46
1 Babilon pachia hae tuh a pu vae hae!
Nebo tuh a khya vae,
mih zohtuh hae kha loramsaw te
sahiin vawlan phusah athua hae;
nanning nynh na la phu oh paw khah-e hae kha
a thawbangpaw sahiin hae vawlan khe
phupaw ripaw hawte phusah athua vae.
2 Zohtuh hae tuh khya hae zah
pynkheihlan a pu vae hae;
minmin nynh mimaw phupaw aripaw kha
khumkuh kho khyh hae,
mimaw kha heize kyng hae zah
3 Pou Jakob ciihan hae,
Israel ciihan a laehy hae paw balyn,
ka bya kha ngaetua oh,
na pui takaw oh te kae do-oih oh zah,
nae nung vue kyate kae dua oh.
4 Nae kum tang zah nae sang apaw cia heize
kae tuh nae Pachia ka thua zah
kae do-oih cih oh.
Kae raekuh vae oh zah, kae do-oih cih oh,
kae bawm cih oh zah kae khum cih oh.
5 Kae kha hum te mou nae losakuh cih zah
nae ngansakuh cih?
Hum te mou nae khinkhia cih zah,
nae losakuh cih?
6 Phuabu kya-e sui kha hysahte
patae boh hae zah,
ngun kha zawccu te a khin hae,
sui kha pachia lang a raethyapaw kha
hoh hae zah a raesah hae;
tetuh minmin nynh bakhungnua hae zah
a beik hae!
7 Tuh-e pachia tuh mih raw kya
khangkuh hae zah a puih hae,
te a umnaw hmin kya nung hae zah
tuin kya a thadyn;
a umnaw kyate nuekuh kho khyh.
Lukhakheit nynh tuh-e kalan
siaruate a ko zemah oi khyh,
vawsawnaw kyate
humhung kha mah khum khyh.
8 Pou kaw-ei hae paw,
e hynh ning nan oh lah, hoyte tua oh,
nae thinlung kya syntaw oh lah,
9 langmawlya acyihkuh vae paw
uccaw hae kha liathui oh;
pawccecize kae tuh Pachia nynh ka thua,
ccangpaw Pachia um khyh,
kae tuh Pachia nynh ka thua,
kae te alokuhpaw ccangpaw Pachia
ccangkheit san um khyh,
10 Athotakawnaw kyate athangnaw cia,
langmawlya te rae athua loh leipaw
uccaw hae kha hote,
“Ka eenaw tuh atyn cih zah,
ka paccynnaw kha ka ccingsah cih,” ka ci,
11 nithua langte saw a aethyapaw
pavaw sa kheit athuapaw
ka eenaw ccingsah khylan
pisepaw lu kheit kha
asawnaw ram kyate ka ko.
Ka ho vae paw kha ka ccingsah cih;
ka paccyn vae paw kha ka cyih cih.
12 Mih lungkhung zah luenaw kyate
asawkuh hae paw nanning,
ka bya hynh ngaetua oh:
13 Ka kya-e luenaw kha anaenaw lang
kae cciakhae vae, saw vae khyh,
ka khumnaw tuh accyh ro vae lan khyh;
khumnaw kha Zion khe ka nung cih zah,
ka phu-enaw tuh Israel hanlan athua cih.