29
Jerusalem Koihlunaw
1 Ariel khua, David a umnaw
Ariel khuapi hanlan
ngaethya lan a um baban!
Kum kheit koute kum kheit
poi hae kha tua hae sah.
2 Tuhzemah Ariel khua kha
a ria ka thaesah cih zah,
rawkhuinaw te ngaethyanaw a um cih,
te Jerusalem tuh kae ka hanlan
Ariel khua hawte athua cih.
3 Te David hawte nang kha
rhawkaw phu kae nungnua cih;
rhawviainn hae khate nang kha
kae koihlu cih zah,
laekarung thaenuakute kae rawse cih.
4 Tetuh laephi akaw langte
bya na ho cih,
laenoi lungkhu te zyazyate
accaepaw na roi tuh yn ccae cih;
na roi tuh laephi lungkhu te
khozi roi hawte accae cih zah,
bya na hopaw tuh laenoi lungkhu te
5 Thuasalama na rhaw hae patae tuh
ditarawpaw vuiping hawte
athua cih hae zah,
rysawthah hae paw patae tuh
azoupaw vaekang hawte athua cih hae.
Te arangte, vaekheitmawte,
6 vaaw Bawipaw nynh kholung te
innry te myarya ccaepaw roi te thuasah,
khiccung te khise te arua cciamangpaw
maeesoi te thuasah na kalan yn thua cih.
7 Ariel khua a dou hae paw
minphuin patae balyn, Ariel khua te
Ariel khua e lungrua te
akoihkhawkuhpaw kha
a dou hae paw balyn, te Ariel khua kha
riathaenaw a pya hae paw balyn tuh
maan hawte athuapaw
khuazi kya-e vizin hawte athua cih hae.
8 Zion Mua a dou hae paw
minphuin hae patae tuh,
a vuelawpaw nynh a maan kya
a ae zemah he yn thaekuh tuh
a vuelaw mamin hawte thuasah,
a tuihawpaw nynh a maan kya
tui a nia zemah he yn thaekuh tuh
a tuihaw mamin hawte thuasah
9 Naemaw toulou kha ngaeesakuh oh lah,
ngaee ccaleih oh, naemaw toulou kha
nae mit mohsakuh oh lah,
nae mit tuh moh ccaleih sah!
Misutui nia leite rui ccaleih oh;
ruithyapaw atui nia leite
vyavya khuliaku tua oh!
10 Pawccecize Bawipaw nynh
nae i ae thuasah oh zah,
nae mit ae masisah vae oh, profeh hae,
nae piccan hae, beidin sazae hae kha
mih mit phang a hu vae hae.Ref 29.10: Rom 11.8
11 E vizin hae balyn hynh nanning hanlan tazeih khiapaw ccaw te nynh aloku. A riathyapaw kha pya lan zah, “E hynh riatua,” ci lanze, aning nynh, “Tazeih a khiaku keiccuze ka ria kho khyh,” a ci.
12 Te a riathya leipaw kha pya lan zah, “E hynh riatua,” ci lanze, aning nynh, “Ka ria kho khyh,” a ci.
13 Bawipaw nynh,
“E ccungccaw hae nynh mih khalang te
ka kalan naekuh hae zah,
mih munglae te saw oun tua hae,
mih thinlung tuh ka kyate asawkuh,
minmin nynh kae yn beiknaw hae paw tuh
ciakute a ccangku hae paw
ccungccaw kawbya kha nynh thua;Ref 29.13: Mat 15.8-9; Mar 7.6-7
14 tukeiccuze e ccungccaw hae kya
siiku lan umpaw te
ngaeangthua lan umpaw uccaw hae kha
bua ka rae cih.
Minmin kya-e a haw hae paw
hawnaw tuh aroh cih zah,
a nyhthya hae paw kya-e nythyanaw tuh
thuruh athua cih,” a ci.Ref 29.14: 1Ko 1.19
15 Akhupaw mih paccynkunaw kha
Bawipaw nynh nyh nan sah cite
thuruh hae zah
mohnaw kya ryalah hae paw,
“Hum nynh mou aening hynh oun muih cih?
Hum nynh mou oun nyh cih?” cite
a ho hae paw nanning hanlan
ngaethya lan kou um!
16 Nanning nynh uccaw hae kha
phe na buleih oh!
Ang a raetupaw kha
anglae lang ria lan accan zawtou?
Raepaw uccaw nynh amaw a raetupaw kha,
“Aning nynh kae yn rae khyh,” cite
a ho cih tou?
Tuhkhyhze, “Aning tuh hawnaw
hoi khyh,” cite a ho cih tou?
Malang hanlan NgaehoinawRef 29.16: Isa 45.9
17 Ccyh sosoh kya, Lebanon tuh
looh avoipaw loo lang tang lan khyh tou?
Looh avoipaw loo tuh
ramkaw lang tang lan khyh tou?
18 Tuin nin kya tuh mih nawpanpaw nynh
akuekuhpaw ccaw kya-e bya hae kha
a thae cih hae zah, ngaethyanaw te
mohnaw lungkhu a um hae paw
mitmoh hae nynh ngaw a muih cih hae.
19 Zakawsangsakuh hae paw tuh
Bawipaw kya lungtuanaw thawpaw
a mue cih hae zah,
ahobou huacce hae paw tuh
Israel Pachia Athyaapaw kya
mih lungpaw cih.
20 Pawccecize rysawthah hae paw
um vae lan khyh hae zah,
ccungccaw a sarya hae paw tuh
azo vae cih hae; hoyleinaw rae lan
mih lungzuapaw balyn tuh
maemih athua cih hae,
21 kaethekunaw kya phe shungsah cite
ccungccaw tungvaw rya a lahpaw,
byapianaw koikua kya hopiatu kha
kaang a syakhawtupaw,
adingpaw ccungccaw kha byading te
bya a piapah lei hae paw tuh
22 Tukeiccuze Abraham a shawkhawtupaw
Bawipaw nynh Jakob ciihan te
asekuh lante a hopaw tuh:
Jakob phin tuh a maethah vae lan khyh,
a maesue roh vae lan khyh.
23 Minmin nynh mih ccaaw hae te
ka ryalawnaw kha he a muih hae tuh,
ka min kha saw a tua cih hae;
Jakob Pachia Athyaapaw kha
saw a tua cih hae zah,
Israel Pachia kha a rih cih hae.
24 Mingaee hae nynh nythyanaw
a hoi cih hae zah,
bo a mang hae paw nynh
thuiheinaw kha a ngae ry cih hae.