65
Ahmepaw Pachia Byapianaw
1 Kae yn ngia lei hae paw nynh
mue lanpaw te kae yn ccung lei hae paw nynh
yn muih lan hae paw kha
paccynkute ka um.
“E kya mang ka um, e kya mang ka um,” cite
ka min yn ko leipaw
minphuin kha ka hopya.Ref 65.1: Rom 10.20
2 Mih tuakunaw thyhte cyih hae zah,
ahoy leipaw laanpi a zui hae paw,
kawngae lei hae paw minphuin kalan khe
anin ninlang ka kuih ka dyngpya hae;Ref 65.2: Rom 10.21
3 minmin tuh khokhu kya
silawnaw rae hae zah
ohkhe vawlan mynkhuhpaw kha ute
ka thin yn riasahpaw
ccungccaw hae nynh thua hae;
4 shawku kya haung hae zah
khuazi khe alang leinaw
hmin kya a um hae;
voh saw kha ae hae zah,
mih angphe lungkhu umpaw
anungsikuhpaw saw ehang kha a sia hae;
5 minmin nynh, “Kae tuh nang laeze
myaryamaw ka thyaahua keiccuze
ka kalan naeku leite
namaw um lan zya um,” a ci hae.
E ccungccaw hae tuh ka naduh lungkhu e
maeekhuh thua hae zah,
anin ninlang aruapaw maee nynh thua hae.
6 Ka malang azeikuhpaw tuh:
Zya ka dae lan khyh, ka liaru cih hae;
mih hoyleinaw te
mih minpaaw hae hoyleinaw kha
7 mih by kyakhe ka liaru ccaccing cih hae, cite
pawccecize minmin nynh
mua hae vawlan khe
mynkhuhpaw kha pya hae zah
sangpyng hae vawlan khe
ka the yn thyasah hae,
mih by vawlan khe mih cyisahnaw kha
ka tou cih zah phe ccing lan
ka liaru cih hae.
8 Oute Bawipaw nynh a hopaw tuh:
misu nge kyakhe misutui kha
a muih hae ze,
“Khah-e kha roh nan,
pawccecize khe kyakhe
hythuanaw a um,” a ci hae;
tuhawte ka ryalahtu hae hanlan
ka cyih cih zah,
minmin kha pong ka roh lan khyh hae.
9 Jakob phin kyate ciihan
ka langsakuh cih zah,
Judah phin kyate ka mua kha
rho lang a ccoutupaw ka langsakuh cih;
ka po hae paw nynh tuh-e ram tuh
rho lang a ccou cih hae zah,
ka ryalahtu hae nynh
tuin kya a um cih hae.
10 Kae yn ccungpaw ka ccungccaw hae hanlan
Sharon tuh tuu hae nynh
rampaeekunaw hae hmin lang a tang cih zah,
Akhor Accya tuh vaetua hae nynh
a ryanaw hae hmin lang a tang cih.Ref 65.10: Jos 7.24-26
11 Nanning tuh Bawipaw a vua hae paw,
athyaapaw ka mua kha a ning hae paw,
Gad khozi hanlan ccaboi
a phaepah hae paw te
Meni khozi hanlan misutui
a nungpah hae paw nynh na thua oh;
12 nanning kha thaloi rhaw kalan
kae ap cih oh zah, nae balyn mawte
ccungccaw chianaw kyakhe
na bakhung cih oh;
pawccecize he kae ko oh ze,
nae khung khyh oh,
bya kae hopya oh ze,
nae ngaepah khyh oh,
ka muihnaw khe ahoy leipaw kha
na cyih oh zah,
ka lungrythua leipaw kha na poku oh.
13 Tukeiccuze Bawipaw PACHIA nynh
hynhte a ho:
Ka ryalahtu hae tuh a ae cih hae,
thuasalama nanning tuh
nae vuelaw cih;
ka ryalahtu hae tuh a neih cih hae,
thuasalama nanning tuh nae tuihaw cih;
ka ryalahtu hae tuh mih lungpaw cih,
thuasalama nanning tuh
nae maethah cih;
14 ka ryalahtu hae tuh lungpawte
hlaw a sah cih hae,
thuasalama nanning tuh
thinlungccite na sia cih oh zah,
lungriathaete na rah cih oh.
15 Thyalaw nawlan mang khylan
nae min kha ka popaw ccungccaw kya
na cciataw cih oh,
te Bawipaw PACHIA nynh
nanning kha ae theih cih oh;
a ryalahtu hae kha min thawpaw
a phu cih hae.
16 Tetuh ram lungkhu kya
hythuanaw a ngiapaw miakaw nynh
a lungzipaw Pachia liate
hythuanaw kha a ngiakuh cih,
ram lungkhu kya byakinkunaw
a raepaw nynh a lungzipaw
Pachia liate bya a kinkuh cih;
pawccecize langmawlya e
vawsawnaw hae kha ning thua vae zah
ka muihnaw kyate thuruh athua vae.
Aphu-epaw Raenaw Thawpaw
17 Vaaw thawpaw te laephi thawpaw kha
ka rae cih;
langmawlya e uccaw hae kha
liathui thua vae lan khyh,
tuathui mah thua vae lan khyh.Ref 65.17: Isa 66.22; 2Pe 3.13; Bya 21.1
18 Ka rae lanpaw uccaw kyakhe
zungzae nae lungtua sah lah,
nae lungpaw sah;
pawccecize Jerusalem kha
lungpaw um lante ka rae cih zah,
a ccungccaw hae kha
lungrythua lante ka rae cih hae.
19 Jerusalem kya ka lungpaw cih zah,
ka ccungccaw hae tungvaw
ka lungrythua cih;
tuin kya rawkhuinaw roi te
lungvawsawnaw roi kha
thae thua vae lan khyh.Ref 65.19: Bya 21.4
20 Tuin khua kya nosi lyate
a chihpaw um lan khyh zah,
a she phe dia lan a hiin leipaw
atawpaw um lan khyh;
kum za kheit te a chihpaw kha
zawthaw cite tua athua cih zah,
kum za kheit a bia maw a chihpaw tuh
thyalawnaw a muepaw cite tua athua cih.
21 Minmin nynh inn a sak cih hae zah
a umnah cih hae;
misu khokhu kya misu ku
a linkuh cih hae zah athae kha a ae cih hae.
22 Minmin nynh a sak hae paw inn kyakhe
milae nynh umnah lan khyh;
minmin nynh a lin hae paw
misu thae kha mah
milae nynh ae lan khyh;
ka ccungccaw hae hiinshe tuh
thingku hiinshe hawte athua cih zah,
ka po hae paw tuh mih kuih te
rya a lawku hae paw kyakhe
khaw cia mih lungpawkhaekuh cih.
23 Minmin tuh accakaepaw kya
banghan lan khyh hae,
shethya hanlan ccaaw saahkuh lan khyh hae;
Bawipaw nynh hythua a pya hae paw
ccaawno athua cih hae zah,
mih ciihan hae mah
hythua ccoupaw athua cih hae.
24 Minmin nynh yn ko maw hae khe
ka oi cih hae,
bya yn hopya cciamang lya hae khe
ka thaepah vae cih hae.
25 Suizaw te tuutaw tuh a aekheih cih hae,
chindeih tuh tangnuapaw hawte
ccatanphue kha a ae cih;
thuasalama hupaw tuh laenoi kha a ae cih!
Athyaapaw ka mua pynpi vawlan khe
minmin nynh vawsawnaw
pyakuh lan khyh hae zah