HEBRU HAE
KALAN CCAKY
Hebrews
Hebru hae kalan Ccaky hynh doukunaw houh lung zah Khriccaaw zynnaw oun poutaw sei hae zya ci keiccuze kypaw nynh thua. Jesu Khri tuh byaccing te Pachia kya-e nyathya phykunawpaw nynh thua cipaw langsakunaw liate masaty e mih zynnaw kha ccawzeitu nynh thaw a pyanaw hae paw nynh thua. Tuhcite a honaw kya byaccing ccangthum a langsaku:
(1) Jesu tuh zungzaete Pachia Ccapaw thua zah teingnaw kha a taeningnaw liate Paaw kaw a ngae ccaccingpaw nynh thua. Jesu tuh Pachia Ccapaw athua thyhawte Byakin Ryn kya-e profeh hae, vaaw hae te Moses laeze mah ahang huapaw nynh thua. (2) Jesu tuh Byakin Ryn kya-e silawtu hae laeze mah zungzae silawtu lante Pachia nynh a phy vae. (3) Jesu liate zyntu tuh seinaw, rinaw te chinaw kyate khum athua; Jesu tuh Silawtu Lupi athua hawte khumnaw ccaccing a pyatu nynh thua; Hebru beiknaw phunglang te sarangpaw silawkunaw hae nynh khumnaw kha a muinsan muihsahnaw kyalya a la langsaku hae.
Byaria 11 lungkhu Israel hae phungpaw kya-e minthaan hae paw zynnaw tousenaw kha lawte ccawzeitu nynh a ccawriatu hae kha mih zynnaw kya atyn nawlan hae a tuhou hae. Byaria 12 kya a ccawriatu hae kha athangnaw cia zynnaw kya tyn oh lah, pawcih runaw te vawsawnaw oun thua zemah Jesu kha do oh cite a tuhou hae. Tuanaw pyanaw te raeringnaw pyanaw te ccauh kha a thangsah.
1
Ccapaw kyate Oun Hopya
1 Langmaw lyaze profeh hae kyate ah minpaaw hae kya aphuinphuin te avae patae bya a hopaw Pachia nynh,
2 hynh-e nyathyakou ccyh kya tuh a Ccapaw kyate nynh aening kha bya oun hopya vae. Tuh-e Ccapaw tuh pawpaw balyn rhoccoutu lang khang zah, amaw liate vaaw te lae hynh mah a rae.
3 Tuh-e Ccapaw tuh Pachia phu-enaw awnawpaw te Pachia thuanaw muinsan langsakunawpaw nynh thua. Athungpaw a bya liate pawpaw balyn kha po a tynsah. Aening seinaw hae kha amaw ccaccei nynh he oun thyaasahpah koute ahangnaw kya Lesaenaw ranglang khe a dahung vae.
Vaaw hae laeze Ccapaw Lesaehua
4 Vaaw hae laeze houh ahoy huaccepaw min kha a ccou keiccuze Ccapaw tuh vaaw hae laeze patae alesaehua.
5 Pawccecize,
“Nang tuh ka Ccapaw nynh na thua,
atunin nang kha
kae saahku vae,”
cite thuasah,
“Kae tuh a Paaw ka thua cih zah,
aning tuh ka Ccapaw athua cih,”
cite thuasah vaaw hae kha Pachia nynh hummou a hopya boi?Ref 1.5: Sam 2.7; 2 Sam 7.14; 1 Chr 17.13
6 Te ccatawccaw kha laephi kalan he yn thuakhae te,
“Pachia vaaw hae balyn nynh
amaw kha beik hae sah,” a ci.Ref 1.6: Deu 32.43 (LXX)
7 Pachia nynh vaaw hae konglang kha,
“Pachia nynh a vaaw hae kha
khivae lang rae zah
a ryalahtu hae kha
maeesoi lang a rae,” a ci.Ref 1.7: Sam 104.4 (LXX)
8 Thuasalama Ccapaw konglang tuh,
“Pou Pachia, na bawitungkhung tuh
zungzae te zungzae cia
atynpaw nynh thua.
Adingpaw ukkunaw tuh
na peenaw ukkunaw nynh thua.Ref 1.8-9: Sam 45.6-7
9 Dingnaw kha na sungsah zah
hoyleinaw kha na hua;
Tukeiccuze pou Pachia,
na Pachia nynh na ruiban hae laeze
ae hangthung zah
lungtuanaw chitui ae thuh vae,” a ci.
10 Tukoute, “Pou Bawipaw,
athotakaw kya laephi kha
na bing, te vaawlang hae tuh
na kuih te na raepaw nynh thua.Ref 1.10-12: Sam 102.25-27 (LXX)
11 Minmin tuh aroh cih hae,
thuasalama nang tuh
na tyn zungzae;
boeining nynh apue hawte
tuh-e hae tuh apue cih hae;
12 minmin kha boeining
zung kheit hawte na bi cih hae zah
minmin tuh a rulaekuh cih hae.
Thuasalama nang tuh
na rulaekuh khyh zah
na hiinnaw tuh
thang boi lan khyh,” a ci.
13 Thuasalama, “Na rhaw hae kha na ccusy lang kae raepya makhia tuh, ka ranglang khe dahung,” cite vaaw hae kha hummou a hopya boi?Ref 1.13: Sam 110.1
14 Minmin balyn tuh khumnaw rho a ccou vae cih hae paw kha ryalawpya khylan sawpaw ryalawpahtu muisaw hae thua khyh hae tou?