27
Maee-ute Silawnawpaw Silawhang
(Exo 38.1-7)
1 Dong pangaw sae zah dong pangaw akopaw silawhang kha eri thing te na rae cih; silawhang tuh akopaw te asaepaw alokuh cih zah dong thum ahang cih.
2 Beikhang apaki san pali kyakhe aki hae kha na rae cih hae; aki hae tuh silawhang te ccangkheit lante a beedekuh cih hae zah sohin te na theithin cih.
3 A buhhaw nungnawpaw ang, buhhaw luanawpaw pakepi, pakephepaw, ccungthy te maee-e nungnawpaw pake kha na rae cih; silawhang te asekuhpaw angphe hae balyn kha sohin te na rae cih.
4 Beikhang hanlan sohin te raepaw pasaryh ccangkheit kha na rae cih; tuh-e pasaryh kha hang nawlan apaki san pali kyakhe sohin bawtary ccangpali kha na rae cih.
5 Pasaryh tuh silawhang angaelung kya a um ccaw cite silawhang arae zakaw khe na nung cih.
6 Eri thing kha silawhang puihnawpaw ccong lang na rae cih zah, sohin te na theithin cih,
7 te puihnawpaw hae kha bawtary lungkhu lang na ruh cih, tuhteze nynh silawhang kha he a puihkuhte, tuh-e puihnawpaw hae tuh silawhang voi te, rang te a um cih hae.
8 Beikhang tuh alungkhu kya akhupaw kua a um lante thingphe te na rae cih. Mua vawlan muihsah na thua hawkhate tuh-e hae tuh na rae cih hae.
Voidu te A Uccaw hae
(Exo 38.9-20)
9 Beikbu voidu kha na rae cih. Tuh-e voidu alia langkhe dong za kheit sae zah kou hoy lan akuakuhpaw, nebaleihpaw boei kha na zo cih.
10 Tuh-e boei kya-e tung ccangkuin te mih ccusy ccangkuin tuh sohin te raepaw athua cih hae, thuasalama tung kya umpaw bawnawpaw hae te tungccaw hae tuh ngun te raepaw athua cih hae.
11 Tuhawte tuh-e voidu tuh palung langte dong za kheit asae cih, mih tung tungkuin te mih ccusy ccangkuin tuh sohin te raepaw athua cih hae, thuasalama tung kya-e bawnawpaw hae te tungccaw hae tuh ngun te raepaw athua cih hae.
12 Voidu tuh niccaw lang te dong sung pangaw ako cih zah, tung tunghaw te ccusy ccanghaw a um cih.
13 Nithua lang te voidu a malang tuh dong sung pangaw ako cih.
14 Voikheit langkhe dong haw lae pangaw asaepaw boei te tung tungthum, ccusy ccangthum a um cih.
15 Ccangpaw voikheit langkhe dong haw lae pangaw asaepaw boei te tung tungthum, ccusy ccangthum a um cih.
16 Voidu kya-e sakoih kyakhe meizong, sephaphuhpaw, asepaw law, nebaleihpaw laaw te kuakuhpaw boei dong kuin asaepaw a um cih; phynbang te kou puithya lan ccaan athuapaw tuh-e boei tuh tung tungpali te ccusy ccangpali a hoi cih.
17 Voidu kha po akoihlupaw tung balyn tuh ngun te theipaw accaw te piade athua cih; bawnawpaw hae kha ngun te rae a thua cih hae zah ccusy hae kha sohin te rae a thua cih hae.
18 Voidu tuh asaepaw dong za kheit, akopaw dong sung pangaw, te ahangpaw dong pangaw athua cih zah nebaleihpaw laaw te akuakuhpaw boei athua cih, accusy tuh sohin athua cih.
19 Beikbu kya mangpaw uccaw balyn, beikbu kya-e ccong balyn te voidu kya-e ccong balyn tuh sohin athua cih.
Maeekhua Do-oihnaw
(Lev 24.1-4)
20 Maeekhua tyty a rua ccaw cite, maee aw nawlan oliv thae aphongkuhpaw chitui athyaapaw kha kamaw kalan oun thuakhae oh cite Israel hae kha kaw na pya cih hae.
21 Tungkunaw bu kyaze byakin thingkua malang umpaw zokhawpaw boei atolang khe Aaron te a ccapaw hae nynh tuh-e maeekhua kha zete te awkhua cia Bawipaw malang a aw cih hae. Tuh-e tuh Israel hae nynh mih she takyh kya a zui lan hae paw zungzae tynpaw phungzae athua cih.