5
Misu Khokhu Hlaw
1 Ka sungsah kya-e misu khokhu te
asekuhpaw sungsakunaw hlaw kha
ka sungsah hanlan ka sahpah cih:
Ka sungsahpaw tuh laephi myarya
hoynaw mua vawlan khe
misu khokhu ccangkheit a hoi.Ref 5.1-2: Mat 21.33; Mar 12.1; Luk 20.9
2 Laephi kha thae zah lung hae kha
phe thyaa lan a vua,
te ahoypaw misu ku kha a lin;
khokhu ngaelung khe ngawnawpaw
buhang kha sak zah,
misu mia nawlan akhu kha a karyn;
misu thae a thae lanpaw kha a ngaehoi,
thuasalama ahoy leipaw
misu thae lang nynh phe thae.
3 Te atu, Jerusalem um hae paw te
Judah ccungccaw hae,
kae te ka misu khokhu hynh
bya oun pia oh.
4 Ka misu khokhu hanlan
cyipya lan ccan zah
ka cyipya leipaw pawmou a um ung?
Misu thae a thae lanpaw
ka ngaehoi lyakhe,
pawccemou ahoy leipaw
misu thae lang poh a thae?
5 Ka misu khokhu hanlan
pawmou ka cyih cih cipaw
atu kae hopah cih oh.
A hohung kha ka roh cih zah,
milae nynh a ae cih; a lungrua kha
ka ting cih zah syde athua cih.
6 Misu khokhu kha alakawpaw lang
ka tangsah cih;
ahoy leipaw akaran kha baepya te
pohpia te phopya mah thua lan khyh,
thabu te hinpaw ku hae nynh a zithin cih;
khokhu kya khuaa araw khyh nawlan
maeking kha mah kaw ka pya cih.
7 Israel phin tuh vaaw Bawipaw kya-e
misu khokhu nynh thua,
Judah ccungccaw hae tuh aning nynh
a linkupaw misu ku nynh thua;
aning nynh byading kha a ngaehoi,
thuasalama chiise luanaw kha a muih;
dingnaw kha a ngaehoi,
thuasalama rawnaw roi kha a thae!
Dingleinaw kha Seibenaw
8 Milae hanlan umnaw a um lei lan ciate,
inn te inn po kyngkuh lan
na piade oh zah,
nae loo pe ccangpaw loo kha
na piachih oh zah
ram lungkhu khe naemaw kyalya
na um oh paw tuh ngaethya lan kou um!
9 Vaaw Bawipaw nynh
ka thaenaw kya bya a kinkupaw tuh:
Le zah apuithyapaw inn patae hynh
a umtu um leite
ccungccaw adae ccaccing cih.
10 Pawccecize misu khokhu
ekah ccanghaw nynh misutui galan
ccangtaruh loukaw kha a pou cih,
ccacii phu haw a tupaw nynh
phu kheit kyalya kha a mue cih.
11 Ruithyapaw kha nia khylan
awkhua takaw te a tho hae paw,
khuazi mah misutui po a rui hae paw
nanning hanlan ngaethya lan kou um.
12 Mih poi kya tuh tintang te
arui lungpaw tintang,
tamboring, phyly te misutui a hoi hae,
thuasalama Bawipaw nynh a cyipaw kha
pawlangria khyh hae zah,
a kuih te rya a lawpaw kha
muih khyh hae.
13 Tukeiccuze ka ccungccaw hae tuh
nytaw leite kyng hae zah
ramccang lang a cciakhae hae;
minmin a cciakhaetu hae tuh
vuelawte vyavya a chih hae,
mih ccungccaw zapi hae tuh
14 Tukeiccuze michi khua tuh
aerang-niarang myarya thua zah,
a khalang kha thawte a aw;
Jerusalem a phu-enaw,
a ccungccaw zapi hae te
mih lungtuapaw balyn tuh
a ccahbung hae.
15 Ccungccaw hae tuh maethyate
a bakhung hae, mih balynte
nyaasah bung hae zah
a lysakuh hae paw tuh
mih maesue phe roh.
