34
Zedekiah Chinaw Hodaenaw
1 Babilon Siapharan Nebukhadnezzar te a rhawkaw hae balyn, a uknaw zakaw umpaw laephi peenaw hae te ccungccaw balyn nynh Jerusalem te a khuapi hae kha rhaw a tuk lya hae ze, Bawipaw bya tuh Jeremiah kya yn thua zah:Ref 34.1: 2Si 25.1-11; 2Sh 36.17-21
2 “Bawipaw , Israel Pachia nynh hynhte a ho: Judah Siapharan Zedekiah kalan cceih lah, hynhte hopah: Bawipaw nynh hynhte a ho: E khuapi hynh Babilon siapharan kuih kalan ka pya cih zah, aning nynh maee te a soi cih.
3 Te namaw hynh mah a kuih kyate na lue lan khyh, ae kyng cih hae zah a kuih kalan ae ap cih hae; Babilon siapharan te na tungkuh cih oh zah, mitmae hawiliakute bya na hokuh cih oh; te Babilon lang na cceih cih.
4 Tuhzemah, pou Judah Siapharan Zedekiah, Bawipaw bya hynh ngaetua! Namaw konglang Bawipaw nynh hynhte a ho: Thaloi te na chih lan khyh;
5 daebabi lante na chih cih. Nang na mawze siapharan lang atangpaw na minpaaw hae hanlan mynkhuhpaw upya athua hae hawte, na hanlan mynkhuhpaw kha ae upah cih hae zah, ‘Ezou, bawipaw!’ cite ae rawhui cih hae; e bya hynh phe ka ho vae, cite Bawipaw nynh a ci,” cite a ho.
6 Profeh Jeremiah nynh Judah siapharan Zedekiah kha Jerusalem khe e bya balyn hynh marya a hopya,
7 tuh lya ccyh tuh Babilon siapharan a rhawkaw hae nynh Jerusalem kha thuasah, Judah ram kyaze a laehypaw Lakhish khua te Azekah khua kha thuasah rhaw a tuk lya hae nynh thua; e khua khuaning rou nynh Judah ram kyaze khualungrua te koihkhawpaw, a laehypaw khua athua hae.
See hae tungvaw Lungzi leinaw
8-9 Judah ccungccaw nynh ccangpaw Judah ccungccaw kha see lang a mang vae khyh nawlan, ccungccaw balyn nynh Hebru ccungccaw mih see hae nopi pise kha luesah lan cite see luesahnaw kaw byakinnaw kha Zedekiah Siapharan nynh Jerusalem khuaccaaw hae balyn ryte a rae koute, Bawipaw bya tuh Jeremiah kya yn thua.
10 Te mih see hae nopi pise kha luesah lan cikuhpaw byakinnaw kha mih nawccahpaw bawi hae balyn te ccungccaw balyn nynh zui hae zah, seetangnaw kha bua a um khyh nawlan mih see hae kha a luesah hae.
11 Thuasalama nyalangte mih lungpaleihkuh zah a saw vae hae paw seenung seepaw hae kha kothui hae zah, see lang bua a mang hae.
12 Tukeiccuze Bawipaw bya tuh Jeremiah kalan Bawipaw kyate yn thua zah,
13 Bawipaw , Israel Pachia nynh hynhte a ho: Nae minpaaw hae kha seetangnaw ram, Izip ram kyate he ka poukhae hae tuh, kamaw ccaccei nynh minmin ryte byakinnaw ka rae zah,
14 “Nae kalan zua hae zah kum taruh lungkhu rya ae lawpah vae oh paw Hebru ccungccaw miakaw kha nanning balyn nynh kum sarinaw takyh kya na luesah hahe cih oh; nae ryalawpyanaw kyate na luesah hahe cih oh,” ka cipya hae. Thuasalama nae minpaaw hae nynh ka bya ngae khyh hae, mih nakaring mah tuakuh khyh hae.Ref 34.14: Exo 21.2; Deu 15.12
15 Nanning nynh aro mawze na ngaesikuh oh zah, lu kheit te lu kheit see luesahnaw kaw thote ka malang khe ahmepaw kha na rae oh, ka min te ko athuapaw beikinn khe byakinnaw kha ka malang na rae oh;
16 thuasalama nae lungpaleihkuh thui zah ka min na thusah oh, mimaw rynaw thyhte na luesah vae oh paw seenung seepaw hae kha na kothui oh zah, nae see lang bua na mang oh.
17 Tukeiccuze, Bawipaw nynh hynhte a ho: Ka bya na ngae khyh oh, nae innpaw hae te nae ban hae kha luenaw na pya khyh oh; Bawipaw nynh a hopaw tuh: Kae nynh luenaw kae pya lan oh paw tuh thaloi rhaw, shethya te ccakanccinaw athua cih. Laephi vaw e peenaw balyn hanlan ri lan umpaw lang kae rae cih oh.
18 Ka byakinnaw a roh hae paw te ka malang a raeku hae paw byakinnaw kha a zui lei hae paw, vaetuataw kha ccangning lang thoh bua hae zah alaku kya po a ccianaw hae paw tuh-e vaetua taraw hawte ka rae cih hae paw:
19 Judah ram e bawi hae, Jerusalem e bawi hae, siapharan inn e bawi hae, ranpibawi hae te ccangning lang thoh buapaw vaetuataw saw hae laku a cceihpaw ram kya-e ccungccaw hae balyn tuh
20 mih rhaw hae te minmin chia a ry hae paw kuih kalan pya athua cih hae. Mih rhua tuh vaawlang e pavaw hae te laephi vaw e loramsaw hae hanlan looh lang a tang cih.
21 Te Judah Siapharan Zedekiah te a kuihkaw e bawi hae tuh mih rhaw hae te minmin chia a ry hae paw, nanning kha dou leite zya a um hae paw Babilon siapharan a rhawkaw hae kalan ka ap cih hae.
22 Minmin kha kaw ka pya cih hae zah, e khuapi kalan ka thuasah cih hae; a tuk cih hae zah a lah cih hae, te maee te a soi cih hae. Judah ram e khua hae kha ccungccaw um leipaw daetedaepaw lang ka rae cih, cite Bawipaw nynh a ci.