24
Laephi vawlan Bawipaw Byapianaw
1 Bawipaw nynh laephi kha
a roh mamia cih zah
daetedae lan a nung cih,
a mia bungthung cih zah
ccungccaw hae kha phiariphiarae
a nung cih hae.
2 Tetuh ranpibawi tuh zapi hawte,
a bawipaw tuh a seepaw hawte,
a bawinung tuh a seenung hawte,
a zuatu tuh a retu hawte,
a hohsakuhtu tuh a hohtu hawte,
laebah a umsahtu tuh
laebah a umtu hawte athua cih.
3 Laephi tuh khaleih aroh cih zah
khaleih akoi cih;
pawccecize e bya hynh
Bawipaw nynh phe a ho vae.
4 Laephi tuh karae arou,
laephipi tuh a thawzya zah arou;
vaaw te lae tuh aroh hae.
5 Laephi tuh ccungccaw hae keiccuze
anungsikuh;
pawccecize minmin nynh
kawbya kha a ei hae,
phungbya kha zui khyh hae,
zungzae tynpaw a byakinnaw kha a ro hae.
6 Tukeiccuze thyalawnaw nynh
laephi kha po laang zah,
laephi ccungccaw hae tuh
mih cyiseinaw keiccuze a teing hae;
tukeiccuze laephi vawlan a um hae paw tuh
houhouh zyabung hae zah,
ccungccaw beihtaraw kyalya alae hae.
7 Misutui tuh rou zah,
misu ku tuh a thawzya,
mih lungtuanaw balyn tuh
ngaethyate a hawkhaekuh hae.
8 Tyng taraw hae roi tuh adae vae,
lungpawnaw roi mah adae vae,
tang-oi roi mah adae vae.
9 Hlawsah biate misutui kha
neih vae khyh hae;
ruithyapaw atui a neihthya hae paw hanlan
tuh-e atui tuh akhah vae.
10 Keisukeilae umpaw khuapi tuh aroh vae,
hum nynh sanmah
a tee kho khyh ccaw cite
inn miakaw kha a khaw hae.
11 Misutui a um khyh keiccuze
laanpi kya a sia a rua hae;
lungtuanaw balyn tuh azo vae;
laephi lungpawnaw tuh azo vae.
12 Khuapi tuh daetedae vae,
koikua hae kha phe roh lan a bua hae.
13 Laephi vawlan minphuin hae kya
tuhcite acyihkuh cih,
oliv ku kha hybia koute aku kya
a laehypaw athae hawte athua cih zah,
misu thae lo koute aku kya
a laehypaw athae hawte athua cih.
14 Tuh-e a laehy hae paw tuh
mih roi a saw cih hae zah,
lungtuanaw hlaw a sah cih hae;
Niccaw langte Bawipaw lesaenaw kha
a siakhae cih hae.
15 Nithua langkhe Bawipaw kha
phu-enaw a pya cih hae,
rili kin khe Bawipaw min,
Israel Pachia kha a thehoysah cih hae.
16 Adingpaw Pachia hanlan
phu-e thehoysahnaw hlaw
a sahpya hae paw kha,
laephi adianaw kyate kae thae.
Thuasalama ka hanlan
ngaehoinaw um khyh,
ngaehoinaw um khyh.
Myaryamaw ka ngaethah!
Pawccecize mih lungzi lei hae paw nynh
ming hae tungvaw mih lungzi khyh,
mih lungzi lei hae paw nynh
ming hae tungvaw papinmaw
17 Pou laephi ccungccaw hae,
nanning tuh ri lan umpaw,
hunghua te kaang kya nynh
na um vae oh!
18 Ri lan umpaw kyate
a ccuepaw miakaw tuh
hunghua lungkhu lang a ccah cih;
hunghua lungkhu te
a poupaw miakaw tuh
kaang a kae cih.
Pawccecize vaawlui thanlan-aw tuh
hung thua zah, laephi ccusy tuh ahy.
19 Laephi tuh pong koi zah,
laephi tuh zoihtatae lan akoi,
laephi tuh thawmawte ahy.
20 Laephi tuh samaw ruipaw hawte
vyavya khuliakuh zah,
bu taraw hawte hebung hethung a hekuh;
laephi tuh a seinaw nynh
rikalae lan phang ne zah,
a khuliakuh, bua thokuh vae lan khyh.
21 Tuin nin vae tuh
Bawipaw nynh vaaw hae kha
vaawram khe de a tah cih hae zah,
laephi siapharan hae kha
laephi vawlan khe de a tah cih hae.
22 Minmin tuh thongccah hae hawte,
hunghua lungkhu khe
pynkheihlan suelua athua cih hae;
minmin kha thong lungkhu khe
khawsung athua cih hae zah,
kum patae aro koute
detahnaw a ing cih hae.
23 Tetuh sawpaw tuh
a maesue aroh cih zah,
khuanin tuh a maethah cih;
pawccecize vaaw Bawipaw nynh
Zion Mua vawlan te
Jerusalem khua kyakhe a uk cih zah,
a phu-enaw tuh a piccan hae
malang khe a langsakuh cih.