HABAKKUK
Habakkuk
Profeh Habakkuh bya hynh Babilon hae nynh a uk lya hae, BC 600 athang dyn kya yn langkuhpaw nynh thua. Babilon hae nynh mih rysawthya keiccuze myarya a lungriathae zah Bawipaw kha, “Ccungccaw hoylei hae paw nynh mimaw laeze a dinghua hae paw kha a ro lya hae khe pawccemou yccae leite na um?” (1.13) a cipya. Bawipaw nynh a khungrupaw tuh, Bawipaw nynh accyh azaw te a cyih cih cite hopah zah, “miding hae tuh mih zynnaw liate a hiin hae,” (2.4) a ci.
E ccauh lungkhu umpaw tuhlaepaw tuh, a ding lei hae paw tungvaw kya ronaw a thua lanpaw hodaenaw, Pachia lesaenaw lungpawnaw hlaw te e ccauh zeitu nynh tynkaring lan Pachia a zynnaw kong nynh thua.
1
1 Profeh Habakkuh nynh a muihpaw vizin.
Profeh nynh Byakhianaw
2 Pou Bawipaw , hohseciamou
bawmnaw mue khylan ka sia cih zah,
ngaepya leite nae um cih?
Hohseciamou na kalan khe,
“Puathote yn cyi hae!” cite
ka sia cih zah,
khum leite nae um cih?
3 Pawccemou hoyleinaw hynh
nae tungsah zah,
vawsawnaw hynh
phang na do huataw?
Ronaw te puathonaw tuh
ka malang phang a um;
pekumaekunaw te
eikunaw tuh a um.
4 Kawbya tuh a thawzya zah,
byading nynh kharouh
tae vae khyh.
Hoyleinaw nynh miding hae kha
a koihlu hae—
tukeiccuze byapianaw tuh
5 Minphuin hae khuh
dotua oh lah, muihtua oh!
Nae ngaeangthua sah!
Nae khuaruaru sah!
Pawccecize nanning kha
ae hopya oh zemah,
na zyn lei lan oh paw
ryalaw ccangkheit kha
nae she kya ka cyi vae.Ref 1.15: Isa 52.7
6 A rysawthah zah
a thindynpaw Khaldi hae kha
ka tuhou cih hae,
mimaw kya-e athua leipaw
ram kha luade khylan,
laephi pynpi po lekuh lan
a cceih hae.Ref 1.6: 2Si 24.2
7 Minmin tuh ri lan te
siiku lan myarya um hae;
mimaw kaw te kyalya
bya a pia hae.
8 Mih marang hae tuh
kaesing laeze mih thyranghua,
zete riryngmoh kya
a khiavuikuhpaw suizaw laeze
ri lan umhua hae;
mih marang hae tuh a thohkuh hae.
Mih marang rhawkaw hae tuh
asawnaw langte oun cceih hae;
aepaw a zounuapaw
mosipi hawte oun zou hae.
9 Mih balynte puathote
tae khylan oun cceih hae,
mih mae kha malang khe
tahrarin lan a hawi hae;
minmin nynh a kyng hae paw kha
suelua hae zah laesia zeih acih hae.
10 Siapharan hae kha sarya hae zah,
uktu hae kha ccyasahnaw lang a mang hae.
Rhawlungrua miakaw kha
a nuinse hae,
laephi dohsakute tuk
hae zah a law hae.
11 Tetuh khisan hawte
zaw hae zah azo hae;
minmin tuh mesei hae zah
aseipaw lang a tang hae,
mih thungnaw tuh
12 Pou Bawipaw ka Pachia,
A thyaapaw ka Pachia,
nang tuh langmawlya te
phe na um vae khaw?
Nang tuh na chih lan khyh.
Pou Bawipaw , minmin kha
byapiatu lang na nung vae hae;
Pou Lungpi, kaening detah khylan
minmin kha na khang vae hae.
13 Na mit tuh myaryamaw thyaa zah
ahoy leipaw kha na do khyh,
ahoy leipaw cyisahnaw kha na do khyh;
tuhte athua ze, pawccemou
mih lungzi lei hae paw kha
do kyalya te na do hae zah,
ccungccaw hoylei hae paw nynh
mimaw laeze a dinghua hae paw kha
a laang lya hae khe
pawccemou yccae leite na um?
14 Ccungccaw hae kha
rili kya-e ngasaw hae hawte na rae hae zah,
uktu a hoi lei hae paw,
avawthyapaw ripaw hae hawte na rae hae.
15 Rhaw nynh minmin kha
ngasabaw te pong a baw hae;
a miabu te rawkhaw hae zah
a suebia hae,
a paih te bong hae zah a suelua hae,
tukeiccuze a lungtua zah
a lungpawkhaekuh.
16 Tukeiccuze a miabu kalan khe
silawnaw rae zah,
a paih kalan khe pyapaw uccaw kha a pya;
pawccecize tuh-e hae liate
a ccoupaw uccaw tuh
myarya lung zah, looh patae a hoi.
17 Te aning nynh a thaloi kha
a mang zungzae cih zah,
minphuin hae kha thawcci leite
a roh cih hae tou?