30
Zimuin hanlan Silawhang
(Exo 37.25-28)
1 Zimuin kha maee te u nawlan silawhang ccangkheit na rae cih; tuh-e tuh eri thing te na rae cih.
2 Tuh-e silawhang tuh dong kheit a sae cih zah dong kheit ako cih; akopaw te a saepaw alokuh cih zah dong ning ahang cih; aki hae tuh apyn te akyngkuh cih hae.
3 Adungparyh kha thuasah, po voilu lante pang hae kha thuasah, te a ki hae kha thuasah sui ccipaw te na thei cih; te po voilu lan arae kha sui te na mia cih.
4 Te silawhang hanlan sui bawtary ccangning kha na rae cih; tuh-e hae tuh ahawiliakuh hae paw sui te ccaankuhpaw apaki hae kaw khe na rae cih, te tuh-e hae tuh silawhang puihnawpaw ccong hae kha ruh nawlan nynh thua.
5 Eri thing te puihnawpaw ccong hae kha na rae cih zah sui te na thei cih.
6 Tuh-e silawhang kha byakin thingkua luki umpaw zokhawpaw boei malang khe na nung cih, e hmin hynh nanning kae tungkunaw oh hmin athua cih.
7 Aaron nynh maeekhua hae kha awkhua takyh a paccyn vae ze, zimuin kha tuh-e ccaboi vawlan tuin maee te a u cih,
8 te Aaron nynh zete ccyh kya zemah maeekhua hae kha a aw vae ze, silawhang vawlan khe zimuin kha a u cih. E zimuin pyanaw hynh Bawipaw malang nae she takyh kya na rae cih oh.
9 E silawhang vawlan hin athyaa leipaw zimuin kha thuasah, maee-ute silawnaw kha thuasah, ccathae silawnaw kha thuasah na rae lan khyh; niapaw silawnawpaw kha mah e silawhang vawlan na bu lan khyh.
10 Aaron nynh aki hae vawlan khe seingaethyanaw silawnaw kha kum kheit vaekheit a rae cih. Aaron nynh seingaethyanaw elang seishawnaw silawnawpaw sahiin chii khate kum kheit vaekheit e silawhang hanlan seingaethyanaw kha a rae cih, nae she takyh kya, hynh-e hynh na rae cih oh. Tuh-e tuh Bawipaw hanlan athyaa huaccepaw nynh thua.
Hminthyaa hanlan Phua
11 Bawipaw nynh Moses kha hynhte a hopya:
12 Israel hae kha milu he na ria hae te, minmin nynh shethya a tung khyh ccaw hae cite, mih hiinnaw shawkhaw mee kha Bawipaw kalan mih balynte a pya cih hae.
13 Milu ria a thuapaw lu kheit cci nynh a pya lanpaw tuh: beikinnthyaa kya-e shekel thyhte shekel ngawmuh kha Bawipaw kalan pyapaw lante a pya cih (shekel ccangkheit tuh kerah ccangkuin nynh thua).Ref 30.13: Exo 38.25-26; Mat 17.24
14 Milu rianaw kya a umpaw kum kuin te palung lang, lu kheit cci nynh Bawipaw kalan pyapaw kha a pya cih.
15 Nae hiinnaw hanlan Bawipaw kalan seingaethyanaw mee he na pya vae oh ze, a hoipaw nynh shekel ccangkheit laeze alunghua lante pya lan khyh zah a ryachipaw nynh mah azyahua lante pya lan khyh.
16 Israel hae kyate seingaethyanaw mee phua kha na lah cih zah tungkunaw bu kya ryalawnaw hanlan na mang cih; tuh-e phua tuh Bawipaw malang, nae hiinnaw shawkhawnawpaw hanlan pyapaw nynh thua cipaw ae nysah oh paw a thua cih.
