HOSEA
Hosea
Profeh Hosea nynh phung a honaw hmin tuh thahlang Israel peenaw kya thua zah profeh Amos mawze, BC 721 kum Samaria aro maw vawsaw ccyh lya nynh thua. Aning nynh a ho huapaw bya tuh Israel hae nynh zohtuh a beik hae paw kong te Pachia tungvaw mih lungzi leinaw kong nynh thua. Tuh-e lungzi leinaw tuh Hosea nynh a lungzi leipaw nopi kha amaw a zu lang a umkhaepaw khate phe lokuh, a ci. A zu Gomer nynh a tungvaw a lungzi khyh hawte Pachia ccungccaw hae nynh Bawipaw kha a vua hae. E keiccuze Israel hae tuh byapianaw a ing cih hae. Tuhzemah nyathyakou kya atynpaw Pachia sungsahnaw tuh taetu athua cih zah a minphuin kha amaw kalan a kikhae cih zah, mih ccuepekunaw tuh langmaw hawte athuathui cih. Tuh-e sungsahnaw bya tuh 11.8 kya langsakuh zah, “Pou Israel, pawtemou nang kha milae kalan kae ap kho cih? Pawtemou kae vua kho cih?… Ka lungkhu kya ka thinlung tuh arulaekuh vae; nang ngaethya ae umsahpaw ka thinlung tuh nebaleih,” a ci. (11.8)
1
1 Judah siapharan Uzziah, Jotham, Ahaz te Hezekiah siapharan hae she lya te Israel siapharan Jeroboam, Joash ccapaw she lyakhe Beeri ccapaw Hosea kalan khe Bawipaw bya tuh yn thua.Ref 1.1: 2Si 14.23—15.7, 15.32—16.20, 18.1—20.21; 2Sh 26.1—27.8, 28.1—32.33
Hosea Innbyn
2 Bawipaw nynh Hosea kyate masaty bya he a ho te, Bawipaw nynh Hosea kha, “Cceih lah, ohhuanung kha zu lang dykute ohhuakunaw ccaaw hae kha saahku tua, pawccecize e ram nynh Bawipaw kha vua zah myarya lepaw ohhuakunaw kha a rae vae,” a cipya.
3 Tukeiccuze Hosea nynh cceih zah Diblaim ccanung Gomer kha zu lang a umkhae, te tuh-e nung nynh ccaawpoi zah ccapaw lu kheit a saahpya.
4 Te Bawipaw nynh Hosea kha, “Ccapaw kha Jezreel cite minphutua, pawccecize sosoh aro te Jezreel chiise keiccuze Jehu ciihan hae kha de ka tah cih hae, Israel hae peenaw kha ka thangsah cih.Ref 1.4: 2Si 10.11
5 Tuin nin kya Jezreel accya khe Israel li kha ka khyapah cih,” a ci.
6 Gomer nynh ccaaw bua poi zah ccanung kha a saah. Te Bawipaw nynh Hosea kha, “Ccanung kha Lo-ruhamah cite minphutua, pawccecize Israel hae kha ngaethya ka umsah vae lan khyh hae zah, ka ngaethya vae lan khyh hae.
7 Thuasalama Judah kha tuh ngaethya ka umsah cih zah Bawipaw mih Pachia liate ka khum cih hae; li, thaloi, rhawtuk, marang, marang rhawkaw hae khate ka khum lan khyh hae,” a cipya.
8 Gomer nynh a ccanung kha mateitui he a phia te, ccaawpoi zah ccapaw kha a saah.
9 Te Bawipaw nynh, “Ccapaw kha Lo-ammi cite minphutua, pawccecize nanning tuh ka ccungccaw hae na thua khyh oh zah kae tuh nae Pachia ka thua khyh,” a ci.
Israel kha Bua Dingsahnaw
10 Tuhzemah Israel hae tuh toutae leipaw te riatae leipaw rili laesia hawte athua cih hae; “Nanning tuh ka ccungccaw hae na thua khyh oh,” cite hopya athuanaw hae hmin kya mawkhe, “Ahiinpaw Pachia ccaaw hae,” cite hopya athua cih hae.Ref 1.10: Rom 9.26
11 Judah hae te Israel hae tuh pynkheihlan suelua athua cih hae zah, minmin nynh cciakhaetu lu kheit kha a pokuh cih hae; ram kha a ccou cih hae, Jezreel nin tuh alesae cih.