23
1 Ahme leipaw thongpang kha na pazaesakuh lan khyh. Ahme leipaw ccaekia lang tangpya te a seipaw kha la bawm nan.Ref 23.1: Exo 20.16; Lev 19.11-12; Deu 5.20
2 Ahme leipaw raenaw kya ccungccaw alunghua kha na zui lan khyh; byapianaw kya ccaekia na khanku ze, dingnaw a khawtupaw ccungccaw alung huapaw kalan na pan lan khyh.
3 Byapianaw kya a ryachipaw cite na pankhae lan khyh.Ref 23.3: Lev 19.15
4 Na rhawpaw kya-e tangnuapaw khyhze lann nynh laanpi a mesei ze, bua na kikhaepah cih.Ref 23.4-5: Deu 22.1-4
5 Nang ae huapaw kya-e lann tuh a phupaw nynh phang a nepaw kha na muih ze, cciataw nan, a thoku kho nawlan na bawm cih.
6 A kaethekunaw hae kyaze a ryachipaw kha ahme lei lante bya na pia lan khyh.Ref 23.6-8: Lev 19.15; Deu 16.19
7 Ahme leipaw seibenaw kha rae nan, seinaw a hoi leipaw te a dingpaw kha theih nan, pawccecize seinaw a raetupaw kha a seinaw kyate ka luesah lan khyh.
8 Pyaruh kha lawkuh nan, pawccecize pyaruh nynh bawi hae mit kha a mohsah, te ahmepaw kya um hae paw kha a ro hae.
9 Ramccang ccungccaw kha na tuaasah lan khyh; pawccecize nanning tuh Izip ram kya ramccang hae lang na tang vae oh keiccuze ramccang ccungccaw thinlung kha na ny oh.Ref 23.9: Exo 22.21; Lev 19.33-34; Deu 24.17-18, 27.19
10 Kum taruh lungkhu nae loo kya looh na ccou cih oh zah, apoupaw athae kha na suelua cih oh;Ref 23.10-11: Lev 25.1-7
11 thuasalama kum sarinaw kum kya loo kha na haeungsah cih oh zah, ccou leite na nung cih oh. Tetuh aryachipaw nae ccungccaw hae nynh a ae cih hae; te a cciataw hae paw kha ramsaw hae nynh a ae cih hae. Tuhawte nae misu khokhu te oliv khokhu kha mah tuhcite na cyih cih oh.
12 Nin taruh lungkhu na ryalaw kha na lah cih, thuasalama nin sarinaw nin kya na haeung cih, tuhteze tuh na tangnuapaw te na lann nynh haeungnaw a mue cih hae zah, na inn kya a puipaw see te ramccang ccungccaw mah mih thaw bua athua cih.Ref 23.12: Exo 20.9-11, 31.15, 34.21, 35.2; Lev 23.3; Deu 5.13-14
13 Kae hopyapaw balyn hynh na syntawkuh cih. Ccangpaw pachia hae min kha na ko lan khyh; na mung kya-e bya kha tuh-e pachia hae nynh thae nan hae sah.
Kum Takyh Tuapaw Poi hae
(Exo 34.18-26; Deu 16.1-17)
14 Kamaw hanlan kum kheit ze vae thum poi na tua cih oh.
15 Ransi phingkuh leipaw sanlou poi kha na tua cih oh; kaw kae pya oh thyhte, Abib sawpaw lungkhu kya khyapyapaw nin sari lungkhu ransi phingkuh leipaw sanlou kha na ae cih oh, pawccecize tuh-e sawpaw kya Izip ram kyate na pou oh.
