27
Isak nynh Jakob Hythua Pya
1 Isak tuh taw vae zah a mitmoh keiccuze ngawmuih kho vae khyh. A ccatawccaw Esau kha, “Ka ccapaw,” cite ko zah Esau nynh, “Hein kya mang ka um,” a ci.
2 Isak nynh, “Ka taw vae zah ka chih cih nin kha ka nyh khyh.
3 Tukeiccuze na zunghe hae, na the te na li kha lawkuh lah ramkaw lang sawde lan la cceih lah saw yn kawpya tua.
4 Ka chi maw hythua kae pya ccaw, leih ka rythyapaw, kou thuapaw looh kha yn paccynpah lah, ka ae lan yn pyatua,” a cipya.
5 Isak nynh a ccapaw Esau a hopyapaw kha Rebekah nynh zya a la ngae. Tukeiccuze Esau nynh sawkaw lan zah thuakhae lan cite ramkaw lang a ccia lyakhe,
6 Rebekah nynh a ccapaw Jakob kha, “Na paaw nynh na upaw Esau kyakhe,
7 ‘Ka chi maw Bawipaw malang nang kha hythua kae pya ccaw, saw yn kaw lah kou thuapaw looh kha ka ae lan yn paccynpah,’ cite a hopyapaw kha phe ka thae.
8 Tukeiccuze ka ccapaw, kaw kae pyapaw ka bya thyhte cyitua.
9 Na paaw nynh leih a rythya hawte, kou thuapaw looh kha na paaw elang ka paccynpya ccaw, miaa phu kalan la cceih lah miaa taraw sa ning kha yn po lah yn thuakhae;
10 a chi maw hythua ae pya ccaw, tuh-e looh tuh na paaw a ae lan na cciakhae cih,” a cipya.
11 Thuasalama Jakob nynh a nung Rebekah kha, “Ka upaw Esau tuh a mingrungpaw thua zah kae tuh ngesaw anaepaw nynh ka thua.
12 Ka paaw nynh poh yn haetua zetuh, yn lingpaw nynh thua cite yn tua cih zah ka tungvaw hythuapya leite thya yn lawsei cih,” a cipya.
13 A nung nynh, “Ka ccapaw, na tungvaw thyalawnaw ccaw lan accan lanze, ka tungvaw ccah vae sah, ka bya kha ngaete cceih lah miaa taraw hae kha yn thuakhae,” a cipya.
14 Tukeiccuze aning nynh cceih zah miaa taraw hae kha a nung kalan a thuakhae; te a nung nynh kou thuapaw looh kha a paaw nynh leih a ry hawte a paccynpya.
15 Oute Rebekah nynh a ccatawccaw Esau kya-e innvaw umpaw boeining ahoy huaccepaw kha lah zah a ccasoi Jakob kha a lawsaku;
16 te miaa taraw phua kha a ccapaw kuih kya te a ming um leinaw a nging kyakhe a voipya.
17 Oute a paccynpaw kou thuapaw looh te sanlou kha a ccapaw Jakob kha a pya.
18 Te Jakob nynh a paaw kalan cceih zah, “Apang,” cite ko zah a paaw nynh, “Hein kya mang ka um, ka ccapaw, nang tuh hummou na thua?” a ci.
19 Jakob nynh a paaw kha, “Na ccatawccaw Esau nynh ka thua. Nae hopya hawte phe kae cyi vae; thokuh lah dahungtua, hythua nae pya ccaw, saw kae kawpyapaw hynh aetua ccavae,” a cipya.
20 Thuasalama Isak nynh a ccapaw kha, “Ka ccapaw, hynhcih arang lante nae thuakhaepaw hynh pawtemou athua?” cite khia zah Jakob nynh, “Bawipaw na Pachia nynh ka laan ka sui yn uasahpya keiccu nynh thua,” a cipya.
21 Oute Isak nynh Jakob kha, “Ka ccapaw, nang hynh ka ccapaw Esau na thuate na thua khyh kha ny nawlan haetua kae ry zah ka kalan yn naeku tua,” a ci.
22 Tukeiccuze Jakob nynh a paaw Isak kalan naekuh zah a paaw nynh haetua zah, “Roi tuh Jakob roi nynh thua, thuasalama kuih tuh Esau kuih nynh thua,” a ci.
23 A kuih tuh a upaw Esau kuih hawte a mingrung keiccuze a paaw nynh syntaw khyh zah hythua a pya.
24 A paaw nynh, “Nang hynh ka ccapaw Esau na thua ccaccing tou?” cite bua khia zah, “Ka thua,” a cipya.
25 Oute a paaw nynh, “Saw tuh yn cciakhae tua, tuh-e tuh ka ae cih zah hythua kae pya cih,” a cipya. Tukeiccuze Jakob nynh saw kha cciakhae zah a paaw nynh a ae; te misutui kha cciakhae zah a paaw nynh a nia.
