40
Gedaliah kya Jeremiah A Um
1 Rhawviatu hae rhawbawipaw Nebuzaradan nynh Jeremiah kha Ramah kya a luesah koute, Bawipaw bya tuh Jeremiah kya yn thua; kyng hae zah Babilon lang a cciakhae hae paw Judah hae te Jerusalem e hae balyn ryte Jeremiah kha mah sivawrui te khii athuabua.
2 Rhawviatu hae rhawbawipaw Nebuzaradan nynh Jeremiah kha ko zah, “Bawipaw na Pachia nynh e hmin kyahin shethya ka thuasah cih, a la ci;
3 a la ho vae hawte, e shethya hynh nae tungvaw a thua vae; nanning balyn nynh Bawipaw tungvaw na sei oh zah, a bya na ngae khyh oh keiccuze e uccaw hynh nae tungvaw accah vae.
4 Na kuih kya khiikuhpaw sivawrui hynh atunin kae supya vae. Babilon lang ka kya na cciabua ry ze cceihbua lah, hoyte kae do-oih cih; Babilon lang ka kya na cciabua ry khyh ze, cceihbua nan. Dotua, ram pynpi tuh na malang nynh a um; ahoy te akyh cite na tuanaw miakaw lang cciatua.
5 Na umsya lanze, Babilon siapharan nynh Judah ram e khua hae a uktu lang a nungpaw Shafan ccapaw Ahikam a ccapaw Gedaliah kalan kithui lah, na ccungccaw hae laku amaw kya umbua; tuhkhyhze na ccia rynaw lang la cceih,” a cipya. Te rhawviatu hae rhawbawipaw nynh looh te lasung pya zah a cciasah vae.
6 Tetuh Jeremiah tuh Mizpah khua umpaw Ahikam ccapaw Gedaliah kalan cceih zah, tuh-e ram kya a cciataw hae paw ccungccaw hae laku khe Gedaliah kya a umbua.
7 Babilon siapharan nynh Ahikam ccapaw Gedaliah kha ram uktu lang nung zah, kyng hae zah Babilon lang a cciakhae lei hae paw nopi, pise, imua hae, ram lungkhu e mih ryachihua hae paw kha amaw kuih kya a ap hae cipaw tuh, ramkaw umpaw rhawtho hae paw a cciakhaetu hae balyn te mih rhawkaw hae nynh he a thae hae te,Ref 40.7-9: 2Si 25.22-24
8 Nethaniah ccapaw Ishmael, Kareah ccapaw Johanan, Tanhumeth ccapaw Seraiah, Netofah minphuinpaw Efai ccapaw hae te Maakah minphuinpaw Jazaniah tuh mih rhawkaw hae ryte Mizpah khua umpaw Gedaliah kalan a cceih hae.
9 Shafan ccapaw Ahikam a ccapaw Gedaliah nynh minmin te mih rhawkaw hae kyakhe, “Khaldi hae ryalaw lanpaw kha rih nan oh. Ram lungkhu um oh lah, Babilon siapharan rya kha lawpah oh, tetuh naemaw hanlan ahoy cih.
10 Kae tuh aening kalan oun thua hae paw Khaldi hae malang khe nanning hanlan locceihtu lang um khylan Mizpah khua kya ka um cih; thuasalama nanning tuh misutui, hawnin e thingthae te chitui kha suelua oh lah, nae ang lungkhu khe ccakhungkuh oh, te na law vae oh paw khua hae kyakhe um oh,” cite bya a kinpyaku hae.
11 Tuhawte, Babilon siapharan nynh Judah ram khe a laehypaw ccungccaw hae kha cciataw hae zah, Shafan ccapaw Ahikam a ccapaw Gedaliah tuh minmin uktu lang a nung cipaw kha Moab ram, Ammon ram, Edom ram te ccangpaw ram hae kya a umpaw Judah hae balyn nynh he a thae hae te,
12 phiariphiarae a umnaw hae hmin balyn kyate ki hae zah, Judah ram, Mizpah khua umpaw Gedaliah kalan a thua hae; te misutui te hawnin thingthae kha patae a ccakhungku hae.
Gedaliah kha Chianaw
(2Si 25.25-26)
13 Kareah ccapaw Johanan te ramkaw a umpaw rhawtho hae paw cciakhaetu hae balyn nynh Mizpah umpaw Gedaliah kalan cceih hae zah,
14 Gedaliah kha, “Ammon hae siapharan Baalis nynh Nethaniah ccapaw Ishmael kha nang chia khylan yn sawpaw kha na nyh tou?” cite a khia hae. Thuasalama Ahikam ccapaw Gedaliah nynh minmin kha zyn khyh hae.
15 Kareah ccapaw Johanan nynh Mizpah umpaw Gedaliah kha, “Beih ka la cceih sah lah, Nethaniah ccapaw Ishmael kha kae theih sah, humhung nynh mah nyh lan khyh. Na pepan a sueluakuh hae paw Judah hae balyn kha phiariphiarae nung khylan te a laehypaw Judah hae kha ro khylan, pawccemou aning nynh nang kha ae chia lanpaw tuh?” cite aruh lante a hopya.
16 Thuasalama Ahikam ccapaw Gedaliah nynh Kareah ccapaw Johanan kha, “Tuhte cyih nan, pawccecize Ishmael kong na hopaw tuh hynbya nynh thua,” a cipya.