JEREMIAH
Jeremiah
Profeh Jeremiah tuh BC za sari athang dyn te za taruh athotakawnaw loukaw kya a la umpaw thua zah, khaw cia rya a law lungkhu kya Pachia ccungccaw hae kya-e zohtuh beiknaw te mih seinaw keiccuze minphuin tungvaw a thua cih paw vawsawnaw kong kha raeringnaw a pya hae. A la hodaepaw kha amaw a muihnaw kya mawkhe ccing zah, Babilon siapharan Nebukhadnezzar nynh Jerusalem te Beikinn kha roh zah Judah siapharan te a ccungccaw hae patae kha kyngte Babilon lang a cciakhae hae. Te Judah hae a kithui lan hae paw te minphuin phuin kheit bua athua nawlan hae paw kong kha mah a hodae.
Jeremiah ccauh hynh phuin pangaw lang phia kho athua: (1) Jeremiah kha konaw; (2) Judah ram uktu Josiah, Jehoiakim, Jehoiakhin te Zedekiah she lyaze Pachia nynh Judah hae te mih uktu hae a hopya hae paw bya; (3) Jeremiah a ryaccinkhan Baruk nynh a zeipaw ccauh lungkhu kyaze Jeremiah nynh a hiin lya a la hopaw profehbya hae te abyapipaw acyihkuhpaw aphuinphuin; (4) ramccang hae konglang Bawipaw kyate yn thuapaw bya; (5) Jerusalem khua aro lanpaw kong te Babilon lang see lang a tang lan hae paw kong.
Jeremiah tuh ccungccaw rynaw a nyhthyapaw nynh thua, a ccungccaw hae kha myarya sungsah hae zah minmin tungvaw byapianaw kong papin ho ry khyh. Pachia nynh profeh lang a la ko keiccuze vawsaw a teingnaw kong kha thinlungccite a hopya hae. Pachia bya tuh a thinlung kya maee hawte rua zah ho leite um kho khyh.
Jeremiah ccauh lungkhu e abyapi huaccepaw bya abang nynh Jeremiah a vawsaw ccyh athang koute malang a um cih paw byakin thawpaw ccyh hanlan cia a ho. Tuin ccyh kya tuh Pachia ccungccaw hae kha nysah khylan ccangpahtu um leite tuh-e byakinnaw thawpaw kha a zui cih hae, pawccecize tuh-e tuh mih thinlung kya zei athua vae cih (31.31-34).
1
1 Benjamin ram Anathoth khua kya umpaw ranpibawi hae kyaze lu kheit athua buapaw Hilkiah ccapaw Jeremiah bya:
2 Amon ccapaw Siapharan Josiah nynh Judah ram a uknaw kum haw lae thumnaw kum khe Bawipaw bya tuh Jeremiah kya a thua.Ref 1.2: 2Si 22.3—23.27; 2Sh 34.8—35.19
3 Josiah ccapaw Judah Siapharan Jehoiakim ccyh lya thuasah, Josiah ccapaw Siapharan Zedekiah nynh Judah ram a uknaw kum haw lae kheitnaw kum kyacia thuasah, tuh-e kum kya Jerusalem khuaccaaw hae a kyng ccyh hae sawpaw sah pangawnaw kyacia thuasah tuh-e Bawipaw bya tuh Jeremiah kya a thua.Ref 1.3: 2Si 23.36—24.7, 18.1—25.21; 2Sh 36.5-8, 11.21
Jeremiah Konaw te Ryalaw
4 Bawipaw bya tuh ka kya
yn thua zah yn hopyapaw tuh:
5 “Na nung vue lungkhu
kae rae mawze nang kha kae ny vae;
na pui mawze nang kha
kae thyaasah vae;
minphuin hae hanlan nang kha
profeh lang kae khang vae,” a ci.
6 Tetuh kae nynh, “Pou Bawipaw PACHIA, kae tuh ka imua ung keiccuze pawte ho lan cipaw ka nyh ccaccing khyh,” ka ci.
7 Thuasalama Bawipaw nynh kae kha, “ ‘Imua nynh ka thua ung,’ cite ho nan;
kae sawnaw lang
ccungccaw balyn kalan khe
na cceih cih zah,
kaw kae pyapaw miakaw kha
na ho cih.
8 Minmin kha rih nan hae,
pawccecize nang khum khylan
na kya ka um cih,
9 Tuinte Bawipaw nynh a kuih kha dyng zah ka mung kha yn hae; te Bawipaw nynh kae kha,
“Atu ka bya hynh
na mung kya ka nung vae.
10 Dotua, atunin nang kha
minphuin hae te peenaw hae tungvaw
phoh khylan te suebung khylan,
ro khylan te khulia khylan,
sak khylan te lin khylan
kae khang vae,” yn cipya.
11 Bawipaw bya tuh ka kya yn thua zah, “Jeremiah, Pawmou na muih?” yn cipya. Te kae nynh, “Almond ku ange ngekheit kha ka muih,” ka cipya.
12 Tetuh Bawipaw nynh kae kha, “Hoyte phe na muih vae, pawccecize ka bya ccingsah lanpaw kha phang ka ngaw,” yn cipya.
13 Bawipaw bya tuh ka kalan vae ningnaw yn thua zah, “Pawmou na muih?” yn ci. Te kae nynh, “Accoh cciamangpaw, palung lang apahaekuhpaw ang kha ka muih,” ka cipya.
14 Tetuh Bawipaw nynh kae kha yn hopah zah: Ram lungkhu um hae paw balyn tungvaw khe palung langte shethya yn thua cih.
15 Pawccecize atu palung lang peenaw kya-e minphuin hae balyn kha ka ko hae, cite Bawipaw nynh a ci; minmin nynh oun thua cih hae zah, Jerusalem koikua teenaw kya, po koihlukuhpaw khualungrua hae kya te Judah ram e khua hae balyn kyakhe mih bawitungkhung hae kha ccarou a nung cih hae.
16 Minmin tungvaw bya ka piapaw kha ka ho cih, pawccecize kae kha yn vua hae zah a sei hae, ccangpaw pachia hae kalan silawnaw rae hae zah, mih kuih te a raeku hae paw kha a beik hae.
17 Thuasalama nang tuh na taevoiboei kha voiku tua; thadyn lah kaw kae pyapaw balyn kha hopah hae. Mih malang khe rih nan, tuhkhyhze tuh mih malang khe maethya kae lah cih.
18 Judah siapharan hae, a kuihkaw e bawi hae, ranpibawi hae te ramccungccaw hae athuapaw khah-e ram pynpi te arawsekuh lante, nang kha rhawlungrua te akoihlukuhpaw khuapi, sivaw tung, sohin pang lang atunin kae rae vae.
19 Minmin nynh nang kha rhaw ae tuk hae zemah ae tae lan khyh hae, pawccecize nang kha luesah khylan na kya ka um cih, cite Bawipaw nynh a ci.