28
Hawnaw Muihnaw Hmin
1 “Ngun thaenaw akhu tuh
um ccaccing zah,
sui thyaasahnaw hmin mah a um.
2 Sivaw tuh laephi lungkhu te lah hae zah,
sohin tuh lung kha tuisahte a law hae.
3 Lungthaetu nynh akhu huaccepaw
mohnaw kyacia a ccung,
laephi alungkhu lang,
marae zipaw mohnaw kya
umpaw lung kha a ccung.
4 Ccungccaw umnaw kyate
asawnaw umpaw accya khe
akhu kha a thae hae,
khuaccong hae paw nynh
minmin kha a ning hae,
ccungccaw te asawkunaw
akhu lungkhu langkhe arui a sae hae.
5 Laephi vawlan looh po salamah
lae kaw lang tuh maee te
upaw hawte aroh.
6 Laephi kya-e lung a lungkhu tuin
aphutepaw nilar lung a um,
a laenoi kyakhe sui a umbua.
7 “Tuh-e akhu lungkhu lang cceihpaw
laanpi tuh saw a aethyapaw
pavaw nynh nyh khyh zah,
mosi mit nynh mah muih khyh.
8 Tuh-e laanpi tuh arepaw
loramsaw nynh sy khyh zah,
chindeih nynh mah
9 “Ccungccaw hae nynh atangpaw lungpi vawlan khe
mih kuih khang hae zah
mua hae kha aleihpaw kyate
a dawleih hae.
10 Lungpi kyakhe akarung
po thae hae zah
mih mit nynh aphutepaw
uccaw miakaw kha a muih.
11 Vawkhu kha ting hae zah
alangkuh leipaw uccaw hae kha
12 “Thuasalama hawnaw kha
teimou muih athua cih?
Nythyanaw hmin tuh teimou a um?
13 Ccungccaw nynh tuh-e hawnaw kalan
ccianaw laanpi tuh nyh khyh,
a hiin hae paw umnaw kya
muih kho thua khyh.
14 Akhupaw rilipi nynh,
‘Ka kya hawnaw um khyh,’ a ci,
rili nynh mah, ‘Ka kya um khyh,’ a ci.
15 Hawnaw kha sui te re kho thua khyh,
hawnaw mee kha ngunphua te
tou kho thua khyh.
16 Ofir sui te thuasah,
aphutepaw oniks te
nilar lung khate thuasah
a mee khya kho thua khyh.
17 Hawnaw tuh sui te thawlang khate
ngankuh kho khyh,
aphutepaw sui ccipaw te mah
rulaeku kho thua khyh.
18 Koral lung te alabaster lung tuh
hawnaw te hokhia lanpaw thua khyh hae;
hawnaw mee tuh palee mee laeze ahanghua.
19 Ethiopia ram e topaz lung te
khinkhia kho thua khyh,
sui ccipaw te mah
20 “Tuhteze hawnaw tuh
teitemou yn thua?
Nythyanaw hmin tuh teimou a um?
21 Ahiinpaw ahysuepaw balyn nynh
muih kho khyh hae,
vaawlang e pavaw hae nynh mah
muih kho khyh hae.
22 Abaddon te Chinaw nynh,
‘Hawnaw kong laanbya kha
kae nakaring te kae thae vae,’
23 “Pachia nynh hawnaw kalan
ccianaw laanpi kha nyh zah,
hawnaw hmin kha mah a ny.
24 Pawccecize aning nynh
laephi adianaw cia muih zah,
vaawlui zakaw e atyn-are kha a muih.
25 Pachia nynh khivae kha akhin sae zah,
tui kha tounawpaw te ramri a ia,
26 te khuaarawnaw phunglang kha rae zah,
riakawnaw laanpi kha he a rae tuh,
27 Pachia nynh hawnaw kha
muih zah a nysah hae;
hawnaw kha tynsah zah a langsaku.
28 Pachia nynh ccungccaw kha,Ref 28.28: Sam 111.10; Ptb 1.7, 9.10
‘Thanccingte, Bawipaw rawri tuh
hawnaw nynh thua;
hoyleinaw sibia tuh nythyanaw nynh thua,’