2
Paul te Ccangpaw Locceihtu hae
1 Kum haw lae pali aro koute kae tuh Titu kha ka hoeibua zah Barnabas ryte Jerusalem lang bua kae cceihthung.Ref 2.1: Loc 11.30, 15.2
2 E hynh byaphy thyhte ka cciathungpaw nynh thua. Te ka cyi cciamangpaw te ka la cyi vae paw kha alakaw lan a tang khyh nawlan, Zenta hae laku ka hopaw thehoypaw kha minhoy ccoupaw cciakhaetu hae kyakhe ka makhaete ka hopya hae.
3 Thuasalama kamaw te kae umkheihpaw Titu tuh Grikpaw athua zemah vingdungawku lan nangse thua khyh.
4 Khri Jesu liate kae muepaw luenaw kha dophi lan zah kaening kha see lang tangsah lan hae cite aruh lante oun tee hae paw ahme leipaw zyntu hae keiccu nynh tuhte a cyi hae.
5 Ahmepaw thehoypaw tuh nae kya zungzae atyn ccaw cite kaening nynh ahme leipaw zyntu hae kalan sosoh sanmah kae apkuh khyh.
6 Minhoy ccoupaw cciakhaetu hae tuh pawcihawpaw ccungccaw athua hae zemah ka hanlan alaenaw um khyh. Pachia tuh ccungccaw maedo khyh, tuh-e cciakhaetu hae nynh kae kha pawsang yn biapah chih khyh hae.Ref 2.6: Deu 10.17
7 Thuasalama vingdungawkuh hae paw kalan thehoypaw ho lan Peter kha a pya hawte, vingdungawkuh lei hae paw kalan thehoypaw ho lan kae kha yn pya cipaw kha minmin nynh a ny hae,
8 (pawccecize vingdungawkuh hae paw hanlan Peter kha mangte locceihtu rya a lahtupaw nynh Zenta hae kalan kae kha sawte yn mang zah rya a lah kalang)
9 Tungpi hawte a tua hae paw James, Peter te Johan nynh ka muepaw thawccinaw kha he a nyh hae te, vaeccawkunaw langsaku nawlan kae te Barnabas kha ranglang kuih oun pya hae zah kae kuih oun kyng hae; mimaw tuh vingdungawkuh hae paw kalan ccia lan zah kaening tuh Zenta hae kalan cciasah lan mih nawccah.
10 Minmin nynh oun ngia hae paw ccangkheit tuh, kaening nynh ryachi hae kae ning lei lanpaw kha thua zah, tuh-e tuh kae nynh mah lungthote ka cyi rypaw nynh thua.
Antiok kya Paul nynh Peter A Pe
11 Thuasalama Antiok khua lang Peter he yn thua tuh, a tungvaw ccae lanpaw a um keiccuze mitmae hawiliakute ka pe.
12 Pawccecize James kyate ccungccaw abang oun thua maw hae tuh, Peter tuh Zenta hae ryte leih a aekheih hae; thuasalama minmin he oun thua hae tuh, Peter tuh vingdungawkuh hae paw raw a ri keiccuze nulang sihkuh zah Zenta hae kyate a phiakuh.
13 Ccangpaw Judah hae mah Peter hawte a thyaruhbua hae; tuh-e mih thyaruhnaw nynh Barnabas kha heize a cciaseisah bua.
14 Minmin tuh ahmepaw thehoypaw thyhte hmerarih lan hiin khyh hae cipaw he ka muih tuh, mih balyn malang khe Peter kha, “Nang tuh Judah paw mang na thua pite Judah hae hawte hiin leite Zenta hae hawte na hiin ze, pawtemou Zenta hae tuh Judah hae hawte hiin lan na nangse kho cih hae?” ka cipya.
Zynnaw liate Khumnaw
15 Aening tuh thokeinaw lante Judah hae ah thua oh zah Zenta misei hae ah thua khyh oh.
16 Ccungccaw tuh Kawbya cyisahnaw liate thua leite, Jesu Khri zynnaw liate nynh thyaaccouku cipaw ah ny oh. Kawbya cyisahnaw liate thua leite Khri zynnaw liate thyaaccou khylan aening nynh Jesu Khri kha phe ah zyn vae oh, pawccecize Kawbya cyisahnaw liate hum sanmah thyaaccou kho thua lan khyh.Ref 2.16: Sam 143.2; Rom 3.20, 22
17 Thuasalama aening nynh Khri liate thyaaccou khylan ah zuaku cciamang lya oh khe, ahmaw te ahmaw kha misei hae cite ah muihku oh lanze, Khri tuh seinaw ryalahtu tou athua? Tuhte thua khyh!
18 Pawccecize phe ka ro vae paw uccaw kha bua ka sakthui lanze, misei ka thuanaw kha phe ka langsaku vae.
19 Pawccecize Pachia hanlan ka hiin kho nawlan, kae tuh Kawbya liate tuh-e Kawbya kyakhe ka chih vae. Kae tuh Khri ryte vaelantung kya khiade ka thua vae;
20 tukeiccuze a hiinpaw tuh kamaw thua leite ka lungkhu kya a hiinpaw Khri nynh thua. Atu pynsaw kya ka hiinpaw hiinnaw tuh kae yn sungsah zah ka hanlan amaw te amaw a pyakuhpaw Pachia Ccapaw zynnaw liate nynh ka hiin.
21 Pachia thawccinaw kha ka vua khyh; pawccecize thyaaccounaw tuh Kawbya liate athua lanze, Khri tuh alakaw lan nynh a chihan vae.