18
Bildad Bya
1 Oute Shuh minphuinpaw Bildad nynh khungru zah:
2 “Hohseciamou bya na ho cih?
Hoyte tuatua, kaening nynh
bya kae ho cih.
3 Pawccemou kaening hynh
sarangpaw lang nae ria?
Pawccemou kaening hynh
mingaee lang nae muih?
4 Na thinria zah namaw te namaw
vawsaw na pyaku keiccuze,
laephi hynh vua athua cih tou?
Lung hae kha mih umnaw kyate
5 “Ccungccaw hoyleipaw kya-e
awnaw kha the athua cih zah,Ref 18.5-6: Job 21.17
a maeesoi tuh rua lan khyh.
6 A bu lungkhu kya
awnaw tuh moh zah,
a luki e maeeinn tuh achih.
7 A laanccia tangkaraepaw kha
a thy a pawkuh vae,
a paccynkupaw toulou nynh
amaw kha a khulia.
8 A ccu khate kaang lungkhu lang
tee zah,
kaang zantapin kha a sy.
9 Kaang nynh a ccumaria khate
leih zah, kaang a kae vae.
10 Kaangrui tuh laekhu kya
thuruh thua zah,
kaang tuh laanpi kya
nungkhaw athua.
11 Rinaw nynh voikheit voikheit
langte koihlu zah,
kyng khylan a deehui.
12 A vuelaw keiccuze
a thawzung athang vae,
aning kha khuliasaku khylan
vawsawnawpi nynh a thadynnua.
13 Ccinaw keiccuze a ving tuh
khaleih roh zah,
Chinaw a ccatawccaw nynh
a kuih a ccu hae kha khaleih a ro.
14 A doliakupaw a umnaw bu kyate
amaw kha ccaring sue thua zah,
rinaw siapharan kalan khe
cciakhae athua.
15 A umnaw bu kya pawpaw mah
um vae khyh;
a umnaw kyakhe kemaee kha
vuanua athua.
16 Akaw e a tharui hae tuh
karae rou zah,
avaw e a karan hae tuh
baleih anaan hae.
17 Aning syntawnawpaw tuh
laephi kyate zo zah,
laanpi kya min hoi vae khyh.
18 Aning kha awnaw kyate
mohnaw lungkhu lang
nohde thua zah,
laephipi kyate dee athua.
19 A puizia hae laku kya
ciihan thuasah,
ccaawno thuasah hoi khyh,
leih a la umnaw hae kya
ahiinpaw lu kheit san
um vae khyh.
20 Niccaw lang e
ccungccaw hae nynh
a kong he a thae hae te,
siikuh hae zah,
nithua lang e ccungccaw hae tuh
rikawte a um hae.
21 Thanccingte tuhcihaw tuh
Pachia pawlangria lei hae paw
mih umnaw thua zah,
tuhcihawpaw hmin tuh
Pachia nyh lei hae paw
umnaw hmin nynh thua,” a ci.