26 Oute a paaw Isak nynh Jakob kha, “Ka ccapaw, yn naekuh lah yn myngtua,” a cipya.
27 Tukeiccuze Jakob nynh naekuh zah a paaw kha a myng; te Isak nynh a boeining myng kha thae zah Jakob kha hythua a pya, te a paaw nynh,
“Ka ccapaw myng tuh
Bawipaw nynh hythuapyapaw
loram myng te nynh a loku.Ref 27.27-29: Heb 11.20
28 Pachia nynh vaawlang e
vuiraw kha thuasah,
laephi kya-e lae hoy kha thuasah,
looh patae te misutui patae kha
thuasah ae pya vae sah.
29 Ccungccaw hae nynh
na rya ae lawpah hae sah lah,
minphuin hae nynh na malang
bakhung hae sah.
Na uno hae kya bawi lang tang lah,
na nung ccapaw hae nynh
na malang bakhung hae sah.
Nang kha thya ae lawpaw miakaw tuh
thyalaw thua sah lah,
nang kha hythua ae pyapaw miakaw tuh
hythuapya thua sah,” a ci.Ref 27.29: Gen 12.3
Esau tuh Hythuanaw A Shung
30 Isak nynh Jakob hanlan hythuapyapaw he a thangsah te, Jakob tuh a paaw Isak kyate zya he a pou lyakhe, a upaw Esau tuh sawdenaw kyate yn thua vae.
31 Esau nynh mah kou thuapaw looh kha paccynpah zah a paaw kalan a ccyngpya. Te a paaw kha, “Apang, hythua nae pya ccaw, na ccapaw nynh kae kawpyapaw saw hynh ae lan thokuh lah dahungtua,” a cipya.
32 A paaw Isak nynh, “Hummou na thua?” cite khia zah, Esau nynh, “Na ccatawccaw Esau nynh ka thua,” a ci.
33 Oute Isak nynh phe thyngku biate, “Saw yn kaw zah yn pyapaw kha hummou athua? Nang nae thua maw, saw kha pong ka ae zah hythua phe ka pya kou vae, aning tuh hythua ccoupaw athua ccaccing vae cih,” a ci.
34 Esau nynh a paaw bya he a thae tuh myarya accae lante thawte rah zah a paaw kha, “Apang, kae mah hythua yn pyabua,” a cipya.
35 Thuasalama a paaw nynh, “Na neitaw nynh yn ling zah na hythuanaw kha phe a lawku vae,” a cipya.
36 Esau nynh, “Amaw kha Jakob cite minphu a la thuapaw tuh a min te phe angaekuhpaw khaw a la thua? Pawccecize vae ning yn ling vae. Aning nynh ccatawccaw thuanaw kha phe yn lawpahku zah, atu ka hythuanaw kha bua a lawku vae. Kamaw hanlan hythuanaw ccangkheit san nae hangpah vae khyh tou?” a ci.Ref 27.36: Gen 25.29-34
37 Isak nynh Esau kha, “Amaw kha na bawipaw lang phe ka la rae vae, te a uno hae balyn tuh a see hae lang phe ka pya vae hae, looh te misutui kha amaw phe ka pya vae. Ka ccapaw, na hanlan pawmou kae cyipah kho vae cih?” a ci.
38 Esau nynh a paaw kha, “Apang, hythuanaw tuh ccangkheit rou tou na hoi? Apang, kae mah hythua yn pyabua,” a cipya. Te Esau tuh accae lante thawte a rah.Ref 27.38: Heb 12.17
39 Oute a paaw Isak nynh khung zah,
“Dotua, na umnaw kyakhe
lae hoy um lan khyh zah,
ahangnaw vaawlang e
vuiraw mah um lan khyh.Ref 27.39-40: Heb 11.20
40 Na thaloi te na ryakuh cih,Ref 27.40: Gen 36.8; 2Si 8.20
te na neitaw kha rya na lawpah cih;
thuasalama he na douru te
na nging kya-e a taphu kha
na khyapah cih,” a cipya.
Esau Thinrianaw kyate Jakob A Ccue
41 A paaw nynh Jakob a pyapaw hythuanaw keiccuze Esau nynh Jakob kha hua zah a thinlung kya, “Ka paaw hanlan rawkhuinaw nin tuh anae vae; oute ka neitaw Jakob kha ka theih cih,” cite a tuaku.
42 Te a ccatawccaw Esau bya kha Rebekah nynh a thae tuh, a ccasoi Jakob kha ko zah, “Na upaw Esau nynh a lungdae nawlan nang kha chia lan a paccynku.
43 Tukeiccuze ka ccapaw, ka bya hynh ngaetua; Haran khua umpaw ka raeepaw Laban kalan la ccue,
44 na upaw a thinrianaw phe ahoy cia Laban kya sohsoh la um,
45 na upaw nynh na hanlan a lungdae zah a tungvaw na la cyipaw kha phe a ning cia la um; oute ccungccaw kae saw cih zah kae hoeisah cih hae. Nin kheit lungkhu nanning lu ning kha parouhte pawccemou ka shung lanpaw tuh?” a ci.
46 Oute Rebekah nynh Isak kha, “Hit nopi hae nynh ka hiinnaw kya eih yn khin vae hae. Jakob nynh e ram e ccungccaw hae tahawpaw Hit nopi kha zu lang a dy zetuh ka hiinnaw hynh pawmou a thane ung cih?” a ci.