37
Josef te A Uno hae
1 Jakob tuh a paaw nynh ramccang ccungccaw hawte a la umnaw Kanaan ram kyakhe a um.
2 E tuh Jakob a innbyn phungpaw nynh thua. Josef nynh kum haw lae sari he cih tuh, a upaw hae ryte tuu hae te miaa hae kha leih a rin hae; a paaw zu hae Bilhah te Zilpah mih ccapaw hae kha leih a bawm hae. Josef nynh a upaw hae hoyleinaw kong kha mih paaw kya leih a hopya.
3 Israel nynh Josef kha phe a taw vae te a saahpaw ccapaw athua keiccuze ccangpaw a ccaaw hae laeze a sungsahua; te aning nynh apyaapaw angkiccuapaw kha a raepya.
4 Mih paaw nynh Josef kha a upaw hae balyn laeze a sungsahua cipaw a upaw hae nynh he a nyh hae tuh, Josef kha hua hae zah hoyte byabeih ry vae khyh hae.
5 Vaekheit tuh Josef nynh maansah zah a maan kha a upaw hae kya he a hopah hae tuh minmin nynh amaw kha houh a hua vae hae.
6 Josef nynh minmin kha, “E ka maan hynh ngaetua oh.
7 Aening nynh loo kya loohku acce kha ah la tung oh. Ka loohku acce nynh vaekheit mawte la thokuh zah lawbabin lan a la thadyn; oute nae loohku acce hae nynh ka loohku acce kha la koihlu hae zah bakhungte a la beik hae,” a ci.
8 A upaw hae nynh, “Nang nynh kaening kya siapharan lang nae tang cih tou? Nang nynh kaening kha nae uk cih tou?” a cipya hae. Tukeiccuze a maan te a bya keiccuze amaw kha houh a hua vae hae.
9 Josef nynh ccangpaw maan kha bua sah zah a upaw hae kyakhe, “Ngaetua oh, ccangpaw maan kha bua ka sah vae: khuanin, sawpaw te awsi haw lae kheit nynh ka malang bakhungte yn la beik hae,” a ci.
10 A maan kha a paaw te a upaw hae kya he a ho tuh a paaw nynh amaw kha pe zah, “Pawcihawpaw maan mou na sah? Kaening, kamaw, na nung te na upaw hae nynh na kalan kae cceih cih zah na malang khe laekhu kya kae bakhung cih tou?” a cipya.
11 A upaw hae nynh Josef tungvaw mih eiung, thuasalama a paaw nynh tuh-e tuh a thinlung kya palei a tua.Ref 37.11: Loc 7.9
Uno hae nynh Josef Zuanaw
12 Josef a upaw hae tuh mih paaw kya-e tuuphu kha Shekhem kya rin lan a cceih hae.
13 Te Israel nynh Josef kha, “Na upaw hae tuh Shekhem kya tuuphu kha a rin hae khaw? Oun cceih, minmin kalan kae saw cih,” cipah zah Josef nynh, “Phang ka paccynkuh,” a cipya.
14 A paaw nynh Josef kha, “La cceih lah na upaw hae te tuu hae kha ngedante a um hae tou cipaw la dotua hae lah, kamaw kha nae thaesah cih,” a cipya. Tuhcite a paaw nynh Hebron accya kyate a saw. Josef nynh Shekhem kya a thua tuh,
15 ccungccapaw lu kheit nynh loo kya a khiakuhpaw Josef kha muih zah, “Pawmou na ccung?” cite a khia.
16 Josef nynh, “Ka upaw hae nynh ka ccung hae, tuuphu kha teimou a rin hae cipaw beih yn hopah,” a ci.
17 Ccungccapaw nynh, “Phe cceih vae cih hae, pawccecize, ‘Dothan lang cceih oh sih,’ cite a hokuh hae paw kha ka thae,” a cipya. Tukeiccuze Josef nynh a upaw hae nulangte cceih zah minmin kha Dothan khe a muih hae.
