51
Pachia Ccungccaw hae hanlan Hythuanaw
1 Dingnaw lang a zui hae paw te
Bawipaw a ccung hae paw nanning,
ka bya hynh ngaetua oh.
Nanning nae pounaw oh lungpi te
nanning ae thaebianaw oh paw
lungkarung kha tuatua oh.
2 Nae paaw Abraham te
nanning ae saahtu oh paw
Sarah kha tuatua oh;
Abraham ka la ko lya tuh
a makhae nynh thua,
thuasalama hythua ka pya zah
patae lang ka rae.
3 Pawccecize Bawipaw nynh Zion kha
ngaengannaw a pya cih;
ccungccaw a um leinaw a hmin balyn kha
ngaengannaw a pya cih,
a ramkaw kha Eden hawte a rae cih zah,
a laesia ram kha
Bawipaw khokhu hawte a rae cih;
Zion kyakhe lungtua lungpawnaw,
lungtuabya honaw te
hlawsahnaw roi kha a um cih.
4 Ka ccungccaw hae,
ka bya hynh ngaetua oh,
ka minphuin hae, ka hopaw hynh
hoyte ngaetua oh; pawccecize ka kyate
ccangpyanaw a toikuh cih zah,
ka byading tuh ccungccaw hae hanlan
awnaw lang a tang cih.
5 Ka kya-e luenaw kha
arangte kae thuakhae cih,
ka khumnaw tuh pou vae zah,
ka kuih nynh ccungccaw hae kha a uk cih hae;
rili khunglang e ram hae nynh kae kha
yn ngaehoikuh hae zah,
ka kuih kha a doliaku hae.
6 Vaawlui khuh dotua oh lah,
akaw lang e laephi kha mah dotua oh;
vaawlui tuh maeekhuh hawte a zo cih zah,
laephi tuh boeining hawte a pue cih,
laephi vawlan a um hae paw tuh
maseih hawte a chih cih hae;
thuasalama ka khumnaw tuh
zungzae atyn cih zah,
ka kya-e luenaw tuh thang boi vae lan khyh.
7 Dingnaw kha nyh hae zah
mih thinlung kya
ka ccangpyanaw a hoi hae paw nanning,
ka bya hynh ngaetua oh;
ming hae nynh sei ae be oh ze rih nan oh,
ae sarya oh zemah nae lungriathae nan sah.
8 Pawccecize laehaw nynh minmin kha
boeining hawte a ae cih hae zah,
ripaw nynh tuuming boei hawte a ae cih hae;
thuasalama ka kya-e luenaw tuh
zungzae atyn cih zah,
ka khumnaw tuh she takyh po atyn cih.
9 Pou Bawipaw kuih,
thoku tua, thokuh lah thawzung lawku tua!
khawlya e langmaw she lya
hawte thoku tua!
Rahab kha zoihtatyh lan pae zah,
nakaa-hupi kha a thuingtupaw tuh
namaw na thua khyh tou?
10 Myarya akhupaw rili kha
karae rousah zah,
a shawkhawpaw ccungccaw hae nynh
rili a zua nawlan hae cite
akhupaw rili kha
laanpi lang a raetupaw tuh
namaw na thua khyh tou?
11 Tukeiccuze Bawipaw nynh
a luesah hae paw tuh a ki cih hae zah,
hlawsah biate Zion khuapi a thua cih hae;
zungzae tynpaw lungtuanaw
lukhung kha a khungkuh cih hae;
lungtua lungpawnaw kha
a mue cih hae zah, ngaethyanaw te
riathaenaw tuh azo vae cih.
12 Nanning kha ngaengannaw
ae pyatu oh paw tuh kamaw nynh ka thua;
a chih cih paw ccungccaw, lonua hawte
a naanthyapaw ccungccaw maesae kha
pawccemou na ripya?
13 Vaawlui kha tharae daw zah
laephi thonaw aleihpaw
a bingtu, nang ae Raetupaw
Bawipaw kha phe na ning vae.
Nang ae tuaasahtupaw a thinrianaw te
nang kha ro khylan
a paccynkuhtupaw keiccuze
nang tuh anin ninlang po na rih.
Thuasalama nang ae tuaasahtupaw
a thinrianaw tuh teimou a um vae?
14 Tuaasahkunaw a teing hae paw kha
arangte luesah athua cih hae;
minmin tuh chih lan khyh hae,
Hunghuapi lungkhu lang
ccah lan khyh hae zah,
looh leite um lan khyh hae.
15 Pawccecize kae tuh
rili tuileih kha thosah zah,
rili roi a ccaesahtupaw
Bawipaw nae Pachia nynh ka thua,
amaw min tuh vaaw Bawipaw nynh thua.
16 Ka bya kha na mung kya ka nung zah,
nang kha ka kuih a mynlyh kya
kae thuruh vae,
vaawlui kha tharae ka daw zah,
laephi aleihpaw kha ka tynsah,
te Zion kha, “Nang tuh
ka minphuin nynh na thua,” ka cipya.
17 Pou Jerusalem, thoku tua,
namaw te namaw thoku tua,
namaw thoku tua!
Nang tuh Bawipaw kuih kya umpaw
a thinrianaw banang kha
phe na nia vae,
ruinawpaw pakekhupaw kya-e
ahaw kha mah
a neihtupaw nynh na thua.Ref 51.17: Bya 14.10, 16.19
18 Amaw nynh a saahku hae paw
a ccaaw hae balyn laku kya
aning kha a cciakhae lanpaw
lu kheit san um khyh;
aning nynh a do-oih hae paw
a ccaaw hae laku kya
aning kha a kuih te a kyng lanpaw
lu kheit san um khyh.
19 Vawsawnaw phuin ning athuapaw
ccakanccinaw keiccu ronaw te
thaloi rhaw keiccu ronaw nynh
na tungvaw ae thuanua vae,
hum nynh mou nang kha
a ngae ae thyakhae cih?
Hum nynh mou lungtangnaw ae pya cih?
20 Na ccaaw hae tuh mih thawzya vae,
kaang a kaepaw saccung hawte
laanpi atungkunaw miakaw kya
a huekuh hae;
Bawipaw thinrianaw,
na Pachia thuiheinaw khate
minmin tuh phe a beih hae.
21 Tukeiccuze vaemaw a mue hae paw,
misutui te thua leite
ccangpaw te a rui hae paw nanning,
e hynh ngaetua oh:
22 Nanning kya-e Alesae huapaw, Bawipaw ,
a ccungccaw hae byathan kha
a pankhawtupaw nae Pachia nynh
a hopaw tuh:
Dotua, ruinawpaw pakekhupaw kha
na kuih kyate ka law vae;
ka thinrianaw banang kya-e kha
na neih vae lan khyh oh.
23 Nae ke kha laephi hawte
na tuapakuh oh zah,
minmin ccianaw lanpaw
laanpi hawte na raepya oh.
“Bakhung, na tungvaw
kae cceih cih,” cite ae hopah oh paw,
nanning ae tuaa ae sah oh paw
kuih hae kyakhe
khah-e banang kha ka nung cih.