16 Thuasalama vaaw Bawipaw tuh
dingnaw te hangthung thua zah,
Athyaapaw Pachia nynh a thyaanaw kha
amaw toulou nynh
dingnaw liate a langsahku.
17 Tetuh arohpaw khuapi lungkhu khe
tuutaw hae nynh
ram a paeekunaw hae kya
a ae hae hawte a ae cih hae zah,
miaataw hae nynh rampaeekunaw kha
18 Hoyleinaw kha seinaw rui te
a sue hae paw nanning,
le kha arui te sue hawte seinaw kha
a sue hae paw nanning hanlan
ngaethya lan kou um,
19 “Aening nynh ah muih ccaw oh,
Bawipaw nynh a ryalaw kha
arangte lah vae sah!
Aening nynh ah ny ccaw oh,
Israel Pachia Athyaapaw nynh
a paccynkupaw kha ccingsah lan
rangsakuh vae sah!” cite na ho oh.
20 Ahoy leipaw kha ahoy,
ahoypaw kha hoy khyh cite
a ho hae paw, awnaw kha mohnaw lang,
mohnaw kha awnaw lang
a tangsah hae paw,
akhahpaw kha a-epaw lang,
a-epaw kha akhahpaw lang
a tangsah hae paw nanning hanlan
ngaethya lan kou um!
21 Ka haw cite na muihkuh oh paw,
naemaw mitmuihnaw kya
na hawsakuh oh paw nanning hanlan
ngaethya lan kou um!
22 Misutui nianaw kya
minthaan hae paw te
aphuinphuin pykuhpaw
ruithyapaw nianaw kya
mih rawthungpaw nanning te
23 pyaruh keiccuze
a sei hae paw kha daangsah hae zah,
seinaw a hoi lei hae paw nynh
mue lan accanpaw kha
a pya lei hae paw nanning hanlan
ngaethya lan kou um!
Ramccang nynh Kyngku lanpaw Hotynaw
24 Tukeiccuze, maee nynh
ccatanphue kha u zah maeesoi nynh
lonua aroupaw kha a u hawte,
minmin tharui tuh a thuh cih zah
minmin apaw tuh vuiping hawte
akhuhthung cih;
pawccecize minmin nynh
vaaw Bawipaw thuiheinaw kha ngae leite,
Athyaapaw Israel Pachia bya kha
25 Tukeiccuze Bawipaw thinrianaw tuh
a ccungccaw hae tungvaw maee lang rua zah
a kuih dyngnua te minmin kha detah hae;
mua hae tuh hy hae zah
mih rhua hae tuh laanpi kya athupaw hawte
a um hae.
Thuasalama Bawipaw thinrianaw tuh
dae khyh zah a kuih po a dyng ung.
26 Asawnaw umpaw minphuin hanlan
syntawnawpaw alan kha
a hangpah thung cih zah,
laephi adianaw umpaw
ccungccaw hae hanlan
fari kha a tupah cih hae.
Te minmin nynh arangte
a cceih vae hae!
27 Minmin kya a thawbangpaw um khyh,
a thy a pawkuhpaw um khyh,
a ngawphukuhpaw um khyh,
a ihpaw um khyh, cce kya
voikupaw mah phoukuh khyh,
a phanah rui paepaw um khyh;
28 mih the tuh ahe, mih li tuh a tang,
mih marang ccukoh hae tuh
rihlung te lokuh zah, mih leccu hae tuh
khiccung te nynh a loku hae.
29 Mih roi tuh chindeih a siapaw
roi te lokuh zah
chindeih anopaw hawte a sia hae;
hurawte saw kha a kyngku hae,
tuh-e saw tuh a cciakhaeku hae,
te lu kheit nynh sanmah
luesah kho khyh hae.
30 Tuin nin khe minmin tuh
rili tuileih athopaw roi hawte
a sia a rua cih hae.
Tuh-e ram tuh do lanze mohnaw te
riathaenaw rou nynh a um;
awnaw tuh maeking khate