41
1 “Leviathan kha ngasawbaw te
na suebia kho cih tou?
Tuhkhyhze a lae kha arui te
na khii kho cih tou?Ref 41.1: Sam 74.14, 104.26; Isa 27.1
2 A naduh kya arui
na thuing kho cih tou?
Tuhkhyhze a khaw kha
bawnawpaw te na baw kho cih tou?
3 Aning nynh thaw beih yn ccih cite
ae ngiakuh cih tou?
Byanepaw te nang kha
ae soihbiakuh cih tou?
4 Na ryalahtu lang zungzae tang khylan
nang te byakinnaw a rae cih tou?
5 Pavaw te zuekheih hawte
aning te na zuekheih cih oh tou?
Tuhkhyhze na nopi taraw hae hanlan
na khii cih tou?
6 Uccaw zua hae paw ryte
khah-e mee kha na eikuh cih oh tou?
Uccaw zua hae paw nynh khah-e kha
a neekuh cih hae tou?
7 A phaluh kha ccoi te
na thuing kho cih tou?
Tuhkhyhze a lu kha
ngasaw thuingnawpaw ccoi te
na thuing kho cih tou?
8 Aning vawlan khe na kuih khang lah,
rhawtuk lanpaw kha tuatua;
nyalang tuhte na cyih ry vae lan khyh!
9 Aning kyng lan ngaehoinaw miakaw tuh
lungro lan a um vae cih;
pachia hae nynh heize
he a muih hae tuh siiku leite
a um hae zawtou?
10 Humhung nynh mah aning kha
tho ngan khyh.
Hummou a malang a thadyn kho cih?
11 Hum nynh mou Leviathan kha
a dou kho cih zah a khyn cih?
Vaawlui pynpi zakaw umpaw
hum nynh mou aning kha
12 “Leviathan a ccu hae kong thuasah,
athungpaw a thawzung kong thuasah,
alypaw atung-abaw kong thuasah
yccae leite ka um lan khyh.
13 Hum nynh mou a boeining kha
a khahpah kho cih?
Hum nynh mou thyhningpaw
a sivaw angki kha po zua lan
a thuing kho cih?
14 Hum nynh mou a mae thuakaw kha
a hung kho cih?
A hakan balyn tuh ri lan a um.
15 A ke tuh ataruinte um hae paw
aphaluh te rae thua zah,
tazeih khiapaw hawte
phang beekute varyng zi hae.
16 Ccangkheit te ccangkheit
phang beekuh hae zah,
mih laku kya khivae tee kho khyh.
17 Ccangkheit te ccangkheit
a piadekuh hae;
phang kyngkuh hae zah
phia kho thua khyh hae.
18 A hachi vae ze awnaw tuh dalah a ak,
a mit tuh awkhua takaw e
awnaw te nynh aloku.
19 A khalang kyate zaezae epaw
maee-e pou zah, maee-ia a peih.
20 Accoh cciamangpaw ang te
arua cciamangpaw lonua kyate
ahu apou hawte,
a naduh kyate maeekhuh apou.
21 A hy nynh maeehue kha esah zah,
a khalang kyate maeesoi apou.
22 A nging kya thawzung um zah,
a malang khe rinaw tuh thohkute a law.
23 A ngesaw tuh sihkakin lan abekuh;
tynkaring lan um zah nuekuh kho khyh.
24 A thinlung tuh lung hawte a tang,
Lungmia akawlan hawte a tang.
25 A thoku vae ze pachia hae tuh
a rih hae;
myarya rih hae zah a ccue hae.
26 Thaloi nynh a tung zemah
pawlangria khyh,
ccoi, the, ccoipipi nynh mah
vaemaw muesah kho khyh.
27 Sivaw kha ccatanphue lang ria zah,
sohin kha thing thuhpaw lang a ria.
28 The nynh aning kha ccuesah kho khyh;
lungpyng te deih zemah,
lungpyng tuh aning hanlan
vaekang lang phe a tang.
29 Ccungngue alepaw kha
lonua aroupaw lang a ria;
ccoipipi khoihpaw roi kha a nuinse.
30 A vue phaluh tuh ang akoinahpaw
ahepaw te nynh aloku;
a ccianaw tuh tuiccua vawlan
leithue ze anyku hawte anyhkuh.
31 Tui akhunaw kha
ang accohpaw hawte accohsah;
rili kha chitui ang hawte a thuasah.
32 A ccia vae ze a nulang e
tui tuh phaephae ak zah,
rili tuh sang apawpaw vosi cite
tua lan a um.
33 Laephi vawlan aning te
angankuhpaw sarangpaw um khyh,
rinaw a hoi leipaw ahysuepaw nynh thua.
34 Aly-asaepaw balyn kha
a dothatheih hae;
aning tuh alysakuhpaw balyn kyaze
siapharan nynh thua,” a ci.