18 A upaw hae nynh asawnaw kyate Josef kha a muih hae, mih pe a thua mawkhe amaw kha chia lan cite a paccynku hae.
19 Minmin nynh mimaw te mimaw kha, “Maansahtupaw hein kya yn thua vae.
20 Rang oh, amaw kha theih oh sih lah, hunghua ccangkheit lungkhu lang vua oh sih; oute sarepaw nynh phe tei cite ho lan, te a maan hae kha pawlangmah yn tang cipaw dotua lan,” a ciku hae.
21 Thuasalama Reuben nynh he thae tuh, “Amaw kha theih nan oh sih,” cipah hae zah mih kuih kyate Josef kha a luesah.
22 Tukoute Reuben nynh minmin kha, “A chii luasah nan oh, e ramkaw umpaw hunghua lungkhu lang vua oh, kuih hangnua nan oh,” a cipya hae. Amaw kha mih kuih kyate ka luesah cih zah apang kya bua ka thuakhae sah cite a tuaku.
23 Josef nynh a upaw hae kya he a thua tuh, minmin nynh apyaapaw angkiccuapaw, a kikupaw kha a khah hae;
24 te amaw kha lah hae zah hunghua lungkhu lang a vua hae. Hunghua lungkhu kya pawpaw mah um khyh, tui mah um khyh.
25 Oute ae lan cite a dahung hae; te he do hae tuh Gilead ram kyate oun cceih hae paw Ishmael ccungccaw khuaccong hae paw phu kheit kha a muih hae. Tuh-e hae nynh amynkhuhpaw ehang kya thungpaw, amynkhuhpaw thuhkuhpaw te therih angro aphuinphuin kha mih kalauh phusah hae zah Izip ram lang oun ccia hae paw kha a muih hae.
26 Oute Judah nynh a uno hae kha, “Ah neitaw tuh ah theih cih oh zah phe ah pheikuh oh zeso pawmou athane?
27 Rang oh, amaw kha Ishmael hae kalan zua oh sih, amaw tungvaw ah kuih hang nan oh sih, pawccecize aning tuh ah neitaw thua zah ah chiisaw nynh thua,” a ci. Te a uno hae nynh mih nawccaw.
28 Te Midian kungku hae he la thua hae tuh, Josef kha hunghua lungkhu te poh thuaa hae zah Ishmael minphuin hae kya ngunphua kia kuin lang a zua hae. Te minmin nynh Josef kha Izip ram lang a cciakhae hae.Ref 37.28: Loc 7.9
29 Reuben nynh yn ki zah Josef kha hunghua lungkhu he a muih khyh tuh a ngaethah zah a boeining kha a seiiku.
30 A uno hae kalan yn ki zah, “Imuapaw um vae khyh, teilangmou ka cceih vae cih,” a ci.
31 Oute minmin nynh Josef angki kha a law hae, miaa kha theih hae zah miaa chii kyakhe Josef angki kha a dung hae.
32 Minmin nynh apyaapaw angkiccuapaw kha mih paaw kalan cciakhae hae zah, “Kaening nynh e angki hynh kae muih, na ccapaw angki athua thua khyh cipaw dotua,” a cipya hae.
33 Aning nynh tuh-e angki tuh syntaw zah, “E hynh ka ccapaw angki nynh thua! Sarepaw nynh amaw kha phe a tei vae; Josef kha zoihtatyh lan pong a pae vae cipaw phe aria vae,” a ci.
34 Oute Jakob nynh a ngaethya keiccuze a boeining kha seii zah buriboei kha a tae kya a voiku; te a ccapaw hanlan khaw cia rawkhuite a um.
35 A ccapaw hae balyn te a ccanung hae balyn nynh mih paaw kha lungtangnaw bya a hopya hae; thuasalama mih paaw nynh a lungtangsakuh kho khyh zah, “Ka ccapaw umnaw michi khua lang rawkhuite ka cceih cih,” a cipya hae. Tuhcite a paaw tuh aning hanlan rawkhuite a um.
36 Te Midian hae nynh Josef kha Izip ram umpaw Faro siapharan kya-e bawi lu kheit a thuapaw Potifar kalan a zua hae; aning tuh siapharan do-oihtu hae kyaze bawi nynh thua.