4
1 Ka ho rypaw tuh hynhte nynh thua: rhoccoutu tuh uccaw balyn kha a hoitupaw mang athua zemah, imua athua lungkhu balyn tuh see te alaenaw um khyh.
2 A paaw nynh a khyapaw ccyh azaw mawlaezung tuh do-oihtu hae te rintu hae kuihkaw nynh a um ung.
3 Tuhawte aening mah imua ah thua lya oh tuh laephi a uktu muisaw hae see nynh ah thua oh.
4 Thuasalama accyh ccingnaw he yn thua te, nopinung vue kya poisah zah Kawbya zakaw yn puisahpaw a Ccapaw kha Pachia nynh yn saw.
5 Tuh-e tuh Kawbya zakaw um hae paw kha shawkhaw khylan nynh thua; tuhteze nynh aening tuh ccaaw lang tang khylan ccaaw thuanaw kha ah mue cih oh.Ref 4.5-7: Rom 8.15-17
6 Nanning tuh ccaaw hae na thua oh keiccuze, “Abba! Ka Paaw!” cite a kopaw a Ccapaw kya-e Muisaw kha aening thinlung kalan Pachia nynh a saw vae.
7 Tukeiccuze nang tuh see na thua vae khyh, ccaaw nynh na thua vae, ccaaw na thua vae ze Pachia liate rhoccoutu nynh na thua vae.
Galati hae hanlan Paul Thinphangnaw
8 Langmawlya, nanning nynh Pachia na la nyh khyh oh, tukeiccuze Pachia athua leipaw pachia hae kha aphungpaw lante see lang na tangpya oh.
9 Thuasalama atu tuh Pachia kha na ny vae oh, tuhkhyhze mah Pachia nynh phe ae ny vae oh; pawccemou a thawzya zah anyaapaw muisaw hae kalan bua na ki ry oh? Pawccemou tuh-e hae see lang bua na tang ry oh?
10 Nanning nynh abyapi huapaw nin hae, saw hae, kumvaelori hae te kum hae kha na sung oh.
11 Nae hanlan rya ka lawpaw hynh alakaw lan tangsei zya cite ka thinphang.
12 Uteno hae, kae tuh nanning hawte ka thua keiccuze kae hawte thuabua oh cite kae ngia oh; nanning nynh ka tungvaw kya na cyisei oh paw um khyh.
13 Ka pynsaw acci keiccuze nae kalan thehoypaw masaty ka ho cipaw kha na ny oh.
14 Ka pynsaw ccinaw tuh nae hanlan uccaw ripaw athua zemah kae kha pawlangria leite nae um khyh oh zah doih mah nae doih khyh oh; thuasalama Pachia vaawpaw hawte thuasah, Jesu Khri hawte thuasah nae lehkhan oh.
15 Na ccou oh paw hoynaw tuh pawlangmou a tang vae? Pawccecize athua kho ze nae mit kha heize khoikute pya lan nae ry oh cite nanning konglang ccaekia ka khan.
16 Atu kae nynh byaccing kae hopya oh keiccuze kae tuh nae rhawpaw lang tou ka tang?
17 Ming hae nynh nanning ae lungmung oh paw tuh ahoypaw eenaw te thua khyh; nanning nynh minmin kha lungmung khylan ka kyate phia lan ae ry oh pawte nynh thua.
18 Nae kya ka um lya kyalya thua leite accyh takyh kya ahoypaw eenaw te lungmungpaw tuh ahoypaw nynh thua.
19 Ka ccaaw taraw hae, Khri kha nae lungkhu kya um zah atyn mawlaezung ccaaw a pui dyn e neitangia ccinaw hawte bua kae teingpya oh,
20 atu nanning ryte umkheih lan ka ry zah ka byaho rulaeku lan ka ry, pawccecize nanning konglang ka lungriathae.
Hakar te Sarah Tousenaw
21 Kawbya zakaw a um ry hae paw nanning, yn hopya tua oh. Kawbya kha na ngae lan khyh oh tou?
22 Pawccecize Abraham nynh ccapaw lu ning a hoi, lu kheit tuh seenung ccaaw thua zah, lu kheit tuh a luenung nopinung ccaaw nynh thua cite Ccathyaa kya azeikuh.Ref 4.22: Gen 16.15, 21.2
23 Seenung ccaaw tuh pynsaw lante a puipaw nynh thua, thuasalama a luenung nopinung ccaaw tuh byakinpyakupaw liate a puipaw nynh thua.
24 Hynh-e hae kong hynh tousenawpaw nynh thua: hynh-e nopi hae lu ning tuh byakin ccangning nynh thua; Hakar athuapaw byakin ccangkheit tuh Sinai mua kyate yn thua zah a ccaaw hae kha see lang a saah hae.
25 Hakar tuh Arabia ram kya umpaw Sinai mua nynh thua, aning tuh a ccaaw hae ryte seetangnaw kya a um hae keiccuze atu a umpaw Jerusalem te nynh aloku.
26 Thuasalama ccangpaw nopinung tuh vaawlang umpaw Jerusalem nynh thua; aning tuh a luepaw nopi thua zah aening nung nynh thua.
27 Pawccecize Ccathyaa kyaze,
“Ccaaw a saah leinung,
a tiinnung nang, na lungtua sah;
neitangia a teing leinung nang,
roisaw lah siatua;
pawccecize a lanmenung
nopinung ccaaw hae tuh
vawpaw a hoinung
nopinung ccaaw hae laeze
a lunghua hae,”
cite azeikuh.Ref 4.27: Isa 54.1
28 Uteno hae, atu nanning tuh Isak hawte byakinpyakupaw kya-e ccaaw hae nynh na thua oh.
29 Thuasalama pynsaw lante a puipaw ccaaw nynh Muisaw liate a puipaw ccaaw kha a tuaa a sah hawte, atu mah tuhawte nynh athua.Ref 4.29: Gen 21.9
30 Thuasalama Ccathyaa nynh paw a ci mou? “Seenung te a ccapaw kha po dee hae; pawccecize seenung a ccapaw tuh a luenung nopinung ccapaw ryte rhoccoukheih lan khyh hae,” a ci.Ref 4.30: Gen 21.10
31 Tukeiccuze uteno hae, aening tuh seenung ccaaw hae ah thua khyh oh, a luenung nopinung ccaaw hae nynh ah thua oh.