EXODUS
Exodus
Exodus (Ek-so-das) cipaw asuilan tuh ‘pou’ cipaw nynh thua. Izip ram kya see lang a la tangnaw hae kyate Israel hae a pounaw hae kong thua zah, e ccauh hynh Israel hae phungpaw kyaze abyapi huaccepaw nynh thua. E ccauh hynh phuin pali lang phia kho athua: (1) Hebru ccungccaw hae seetangnaw kyate luenaw; (2) Sinai Mua lang a ccianaw hae; (3) Pachia nynh a ccungccaw hae ryte Sinai Mua kya byakinnaw rae zah, ziazae lante, ukkunaw lante, beiknaw lante phungbya kha a pya hae; (4) Israel hae hanlan Pachia beiknawpaw inn sak lanpaw te a lungkhu kya mang lanpaw uccaw hae, te ranpibawi hae nynh zui lanpaw phung te Pachia beiknaw lanpaw phung hae kha nynh thua hae.
E ccauh nynh abyapihua lan a hopaw tuh Pachia nynh a ccungccaw hae kha seetangnaw kyate a luesah lya hae te malang ccyh hanlan ngaehoinaw a hoipaw minphuin lang a rae lya hae ze, Pachia nynh pawtemou a cyi cipaw kong kha nynh thua.
E ccauh kyaze abyapi huapaw ccungccaw tuh Moses thua zah, Pachia nynh a ccungccaw hae kha Izip ram kyate cciakhae khylan amaw kha a po. E ccauh kya a nyhua hae paw tuh Kawbya Ccanghaw a umnaw (20.1-17) kha nynh thua.
1
1 Jakob ryte Izip ram lang a thua hae paw Israel ccapaw hae mih min tuh:
2 Reuben, Simeon, Levi te Judah,
3 Issakhar, Zebulun te Benjamin,
4 Dan, Naftali, Gad te Asher nynh thua hae.
5 Jakob kyate a pui hae paw milu tuh abalynte sung sari acih hae. Josef tuh Izip ram kya phe a la umty vae.
6 Oute Josef te a uno hae balyn tuh chih vae hae zah, tuh she lya-e ccungccaw hae mah pong a chih vae hae.
7 Thuasalama Israel hae tuh ccaawsaah hae zah a pungzae hae; minmin tuh a lungthung hae, thawzung myarya hoi hae zah ram kya phe a beih hae.Ref 1.7: Loc 7.17
Israel hae tungvaw Tuaasahnaw
8 Josef kha a nyh leipaw siapharan athawpaw tuh Izip ram kya yn langkuh.Ref 1.8: Loc 7.18
9 Aning nynh a ccungccaw hae kha, “Dotua oh, Israel ccungccaw hae tuh aening laeze lunghua hae zah huhan a hoihua hae.
10 Rang oh lah minmin kha lunghawsakute ccuepe oh sih, tuhkhyhze tuh houh oun lungthung cih hae zah rhawtukkunaw yn um ze aening rhaw hae ryte pankheihte oun tuk cih hae zah ram kyate a ccue cih hae,” a ci.Ref 1.10: Loc 7.19
11 Tukeiccuze minmin nynh Israel hae kha nangsete ryalawsah khylan uktu bawi hae kha a khang hae. Minmin nynh Faro hanlan looh nung nawlan Pithom khua te Rameses khua kha a sak hae.
12 Thuasalama Israel hae tuh vawsawnaw pyakunaw kha houh a teing hae ze, houh pungzae hae zah houh a pazaekuh hae, tukeiccuze Izip hae nynh Israel hae kha a rih hae.
13 Izip hae nynh Israel hae tungvaw thawcci leite arupaw ryalaw kha a lawsah hae.
14 Anglae rya, ohkhe rya te arupaw ryalaw phuin takyh kya myarya ccih lante rya a lawsah hae. Ryalaw a naw hae paw takyh kya thawcci leite a nangse hae.
15 Izip siapharan nynh Hebru ccaaw puisahtu hae, mih min Shifrah te Puah cikuh hae paw kyakhe,
16 “Hebru nopi hae kha ccaaw na puisah vae oh ze, ccapise a thua zetuh na chiapah cih oh, thuasalama ccanopi a thua zetuh na hiin cih oh,” a ci.
17 Thuasalama ccaaw puisahtu hae nynh Pachia kha rih hae zah Izip siapharan nynh kaw a pya hae thyhte cyi leite ccapise hae kha a hiin hae.
18 Tukeiccuze Izip siapharan nynh ccaaw puisahtu hae kha ko hae zah, “Pawcce hynhte na cyi oh zah ccapise hae kha na hiin oh?” a ci.
19 Ccaaw puisahtu hae nynh Faro kha, “Hebru nopi hae tuh Izip nopi hae te lokuh khyh hae; minmin tuh mih ngedang zah mih chiisaw ahoy keiccuze kaening nynh mih kya kae thua mawze, mih ccaaw kha phe a la pui vae,” a cipya hae.
20 Tukeiccuze Pachia tuh ccaaw puisahtu hae tungvaw a hoy; te Israel hae tuh pungzae hae zah thawzung myarya a hoi hae.
21 Ccaaw puisahtu hae nynh Pachia kha a ri hae keiccuze Pachia nynh minmin kha ccaawno a pya hae.
22 Oute Faro nynh a ccungccaw hae balyn kha, “Hebru hae nynh a saah hae paw ccapise miakaw kha Nal vaw lungkhu lang na vua cih oh, thuasalama ccanopi miakaw kha na hiin cih oh,” cite kaw a pya hae.Ref 1.22: Loc 7.19