Sohin Pakepi
17 Bawipaw nynh Moses kha hynhte a hopya:
18 Kuihccu singku nawlan accu mah sohin te raepaw sohin pakepi kha na rae cih. Tuh-e tuh tungkunaw bu te silawhang laku khe na nung cih zah a lungkhu khe tui na ccae cih;Ref 30.18: Exo 38.8
19 tuh-e tui khate Aaron te a ccapaw hae nynh mih kuih te mih ccu kha a singkuh cih hae.
20 Minmin nynh Bawipaw kalan maee te silawnaw kha rae khylan tungkunaw bu lungkhu lang a tee hae ze thuasah, ryalaw khylan silawhang pe lang a naeku hae ze thuasah, a chi khyh nawlan hae, tui te a singkuh cih hae.
21 A chi khyh nawlan hae, mih kuih te mih ccu kha a singkuh cih hae: tuh-e tuh Aaron te a ciihan hae hanlan mih she takyh kya zungzae tynpaw phungzae a thua cih.
Thuhkupaw Chitui te Zimuin
22 Bawipaw nynh Moses kha hynhte a hopya:Ref 30.22-38: Exo 37.29
23 Ahoy huaccepaw amynkhuh hae paw: muratui shekel za pangaw, amynkhuhpaw sinnamon thing angankuh, tuh-e tuh shekel za ning sung pangaw, amynkhuhpaw ccazung za ning sung pangaw,
24 beikinnthyaa kya-e shekel te toupaw kassia za pangaw, te oliv chitui hin kheit;
25 Mynkhuhpaw a raetu nynh a rae hawte e thuhkupaw chitui hae kha na pyde cih hae zah na rae cih; tuh-e tuh athyaapaw thuhkupaw chitui a thua cih.
26 tuh-e chitui khate tungkunaw bu te byakin thingkua,
27 lungphae te a uccaw hae balyn, maeekhuatung te a uccaw hae, zimuin unawpaw silawhang,
28 maee-ute silawnawpaw silawhang te a uccaw hae balyn, te pakepi te tuh-e a ccu kha na thuh cih hae;
29 tuh-e uccaw hae tuh athyaa huaccepaw uccaw lang a tang nawlan, na thyaasah cih hae; e uccaw hae te a tungkuhpaw miakaw tuh athyaapaw lang a tang cih.
30 Aaron te a ccapaw hae kha chitui na thuh cih hae, te minmin nynh ranpibawi hae lante ka rya kha a law ccaw hae minmin kha na thyaasah cih hae.
31 Israel hae kha, “E chitui tuh nae she takyh kya kamaw kya-e athyaapaw thuhkupaw chitui a thua cih.
32 Pyn kya huataw thuhkupaw lante na mang lan khyh oh, te hynh-e te alokuhpaw ccangpaw chitui kha pydete na rae lan khyh oh; e chitui tuh athyaapaw thua zah nae hanlan athyaapaw athua cih.
33 E chitui te alokuh lante a raepaw humhung zemah thuasah, thuh lan accan leipaw ccungccaw kha a thuhpaw humhung zemah thuasah a minphuin kyate vua a thua cih,” cite na hopah cih hae a cipya.
34 Bawipaw nynh Moses kha hynhte a hopya: Mynkhuhpaw hae stakte, onikha, galbunum te athyaapaw frankinsen kha phe angankuh lante lah hae.
35 te zimuin a raetu nynh a raede hawte zimuin kha raetua. Loi kha na phing cih, accipaw te athyaapaw zimuin a thua cih;
36 abang kha akhuipaw lang na phung cih zah abang kha nang te kae ah tungkuh cihnaw, tungkunaw bu kya umpaw byakin thingkua malang khe na nung cih; e zimuin tuh nae hanlan athyaa huaccepaw a thua cih.
37 E zimuin rae hawhynhte namaw hanlan zimuin kha na rae lan khyh; e zimuin tuh Bawipaw hanlan athyaapaw cite na tua cih.
38 E zimuin te alokuh lante amaw mang khylan a raekuhpaw humhung zemah a minphuin kyate vua a thua cih.