63
Edom tungvaw Liarunaw
1 “Edom ram Bozrah khua kyate
asepaw azong ohkuhpaw
boeining kha lawkute
yn thuapaw khuh hummou athua?
Asung-epaw angkiccua kha lawkuh zah
myarya lepaw a thungnaw te
yn cceihpaw khuh hummou athua?”
“Thyaaccounaw kong kha hote
khumnaw lanpaw thungnaw a hoipaw tuh
kamaw nynh ka thua.”Ref 63.1-6: Isa 34.5-17; Jer 49.7-22; Eze 25.12-14, 35.1-15; Amo 1.11-12; Oba 1-14; Mal 1.2-5
2 “Pawccemou na angkiccua tuh se zah,
na boeining tuh misu mianaw khu kya
a su hae paw boeining te aloku?” a ci.
3 “Misutui mianaw khu kya
ka makhaete ka su zah,
ccungccaw lu kheit sanmah
ka kya umbua khyh;
khah-e hae kha thinriate bungpawte
sydete ka nonde hae,
atui nynh ka boeining kha pia zah,Ref 63.1-6: Isa 34.5-17; Jer 49.7-22; Eze 25.12-14, 35.1-15; Amo 1.11-12; Oba 1-14; Mal 1.2-5
ka angkiccua balyn tuh
azong pong ohkuh.
4 Phulawnaw nin tuh ka thinlung kya
um zah, ka shawkhawnaw
ryalaw kum tuh yn thua vae.
5 Ka do zahmah bawmtu um khyh;
riri ka do zemah kae yn bawmtu
lu kheit san um khyh;
tukeiccuze kamaw kuih nynh
taenaw kha yn thuakhaepah zah,
ka thinrianaw nynh kae kha yn bawm.Ref 63.5: Isa 59.16
6 Ka thinria zah ccungccaw hae kha
ka syde hae,
ka bungpaw zah minmin kha
zoihtatyh lan ka pae hae,
mih hiinnaw chiise kha
laephi vawlan ka lae,” a ci.
Israel tungvaw Pachia Thawccinaw
7 Bawipaw sungsahnaw
myarya lepaw te thehoysah lan
accanpaw Bawipaw ryalawnaw kha
the ka hoysah cih,
pawccecize Bawipaw nynh
aening elang atyn-are oun cyipah zah,
a thawccinaw thyhte thuasah,
myarya le zah atynpaw
a sungsahnaw thyhte thuasah
Israel phin hanlan myarya lepaw
thawccinaw kha a langsaku vae.
8 Bawipaw nynh, “Thanccingte minmin tuh
ka ccungccaw hae thua hae zah,
kae kha yn ling cih lei hae paw
ka ccaaw hae nynh thua hae,” a ci;
aning tuh mih lungriathaenaw balyn kya
mih Khumtu lang yn tang.
9 Amaw malang e vaawpaw nynh
minmin kha a khum hae;
a sungsahnaw te
a ngaethyaumsahnaw keiccuze
minmin kha a shawkhaw hae;
alia vae paw ccyh balyn kya
minmin kha hangthung hae zah
10 Thuasalama minmin nynh
amaw kha dou hae zah
athyaapaw a Muisaw kha
a ngaethyasah hae;
tukeiccuze aning tuh
minmin rhaw lang tang zah,
amaw ccaccei nynh minmin kha
rhaw a tuk hae.
11 Tetuh minmin nynh langmawlya e she,
a ryalahtu Moses she kha
a liathui hae.
Minmin kha tuurin hae ryte
rili lungkhu te
a cciakhae hae paw Bawipaw kha
teimou a um vae?
Mih lungkhu kya athyaapaw
a Muisaw a nungtupaw,
12 aphu-epaw a kuih kha
Moses a ranglang kuih kya
a umsahtupaw,
zungzae tynpaw min kha
amaw hanlan raeku khylan
mih malang e tui kha
a phiasakuhtupaw,
13 minmin kha akhunaw kya
po a cciakhae hae paw Bawipaw tuh
teimou a um vae?
Ramkaw kya a cceihpaw marang hawte,
minmin tuh thykupawku leite
a cceih hae.Ref 63.12 Exo 14.21
14 Accya kya a cceihbungpaw
vaetua hae hawte,
Bawipaw Muisaw nynh
minmin kha haeungnaw a pya hae.
Tuhcite aphu-epaw min kha
namaw hanlan langsakuh khylan
na ccungccaw hae kha
na cciakhae hae.
Ngaesikute Sawsangnaw
15 Vaawram kyate dobung tua lah,
athyaapaw te aphu-epaw
na umnaw kyate muihtua,
Na lungthonaw te na thungnaw tuh
teimou a um?
Na sungsahnaw te ngaethya
na umsahnaw tuh teimou a um?
Tuh-e hae tuh ka hanlan khee athua hae.
16 Abraham nynh kaening kha
oun nyh khyh zah,
Israel nynh mah oun ny khyh zemah
nang tuh kae Paaw nynh na thua.
Pou Bawipaw , nang tuh
kae Paaw nynh na thua;
langmawlya mawte kaening
oun Shawkhawtu tuh na min nynh thua.
17 Pou Bawipaw , kaening hynh
na laanpi kyate pawccemou
ccanglang nae cciasah sei?
Na raw kae ri khyh nawlan
pawccemou kae thinlung hynh
nae khungsah?
Na ryalahtu hae hanlan te
na rho athuapaw phin hae hanlan
yn kitua.
18 Athyaapaw na ccungccaw hae nynh
sosoh kyalya kae uk;
thuasalama atu tuh kae rhaw hae nynh
na beikinnthyaa kha a syde vae hae.
19 Kaening tuh nang nynh
na uk boi lei hae paw hawte thuasah,
na min te ko athua boi lei
hae paw hawte thuasah