3
1 Shigionoth roi thyhte Profeh Habakkuh sawsangnaw.
Profeh Sawsangnaw
2 Pou Bawipaw ,
na minthaannaw kha ka thae vae,
Pou Bawipaw ,
na ryalawnaw kha
ka ngaeangthua.
Tuh-e ryalaw tuh kae she kyahin
bua thawsah thui tua lah,
kae she kyahin langsaku tua;
na thinria lyamawkhe
thawccinaw kha beih liathuitua.
3 Pachia tuh Teman kyate yn thua,
Athyaapaw Pachia tuh
Paran Mua kyate yn thua.
A phu-enaw nynh vaawlui kha
bong zah, laephi tuh
a thehoynaw te phe abeih.
4 A awnaw tuh khuanin hawte a aw;
a kuih kyate awnaw pou zah,
tuin kyakhe a thungnaw kha
thuruh athua.
5 A malang khe shethya tuh cceih zah,
a nulang anaekunaw khate
ccinaw nynh a zui.
6 Aning nynh thadyn zah
laephi tuh ahy;
aning nynh do hae zah
minphuin hae tuh a thyngkuh hae.
Zungzae tynpaw mua hae tuh a koi hae;
langmawlya a la ccianawpaw,
zungzae tynpaw
sangpyng hae tuh a tingbung hae.
7 Kushan kya-e bu hae nynh
vawsaw a teing hae paw te
Midian ram umpaw
bu hae kya-e zokhawboei hae nynh
a thyngku hae paw kha ka muih.
8 Pou Bawipaw , vawkhu hae kha
na thinrianua hae tou?
Na marang hae kha
na ccikuh hae zah, taenawpaw
na marangle hae kha
he na ccikuh hae te,
vawkhu hae kha na thinrianua hae tou?
Rili kha na thin-unua tou?
9 Na li kha mang lan
na nungdae zah, na the kha
kaw lan na nungdae vae.
Laephi kha vawkhu hae khate
thoh na phia.
10 Mua hae nynh nang kha
ae muih hae zah a thyngkuh hae.
Tui alepaw tuh alua hae;
akhupaw rili hae tuh sia hae zah,
khuanin nynh amaw
a kuih kha a hang;
11 myarya rangpaw
na the hae tuh aw hae zah,
phaephae akpaw na ccoi hae tuh
awrarih lan a um lya hae khe,
khuanin te sawpaw tuh
mih umnaw kya a thadyn hae.
12 Thin-ute laephi kya
na cceih zah, minphuin hae kha
thinriate na syde hae.
13 Na ccungccaw hae kha
khum khylan,
chitui na thuh hae paw kha
khum khylan nang tuh nae pou.
Ccungccaw hoylei hae paw
inn kya-e lu kha palae tui lan
na miade zah, aleihpaw kyate
innccukaly kyacia phe na zosah.
14 A rhawkaw hae cciakhaetupaw kha
amaw a the khate na thuingsah,
minmin tuh kaening kha
phiariphiarae nung khylan
khiccung hawte oun thua hae,
zya a rekuh hae paw ryachi hae kha
ae lan a paccynkuh hae paw hawte
mih lung atua.
15 Na marang hae khate
rili kha po he na zua tuh,
athungpaw tui tuh athyhleihkuh.
16 Tuh-e tuh he ka thae te
ka thyngkuh; tuh-e roi keiccuze
ka mung tuh athyngkuh.
Ka ru tuh muee zah,
ka ccu tuh athyngkuh.
Kaening oun tuk hae paw
ccungccaw hae tungvaw kya
yn thua lanpaw vawsaw nin kha
daebabi lan ka ngaw.
Vawsaw lya Lungpawnaw
17 Thaeku ku nynh
apaw paw khyh zah,
misu ku kya athae
a um khyh zemah thuasah,
oliv thing nynh athae thae khyh zah,
loo kyate looh
apou khyh zemah thuasah,
tuukhia kya tuu um khyh zah,
sahiin inn kya sahiin
a um khyh zemah thuasah
18 Bawipaw kya ka lungtua cih zah,
yn khumtu Pachia kya
ka lungpaw cih.
19 Bawipaw PACHIA tuh
ka thawzung nynh thua;Ref 3.19: 2Sa 22.34; Sam 18.33
ka ccu kha sazuh ccu hawte
a liazawsah zah,
ahangpaw vawlan khe yn cciasah.