18
Jethro kya-e Tuanaw Pyapaw
1 Bawipaw nynh Israel hae kha Izip ram kyate pawtemou a poukhae hae cipaw te Pachia nynh Moses te a ccungccaw Israel hae hanlan a cyipya hae paw balyn kha Midian ranpibawi, Moses a pupaw Jethro nynh a thae.
2 Tukeiccuze Moses nynh a pupaw Jethro kalan a la saw hae paw a zu Zipporah teRef 18.2-3: Exo 2.21-22
3 a ccaaw hae lu ning kha Jethro nynh hoei hae zah a kikhae hae. A ccapaw lu kheit min tuh Gershom a cikuh (pawccecize Moses nynh, “Ramccang kya mikhiapaw nynh ka thua,” a ci),Ref 18.3: Loc 7.29
4 ccangpaw lu kheit min tuh Eliezer a cikuh (pawccecize Moses nynh, “Ka paaw a Pachia tuh yn bawmpaw thua zah Faro thaloi kyate yn luesah,” a ci).
5 Moses a pupaw Jethro tuh Moses a ccapaw hae te a zu kha yn cciakhae hae zah Moses nynh a ryanaw Pachia mua, laesia ram langkhe yn thua.
6 Jethro nynh Moses kha, “Na pupaw Jethro kae tuh na zu te na ccaaw hae lu ning ryte namaw kalan kae cceih cciamang,” cite bya a taw.
7 Moses tuh a pupaw kha tungku khylan a pou; bakhung zah a pupaw kha a myng; mih ngedannaw kong kha lu kheit te lu kheit khiakuh hae zah bu lungkhu lang a tee hae.
8 Oute Bawipaw nynh Israel hae hanlan Faro te Izip hae tungvaw a la cyipaw balyn kha thuasah, laanryng kya a tung hae paw vawsawnaw balyn kha thuasah, Bawipaw nynh pawtemou a luesah hae cipaw kha thuasah, Moses nynh a pupaw kha a hopya.
9 Bawipaw nynh Israel hae kha Izip ram kyate a luesah lya hae ze, Israel hae hanlan a la raepaw hoynaw balyn hanlan Jethro tuh a lungtua.
10 Jethro nynh, “Nang kha Izip hae kyate thuasah, Faro kyate thuasah, ae luesahtu Bawipaw tungvaw thehoynaw um sah.
11 Bawipaw tuh pachia hae balyn laeze alehua cipaw atu ka ny vae, pawccecize Izip hae nynh Israel hae tungvaw dothatheihte he cyih hae tuh, Bawipaw nynh ccungccaw hae kha Izip hae kyate a luesah hae,” a ci.
12 Te Moses a pupaw Jethro nynh maee-ute silawnawpaw te silawnawpaw hae kha Pachia kalan a thuakhae; te Aaron te Israel piccan hae balyn tuh Moses a pupaw ryte Pachia malang sanlou ae khylan oun thua hae.
13 Awkhualan khe ccungccaw hae tuh awkhua te zete cia Moses pe a thadyn lya hae khe, Moses tuh ccungccaw hae hanlan byapiatu lante a dahung.
14 Moses nynh ccungccaw hae hanlan a cyipya hae paw balyn kha a pupaw nynh he a muih tuh, “Ccungccaw hae hanlan pawmou palei na cyipya hae? Ccungccaw balyn tuh na pepan khe awkhua te zete cia thadyn hae zah pawcce na makhaete na dahung?” a cipya.
15 Moses nynh a pupaw kha, “Ccungccaw hae nynh Pachia rynaw kha ny khylan ka kalan oun ccia hae keiccu nynh thua.
16 Minmin nynh bya a lung hae ze, ka kalan oun cceih hae zah minmin lu kheit te lu kheit laku bya ka pia hae, Pachia kya-e upadi te ccangpyanaw kha ka nysah hae,” a cipya.
17 Moses a pupaw nynh Moses kha, “Na cyipaw hynh hoy khyh.
18 Namaw te namaw kya umpaw ccungccaw hae tuh eih na bang cih oh. Pawccecize na ryalaw hynh eih ru kaesy; na makhaete na cyih kho lan khyh.
19 Ka bya hynh ngaetua. Tuanaw kae pya cih, Pachia nynh ae umkhae vae sah! Nang tuh Pachia malang ccungccaw hae ccelang a thadynpaw na thua cih zah minmin kya-e byalungnaw kha Pachia malang na thuakhae cih;
20 upadi te ccangpyanaw kha na ccangpah cih hae zah a ccia nawlan hae paw laanpi te a cyi lan hae paw kha na nysah cih hae.
21 Ccungccaw hae laku e a cyih khopaw, Pachia a rihpaw, a lungzipaw te ahme leite muepaw kha a huapaw ccungccaw hae kha na po cih hae zah ccungccaw thung kheit uktu, za kheit uktu, sung pangaw uktu te lu haw uktu cite na nung cih hae.
22 Minmin tuh ccungccaw hae tungvaw byapiatu hae lante zungzae um hae sah; minmin nynh arupaw byalungnaw miakaw kha na kalan thuakhae hae sah, thuasalama azoipaw byalungnaw kha tuh mimaw nynh pia hae sah. Ou tuhte namaw hanlan azoihua cih zah, minmin nynh na phupaw kha ae due cih hae.
23 Ou tuhcite Pachia nynh kaw ae pya thyhte na cyi zetuh na taening cih, e ccungccaw hae nynh mih inn lang lungdaete a ki cih hae,” a cipya.
24 Moses nynh a pupaw bya kha ngae zah a hopyapaw balyn thyhte a cyi.
25 Moses nynh Israel hae balyn kya-e a cyih kho hae paw kha po hae zah ccungccaw thung kheit uktu, za kheit uktu, sung pangaw uktu te lu haw uktu cite lupi lang a nung hae.
26 Te minmin nynh ccungccaw hae kha zungzae bya a pia hae; arupaw byalungnaw kha Moses kalan a thuakhae hae, thuasalama azoipaw byalungnaw kha tuh mimaw nynh bya a pae hae.
27 Oute Moses nynh a pupaw kha cciasah zah aning tuh amaw ram lang a ki vae.