopya lan a sawnuathepaw a bya balyn kha Jeremiah nynh he a hopah kou hae tuh,
2 Hoshaiah ccapaw Azariah, Kareah ccapaw Johanan te a lysakuh hae paw balyn nynh Jeremiah kha, “Hynbya nynh na ho. ‘Izip ram kya um khylan cceih nan oh,’ cite ho khylan Bawipaw kae Pachia nynh nang kha ae saw khyh;
3 Khaldi hae nynh kaening kha chia khylan, tuhkhyhze kyngte Babilon lang cciakhae khylan cite Khaldi hae kuih kalan ap khylan Neriah ccapaw Baruk nynh nang kha ae tuhou,” a cipya hae.
4 Tuhcite Judah ram kya um lan Bawipaw nynh a hopya hae paw bya kha Kareah ccapaw Johanan, rhawbawi hae balyn te ccungccaw balyn nynh ngae khyh hae.
5 A deenaw hae ram takyh kyate Judah ram kya um khylan oun kithui hae paw Judah hae a laehy hae paw balyn kha Kareah ccapaw te rhawbawi hae nynh a cciakhae hae—Ref 43.5-7: 2Si 25.26
6 nopi, pise, imua, siapharan ccanung hae te rhawviatu hae bawipaw Nebuzaradan nynh Shafan ccapaw Ahikam a ccapaw Gedaliah kya a cciataw hae paw miakaw, te profeh Jeremiah te Neriah ccapaw Baruk kha mah a cciakhae hae.
7 Bawipaw bya kha ngae leite Izip ram lang cceih hae zah, Tahpanhes khua a thua hae.
8 Te Bawipaw bya tuh Tahpanhes khua kya Jeremiah kya yn thua zah:
9 Lung alepaw hae kha na kuih te lah lah, Tahpanhes khua kya Faro siapharan inn lang teenaw kya-e anglae phaekuhpaw laanpi khe uutua. Tuhcite na cyipaw tuh Judah hae nynh muih hae sah lah,
10 minmin kyakhe, Israel Pachia, vaaw Bawipaw nynh hynhte a ho: Ka ryalahtu Babilon Siapharan Nebukhadnezzar kha ka kosah cih hae zah, aning nynh a bawitungkhung kha, ka uupaw e lung hae vawlan khe a nung cih, te khah-e hae luki khe a siapharan boeibu kha a dawkhaw cih.
11 Nebukhadnezzar tuh yn thua cih zah, Izip ram kha a roh cih,
shethya te chia lan accan hae paw kha
shethya te a theih cih hae,
kyngte ramccang lang
cciakhae lan accan hae paw kha
a cciakhae cih hae,
thaloi te chia lan accan hae paw kha
thaloi te a theih cih hae.
12 Aning nynh Izip pachia hae beikinn hae kha maee te a soi cih; khah-e hae kha maee te a soi cih hae zah ccaring a cciakhae cih hae; tuurinpaw nynh a boeining kya-e sih kha a law hawte, Izip ram kha a lah cih zah tuin kyate khyndadyh lan a poutaw cih.
13 Izip ram e Heliopolis khua a umpaw lungbing hae kha a khya cih; Izip pachia hae beikinn hae kha maee te a soi cih.