9
Minphuin Ccangpaw Zudynaw Seisahnaw
1 E uccaw hae hynh cyi athua koute, bawi hae nynh ka kalan oun cceih hae zah, “Israel ccungccaw hae, ranpibawi hae te Levi phin hae tuh e ram kya-e ccungccaw hae Kanaan hae, Hit hae, Periz hae, Jebus hae, Ammon hae, Moab hae, Izip hae te Amor hae kyate thuasah, khah-e hae nungsikunaw kyate thuasah phiakuh khyh hae.
2 Pawccecize minmin nynh khah-e hae ccanung hae kha mimaw zu lang te mih ccaaw hae zu lang a dyku hae. Tukeiccuze athyaapaw minphuin tuh e ram kya-e ccungccaw hae ryte pyde athua vae; e lungzi leinaw kyahin bawi hae te cciakhaetu hae tuh laandyhoeitu hae nynh thua hae,” cite yn hopya hae.
3 E bya hynh he ka thae te, ka boeining te ka angkiccua kha ka seiiku, te ka lu kya-e ka sang te ka khawming kha ka khaeekuh zah haungte phang ka tuakuh.
4 Tetuh zete silawnaw rae ccyh cia tuakute phang ka haung lyakhe Israel Pachia bya keiccu a thyngkuh hae paw balyn tuh seetangnaw kyate a ki hae paw mih lungzi leinaw keiccuze ka kalan oun sueluakuh hae.
Ezra Sawsangnaw
5 Zete silawnaw rae ccyh khe ka boeining te ka angkiccua aseiikuhpaw ryte looh-ae ka sungnaw kyate ka thokuh zah, ka ccukharutungte Bawipaw ka Pachia kalan ka kuih ka daw zah,
6 “Pou ka Pachia, na kalan ka mae hawi lanpaw hynh myaryamaw ka maethah zah ka hawi ngan khyh, pawccecize ka Pachia, kae hoyleinaw tuh kae lu po lawe zah kae cyiseinaw tuh vaawlui phe aphah.
7 Kae minpaaw hae she kyate atunin cia myarya kae sei vae; kae hoyleinaw keiccuze kaemaw, kae siapharan hae te kae ranpibawi hae tuh atunin cia kae teing hawte ramccang siapharan hae kuih kalan, thaloi kalan, kyngkunaw kalan, thiingkunaw kalan te maethyanaw kalan khe ap kae thua.
8 Thuasalama atu sosoh tuh Bawipaw kae Pachia nynh kae tungvaw kya thawccinaw langsakuh zah, kaening hynh luesahte oun laehysah zah athyaapaw amaw hmin kyakhe khyndadyh lan oun umsah; aning nynh kae mit oun awsah zah see lang kae tangnaw kyakhe hiinthuinaw kha oun pya.
9 Kaening tuh see hae nynh kae thua; tuhzemah kae Pachia nynh see lang kae tangnaw kyakhe oun vua khyh, kae Pachia inn kha thadynsah lan hiinnaw thawpaw pya khylan thuasah, a ronaw kha raethui khylan thuasah, Judea ram te Jerusalem khua kyakhe rekunaw pya khylan thuasah Persia siapharan hae malang khe atynpaw a sungsahnaw kha kaening hanlan oun pya vae.
10 “Pou kae Pachia, atu tuh hynh-e koute pawmou kae ho ung cih? Pawccecize na ryalahtu profeh hae kyate kaw nae pya zah,
11 ‘Ccou khylan na teenua cih oh paw ram tuh tuin ram kya a umpaw ccungccaw hae thunaw te mih nungsikunaw te athyaa leipaw ram nynh thua. Ram voikheit langte voikheit lang adianaw cia mih thyaa leinaw te phe a biasah hae.
12 Tukeiccuze nae ccanung hae kha mih ccapaw hae kalan pya nan oh lah, mih ccanung hae kha nae ccapaw hae zu lang dy nan oh; nanning tuh na thung oh zah ram lungkhu e apaw-athae kha na ae oh zah ram kha nae ccaaw hae hanlan rho lang zungzae na rhopya nawlan oh, minmin kya-e ccawkunaw te sisua kha papin ccung nan oh,’ cite nae hopyapaw na kawbya hae kha kae vua hae.Ref 9.12: Exo 34.11-16; Deu 7.1-5
13 Ahoy leipaw kae cyisahnaw hanlan te myarya lepaw kae cyiseinaw hanlan kae tungvaw accahpaw balyn koute, pou kae Pachia, kae hoyleinaw te atekuhpaw laeze azyahua lante de nae tah zah, kaening hynh hynhcite nae laesah hy,
14 na kawbya hae kha bua rote, e anungsikuhpaw a raepaw ccungccaw hae ryte zuvaw lang kae tang ung cih tou? A laehypaw thuasah, a hiinhypaw thuasah kae um lei lan ciate kaening hynh nae ro mawlaezung kae tungvaw na thinria lan khyh tou?
15 Pou Bawipaw , Israel Pachia, nang tuh na ding zah, atunin kya kaening tuh a laehypaw ccungccaw hae lang kae lue vae. E cyiseinaw keiccuze lu kheit nynh san namaw malang a thadyn kho khyh zemah, kae cyiseinaw hynh namaw malang kae ngiaku,” cite ka ngia.