Humhung mah kuih ccakaete kamaw malang yn langkuh lan khyh.Ref 23.15: Exo 12.14-20; Lev 23.6-8; Nam 28.17-25
16 Loo kya na ccou oh paw, nae ryalaw kya-e thaety na rue ccyh oh khe Loohrue poi kha na tua cih oh.Ref 23.16: Lev 23.15-21, 39-43; Nam 28.26-31 Nae ryalaw kya-e athae kha loo kyate he na suelua oh te, kum athangnote2.22 kum thang: cipaw hynh October saw angaelung loukaw nynh thua. ccyh kyakhe Looh Ccakhung poi kha na tua cih oh.
17 Nanning laku e pise balyn tuh kum kheit ze vae thum Bawipaw PACHIA malang na langkuh cih oh.
18 Si nae lawnaw oh paw a chii kha ransi phingkuhpaw ccangkhakheit te pydete nae pya lan khyh oh, ka poi kya si nae lawnaw oh paw atho kha awkhua ccyh cia na laesah lan khyh oh.
19 Nae laephi kya masaty a thaepaw thae kya-e na po oh paw kha Bawipaw nae Pachia inn lungkhu lang na thuakhae cih oh.Ref 23.19: Exo 34.26; Deu 14.21, 26.2
Tuu taraw kha a pi mateitui te na thungde lan khyh.
Kanaan Ram Taenaw
20 Nang kha kae paccynpyapaw hmin lang cciakhae khylan te nang kha laanpi kya rin khylan na malang khe vaawpaw lu kheit kha kae sawpah cih.
21 Amaw kha sawtua lah a bya kha ngae; amaw kha dou nan, pawccecize ka min tuh amaw kya a um keiccuze na seimenaw kha ae ngaethya lan khyh.
22 Thuasalama a bya kha hoyte na ngae zah ka hopaw balyn kha na cyi zetuh, kae tuh na rhaw hae hanlan rhaw ka thua cih zah, ae doutu hae kha a doutu ka thua cih.
23 Ka vaawpaw nynh na malang cceih zah Amor hae, Hit hae, Periz hae, Kanaan hae, Hiv hae te Jebus hae kalan he ae cciakhae te, minmin kha ka roh cih hae,
24 mih pachia hae kya na bakhung lan khyh, na beik lan khyh zah a cyi hae paw kha na cyihbua lan khyh, minmin kha pong na roh cih hae zah mih tungpi hae kha phe zoih lan na khya cih hae.
25 Bawipaw na Pachia kha na beik cih zah na sanlou te na tui kha hythua kae pya cih; na lungkhu kyate ccinaw kha kae lawpah cih.
26 Na ram kya a ccaaw rohpaw te a tinpaw um lan khyh; na she kae saesah cih.
27 Kamaw rinawpaw kha na malang khe ka saw cih zah rawsete na ccianua hae paw ccungccaw balyn kha mih lung ka muasah cih, te na rhaw hae balyn kha mih nulang ka kisah cih hae.
28 Ccinaw kha na malang khe ka saw cih, tuh-e ccinaw nynh Hiv hae, Kanaan hae te Hit hae kha na malang kyate a dee cih hae.
29 Minmin kha na malang khate kum kheit lungkhu ka dee lan khyh hae, tuhkhyhze tuh ram kya ccungccaw adae cih zah nang te arawsekuh lante ramsaw hae tuh a pungthungsei cih hae.
30 Nang nynh na pungzae zah ram kha na pee mawlaezung, minmin kha na malang khate beihtararaw te ka dee cih hae.
31 Na ramri tuh Rili Se kyate Filistin Rili cia, laesia ram kyate Zufrates Vaw cia athua cih; pawccecize tuin ram kya um hae paw kha na kuih kya kae pya cih zah na malang khate na dee cih hae.
32 Minmin te thuasah, mih pachia hae te thuasah byakinnaw na rae lan khyh.
33 minmin nynh na ram kya um lan khyh hae, tuhkhyhze tuh nang kha ka tungvaw seinaw ae raesahsei cih hae; pawccecize mih pachia hae kha na beik zetuh, tuh-e tuh namaw hanlan kaang a thua ccaccing cih.