JAMES
CCAKY
James
James kyate Ccaky hynh laephi vaw khua takyh lang a phiakuh hae paw Pachia ccungccaw hae kalan Khriccaaw ziazae ccangpyaku nawpaw sueluapaw nynh athua. Ccawzeitu nynh a ho rypaw kya Khriccaaw thinlung te cciakhaekunaw hanlan hawnaw te cciakhaeku nawlan kha tousenaw pataepi a mang. Khriccaaw konglang te a mangpaw abyalupi hae tuh: hoirumnaw te ryachinaw, munglae mangnaw, hawnaw, bya-eikunaw, lysakunaw te zakawsangsakunaw, ming hae byapianaw, pookunaw, lungsaenaw te sawsangnaw.
Hynh-e ccaky nynh Khriccaaw beiknaw zia kya zynnaw tuh ryalawnaw nynh a zui cipaw abyapi lang a langsaku.
1
Beihlangnaw
1 Pachia te Bawipaw Jesu Khri ryalahtu kae James nynh pong pazaekuh lan a phiakuh hae paw Israel phin haw lae ning kha kae beihlang oh.Ref 1.1: Mat 13.55; Mar 6.3; Loc 15.13; Gal 1.19
Zynnaw te Hawnaw
2 Ka u te ka neitaw hae, syntawnaw aphuinphuin na tung vae oh ze, tuh-e tuh lungtua nawlan la ria oh;
3 pawccecize nae zynnaw kha syntawnaw nynh ngaesangnaw kha a poukhae cipaw na ny oh.
4 Nanning nynh pawsang hobounaw um lei lante khaleih a ccingpaw na thua nawlan oh, athangnaw cia la ngaesang oh.
5 Nanning lukhakheit nynh hawnaw abou ze, Pachia kha ngiakuh sah, pawccecize seibe leite ccungccaw balyn kha hysahte a pyatu Pachia nynh tuh-e paw tuh hawnaw a pya cih.
6 Thuasalama lunghiinnaw hoi leite, zynnaw te ngiakuh sah, pawccecize lunghiinnaw a hoipaw tuh khisan nynh mung zah athekuhpaw rili tuileih te nynh aloku.
7 Pawccecize tuhcihawpaw ccungccaw nynh tuh Bawipaw kyate ccangkhakheit ka mue cih cite tuakuh nan sah.
8 Tuhcite thinlung apheipaw ccungccaw tuh a cyipaw miakaw kya atyn leipaw nynh thua.
Ryachinaw te Hoirumnaw
9 Zakawsangpaw uno nynh tuh amaw kha hangthung athuanaw kyakhe a lungtua sah.
10 Mihoipaw nynh tuh amaw kha sawbung athuanaw kyakhe a lungtua sah. Pawccecize aning tuh ramkaw e haetapaw hawte azo cih.Ref 1.10-11: Isa 40.6-7 (LXX)
11 Pawccecize khuanin nynh asopaw ryte he yn thuathung tuh lonua kha naansah zah tuh-e haetapaw tuh khuakuh zah a puithyanaw tuh azo; tuhawte mihoipaw mah a ryasuh cciamang lyakhe azo cih.
Tuhounaw
12 Tuhounaw kha a ngaesangpaw ccungccaw tuh hythua ccoupaw nynh thua; pawccecize aning tuh syntaw he athua koute Bawipaw nynh amaw a sungsah hae paw elang bya a kinpyaku hae paw hiinnaw bawilukhung kha a mue cih.
13 Tuhounaw kha a tung vae ze, “Pachia nynh kae tuh yn tuhou,” cite hum nynh sanmah ho nan sah; pawccecize hoyleinaw nynh Pachia kha tuhou kho khyh, amaw nynh mah hum sanmah tuhou boi khyh.
14 Thuasalama ccungccaw tuh amaw a pynsaw rynaw nynh soih zah he a sue vae ze, aning tuh ling athua vae.
15 Pynsaw rynaw nynh ccaawpoi zah seinaw kha a saah, seinaw nynh he ale tuh chinaw kha a thuakhae.
16 Ka sungsahpaw uteno hae, la lingsakuh nan oh.
17 Ahoypaw lasung miakaw te accingpaw lasung miakaw tuh aluki langte, awnaw hae mih Paaw kyate nynh oun thua hae. Amaw kya tuh rulaekunaw um khyh zah apaleihkuhpaw mynlyh cipaw um boi khyh.
18 Aening tuh amaw nynh a rae hae paw balyn kyaze masaty athae ah thua nawlan oh, amaw a rynaw thyhte byaccing kya-e bya khate aening kha oun rae.
Bya Thaenaw te Zuinaw
19 Ka sungsahpaw uteno hae, ccungccaw miakaw tuh nawthae lan a thyrang sah, byaho lan te thinria lan a thysung sah.
20 Pawccecize ccungccaw thinrianaw nynh Pachia kya-e dingnaw kha poukhae khyh.
21 Tukeiccuze nungsikunaw balyn te paepae luipaw hoyleinaw kha vua oh lah, nae muisaw a khum khopaw, nae lungkhu kya sang athuapaw Pachia bya kha lungnenaw te lawkuh oh.
22 Naemaw te naemaw kha lingkute bya a thaetu hae kyalya thua nan oh. A bya a cyihtu hae la thua oh.
23 Pawccecize lukhakheit nynh bya kha thae zah a cyi khyh ze, aning tuh a puikhaepaw a mae kha muinsado kya a dokuhpaw ccungccaw te nynh aloku.
24 Pawccecize aning nynh amaw te amaw a dokuh koute po cceih zah a muinsan kha phe a ningku kangmaw.
25 Thuasalama luenaw te asekuhpaw accingpaw kawbya kha do zah tuh-e kya po atynpaw ccungccaw tuh thae zah a ningthyapaw ccungccaw thua leite, rya a lahtu nynh thua; aning tuh a ryalaw kya hythua ccoupaw athua cih.
26 Nanning lukhakheit nynh beiknaw lante a zuakuhpaw nynh ka thua cite tuakuh zah a munglae a sungku khyh ze, aning tuh amaw a thinlung a lingkuhpaw nynh thua; tuh-e paw a beiknaw tuh accakaepaw nynh thua.
27 Paaw Pachia malang athyaapaw te anungsikuh leipaw beiknaw tuh e hynh nynh thua: Ngawraw hae te nomae hae kha mih vawsawnaw kya do-oihpaw te ahmaw mah laephi vaw e anungsikuhpaw kya kalouhku leite umpaw kha nynh thua.