JONAH
Jonah
Jonah ccauh hynh Baebu kya umpaw ccangpaw profeh ccauh hae te lokuh khyh; pawccecize e ccauh kyahin Bawipaw bya a ngae leipaw profeh nynh a cyisahnaw kong kha a ho. Pachia nynh Jonah kha Israel rhaw athuapaw Assiria khuapi Nineveh khua lang ccia lan a naw. Thuasalama Jonah nynh cceih ry khyh, Pachia nynh Nineveh khua ka roh cih a cipaw hynh roh tali lan khyh cite a zyn. A tungvaw kya aphuinphuin acyihkuh koute a ry lei pite Pachia kaw kha a ngae; nyathyakou tuh ronaw kong a hopaw kha acyiku khyh keiccuze a lunghoy khyh.
E ccauh nynh Pachia tuh a raepaw balyn tungvaw kya uktu nynh thua cipaw kha a langsah. Pachia tuh sungsahnaw te thawccinaw Pachia thua zah, a ccungccaw hae rhaw kha heize detah te ro laeze mih seinaw ngaethya te khum kha a ryhua cipaw a langsaku.
1
Pachia kyate Ccue lan A Zuaku
1 Bawipaw bya tuh Amittai ccapaw Jonah kya yn thua zah:Ref 1.1: 2Si 14.25
2 “Nineveh khuapi kalan khe cceih kangmaw lah, siatua; pawccecize mih hoyleinaw tuh ka malang phe yn thua vae,” a ci.
3 Thuasalama Janah tuh Bawipaw kyate ccue khylan Tarshish khua lang a thokuh. Joppa khua lang cceihbung zah Tarshish khua lang a cceih cih paw sanphalung ccangkheit kha a muih; sanphalung ccikunaw mee kha pya zah sanphalung vawlan a kae, Bawipaw kyate asawkunaw lang minmin ryte Tarshish khua lang a cceih hae.
4 Thuasalama Bawipaw nynh myarya rupaw khisan kha rili vawlan zawsah zah, rili vawlan khe athawsaepaw khise tuh tho zah, sanphalung tuh vyavya aroh vae.
5 Tetuh sanphalung kya ryalahtu hae tuh rih hae zah, mih pachia raveih kalan a sia hae. Sanphalung tuh azawhua ccaw cite a lungkhu e uccaw hae kha rili lungkhu lang a vua hae. Tuh lyatuin Jonah tuh sanphalung alia khaan ane huanaw langkhe rungbung zah zya a ih.
6 Sanphalung bawipaw nynh yn cceih zah, “Pawccemou thuhbabi lan na i? Thokuh lah, na pachia kalan sawsang! Na pachia nynh aening ah chi khyh nawlan oh tuapyate oun luesah kho khaw,” a cipya.
7 Sanphalung kya ryalahtu hae nynh, “Rang oh, e vawsawnaw hynh ahum keiccu mou ah tung oh cipaw ny nawlan ccungthyhdung oh sih,” cite a hoku hae. Ccungthyhdung hae zah, Jonah tungvaw accah.
8 Tetuh minmin nynh Jonah kha, “E vawsawnaw hynh pawccemou aening tungvaw accaw, oun hopya tua. Paw rya mou na law? Tei kyate mou nae thua? Tei ram paw mou na thua? Paw minphuin mou na thua?” a cipya hae.
9 “Kae tuh Hebru ccungccaw nynh ka thua, rili te laephi a raetupaw vaaw Pachia, Bawipaw kha a beikpaw nynh ka thua,” a cipya hae.
10 Tetuh minmin tuh myarya rih hae zah, “Pawccemou hynhte na cyi?” cite a khia hae. Pawccecize Jonah nynh Bawipaw kyate a ccuepaw kha a hopya vae hae keiccuze minmin nynh a ny vae hae.
11 Te rili tuileih tuh houhouh atho keiccuze minmin nynh Jonah kha, “Rili tuileih adae nawlan nang hynh pawtemou kae cyih cih?” a cipya hae.
12 Jonah nynh minmin kha, “Kae hynh yn hang oh lah, rili lungkhu lang yn vua oh; tetuh rili tuh zya adae vae cih; pawccecize e athawsaepaw khise na tung oh paw hynh kae ka keiccu nynh thua cipaw ka ny,” a cipya hae.
13 Sanphalung kya ryalahtu hae nynh varang lang a thua ccaw cite sanphalung kha thawte a zaw hae, thuasalama khise tuh houhouh atho keiccuze cyih kho khyh hae.
14 Tetuh minmin nynh Bawipaw kalan sia hae zah, “Pou Bawipaw , e ccungccapaw hiinnaw keiccuze kaening hynh beih oun theih nan, seinaw a hoi leipaw chiise keiccuze kae tungvaw kya seinaw kha beih khang nan. Pou Bawipaw , nang tuh na ry hawte na cyi, cite saw kae sang,” a ci hae.
15 Te Jonah kha hang hae zah rili lungkhu lang a vua hae; tetuh rili tuileih tuh zya adae vae.
16 Te sanphalung kya ryalahtu hae nynh Bawipaw kha houh rih hae zah, Bawipaw kalan silawnaw rae hae zah, byakinkunaw kha a rae hae.
17 Jonah kha po laang khylan Bawipaw nynh ngasawpi tuh kawpya zah, Jonah tuh ngasaw vue lungkhu khe nin thum te zi thum a um.Ref 1.17: Mat 12.40