9
1 Oute Bawipaw nynh Moses kha, “Faro kalan la cceih lah, ‘Hebru hae Pachia Bawipaw nynh hynhte a ho: Ka ccungccaw hae nynh kae kha oun beik ccaw hae, minmin tuh cceih hae sah.
2 Minmin cciasah lanpaw kha na ei zah phang na kyng hae zetuh,
3 Bawipaw kuih nynh loo kya umpaw nae sahiin-awvaw hae: marang hae, lann hae, kalauh hae, vaetua hae, tuu hae te miaa hae kyakhe myarya lepaw ccinaw kha a thuasah cih.
4 Thuasalama Bawipaw nynh Israel hae sahiin-awvaw hae te Izip hae sahiin-awvaw hae kha a laesah cih zah Israel hae nynh a hoi hae paw balyn tuh sa kheit sanmah chih lan khyh,’ cite la hopah,” a cipya.
5 Bawipaw nynh accyh kha khya zah, “E uccaw hynh Izip ram kya awkhualan a cyih vae cih,” a cipya.
6 Te Bawipaw nynh awkhualan khe a ho hawte a cyi vae; Izip hae kya-e sahiin-awvaw balyn tuh pong a chih hae, thuasalama Israel hae kya-e sahiin-awvaw tuh sa kheit sanmah chih khyh.
7 Faro nynh acyihkuhpaw kha khia hae zah Israel hae kya-e sahiin-awvaw tuh sa kheit sanmah chih khyh cipaw a ny. Thuasalama Faro tuh a lungkhung zah Israel hae kha cciasah lae khyh hae.
8 Oute Bawipaw nynh Moses te Aaron kha, “Moses nynh takua kya-e buhhaw kha kuihphe kheit khate lah sah lah, Faro a muihnaw khivae kyakhe vuasah.
9 Tuh-e buhhaw tuh Izip ram balyn kya laenoi lang a tang cih zah Izip ram balyn kya ccungccaw hae te sarangpaw hae kyakhe balyh kha a thuakhae cih,” a ci.
10 Tukeiccuze minmin nynh takua kya-e buhhaw kha lah hae zah Faro malang a thadyn hae, te Moses nynh buhhaw kha khivae kya vua zah ccungccaw hae te sarangpaw hae kyakhe balyh kha a thuakhae vae.Ref 9.10: Bya 16.2
11 Mitleihthya hae paw tuh mih balyh keiccuze Moses malang thadyn kho khyh hae, pawccecize minmin kha mah ccangpaw Izip hae balyn hawte balyh nynh a thuanua bua hae.
12 Thuasalama Bawipaw nynh Faro tuh a lungkhung sah zah Bawipaw nynh Moses a la hopya hawte minmin bya kha ngaelae khyh.
13 Oute Bawipaw nynh Moses kha, “Awkhua takaw te tho lah Faro malang khe na thadyn cih zah, ‘Hebru hae Pachia Bawipaw nynh hynhte a ho: Ka ccungccaw hae nynh kae kha oun beik ccaw hae, minmin tuh cceih hae sah.
14 Laephi pynpi kya kamaw yn lopaw lu kheit sanmah um khyh cipaw na ny nawlan, atu tuh ka kya-e shethya balyn kha na tungvaw, na ryalahtu bawi hae tungvaw, na ccungccaw hae tungvaw kya ka thuasah cih.
15 Ka kuih kha ka dyng cih zah nang te na ccungccaw hae kha shethya ccinaw te de ka tah cih hae, nang kha laephi kyate phe kae zosah cih.
16 Thuasalama ka huhan kha nang muihsah khylan te laephi pynpi kya ka minthaan sah khylan nang kha kae hiinsah.Ref 9.16: Rom 9.17
17 Ka ccungccaw hae kha rawsete namaw te namaw kha palei na hangsakuh zah minmin kha na cciasah khyh hae.
18 Awkhualan atu ccyh khe Izip ram a um takaw te atu cia Izip ram kya accah boi leipaw myarya lepaw hya kha ka ccawsah cih.
19 Tukeiccuze loo kya na hoipaw na sahiin-awvaw te atyn-are kha akhynnaw hmin lang saw hae; rekunaw bu kya um leite loo kya umpaw sarangpaw te ccungccaw miakaw tuh hya nynh a ccawphu cih hae zah a chih cih hae,’ cite la hopah,” a cipya.
20 Bawipaw bya a rihpaw Faro a ryalahtu bawi hae nynh mih see hae te mih sahiin-awvaw kha akhynnaw hmin kalan arangte a cciasah hae.
21 Bawipaw bya kha pawlangria lei hae paw tuh mih see hae te mih sahiin-awvaw kha loo kya a nungsya hae.
22 Bawipaw nynh Moses kha, “Izip ram balyn kya thuasah, Izip ram umpaw ccungccaw hae te sarangpaw hae kya thuasah, loo kya umpaw aku hae balyn kya thuasah hya accaw ccaw, na kuih kha vaawlang khe dyngtua,” a cipya.
23 Moses nynh a hoitang kha vaawlang khe a hangthung, te Bawipaw nynh kholungthyhsah zah hya kha a ccawsah, te maee tuh laephi vawlan a ccah. Te Bawipaw nynh Izip ram kya hya kha khuaa lang a rawsah;
24 hya te maee tuh pykuh zah apaekuh lei lan thawmawte accah, tuhcihawpaw hya tuh Izip ram a um takaw te Izip ram balyn kya ccah boi khyh.Ref 9.24: Bya 8.7, 16.21
25 Izip ram balyn e loo kya umpaw atyn-are, ccungccaw te sahiin-awvaw kha hya nynh a deih hae; loo kya-e aku hae balyn kha mah deih hae zah loo kya umpaw thingku miakaw tuh pong a khya.
26 Israel hae nynh a umnaw hae Goshen ram kya rou nynh hya ccah khyh.
27 Oute Faro nynh Moses te Aaron kha kosah hae zah, “Atu tuh phe ka sei vae; Bawipaw tuh ding zah kae te ka ccungccaw hae tuh kae mesei vae.
28 Bawipaw kalan sawsang oh! Pachia kya-e kholung te hya nynh phe yn zawsah vae! Nanning kha kae cciasah vae cih oh; po na um vae lan khyh oh,” a cipya hae.
29 Moses nynh Faro kha, “Khuapi kyate he ka toikuh takaw te, ka kuih kha Bawipaw kalan ka dyng cih. Laephi tuh Bawipaw kya-e nynh thua cipaw na ny nawlan kholung tuh adae cih zah hya mah um vae lan khyh.
30 Thuasalama nang te na ryalahtu bawi hae tuh Bawipaw kha na rih loh khyh oh cipaw phe ka ny,” a cipya.
31 Buri ku te barli ku tuh phe aroh vae, pawccecize barli thae tuh voi vae zah buri ku tuh apaw ccyh lya nynh thua.
32 Thuasalama ccathae te phawvoi tuh roh khyh, pawccecize hynh-e hae tuh nyathya nynh a po hae.
33 Moses nynh Faro kyate toikuh zah khuapi atolang khe a cceih, te a kuih kha Bawipaw kalan a dyng; oute kholung te hya tuh dae hae zah laephi vawlan khuaarah vae khyh.
34 Thuasalama Faro nynh khua, hya, te kholung tuh phe dae vae cipaw he a nyh tuh, bua sei zah a ryalahtu bawi hae ryte lungkhungte a um hae.
35 Tuhcite Faro tuh a lungkhung zah, Bawipaw nynh Moses kyate a la ho vae hawte Israel hae kha cciasah lae khyh hae.