7
Ezra Yn Thuanaw te Ryalawnaw
1 E koute, Persia Siapharan Artazaksis nynh ram a uk lyakhe Ezra tuh Babilon khua kyate a cceihthung; Ezra tuh Seraiah ccapaw, Seraiah tuh Azariah ccapaw, Azariah tuh Hilkiah ccapaw;
2 Hilkiah tuh Shallum ccapaw, Shallum tuh Zadok ccapaw, Zadok tuh Ahitub ccapaw,
3 Ahitub tuh Amariah ccapaw, Amariah tuh Azariah ccapaw, Azariah tuh Meraioth ccapaw,
4 Meraioth tuh Zerahiah ccapaw, Zerahiah tuh Uzzi ccapaw, Uzzi tuh Bukki ccapaw,
5 Bukki tuh Abishua ccapaw, Abishua tuh Finehas ccapaw, Finehas tuh Eleazar ccapaw, Eleazar tuh ranpibawi lepaw Aaron ccapaw nynh thua—
6 Ezra tuh Bawipaw , Israel Pachia nynh a pyapaw Moses kawbya kha myarya nyh zah a thyapaw ccazi nynh thua; Bawipaw a Pachia thungnaw tuh a tungvaw a um keiccuze a ngiapaw miakaw kha siapharan nynh a pya.
7 Siapharan Artazaksis nynh ram a uknaw kum sarinaw kum khe Israel hae abang, ranpibawi hae te Levi phin hae abang, hlawsahthya hae paw te sakoih ngawtu hae, te beikinn ryalahtu hae mah Jerusalem lang a cceihthung hae.
8 Siapharan nynh ram a uknaw kum sarinaw, sawpaw sah pangawnaw khe Jerusalem khua a thua hae.
9 Masaty sawpaw nin kheit nin khe Babilon khua kyate pou hae zah, sawpaw sah pangawnaw nin kheit nin khe a Pachia thawccinaw thungnaw tuh a tungvaw a um keiccuze Jerusalem a thua hae.
10 Pawccecize Ezra nynh Bawipaw kawbya kha ccangku lan te zui lan thuasah, phungbya hae te phungzae hae kha Israel hae kya ccangpya lan thuasah a thinlung kha a pyaku.
Artazaksis nynh Ezra A Kypaw Ccaw
11 E hynh Bawipaw nynh Israel hae hanlan a pya hae paw kawbya hae te a phungbya hae myarya athyapaw sazae, ranpibawi Ezra kalan Siapharan Artazaksis nynh a pyapaw ccaw khawpi nynh thua:
12 “Siapharan hae siapharan Artazaksis nynh vaawlang Pachia kawbya sazae, ranpibawi Ezra kya: Daenaw um vae sah.
13 Ka ram lungkhu umpaw Israel ccungccaw miakaw, mih ranpibawi hae, Levi phin hae kyaze Jerusalem lang amaw lungthote a cceih rypaw miakaw tuh na kya a cceihbua kho, cite kaw ka tho.
14 Pawccecize na kuih kya umpaw na Pachia kawbya thyhte Judah te Jerusalem kong kha akaw-aleih dotua khylan siapharan te tuanaw a pyatu hae lu sari nynh nang kha kae saw,
15 te siapharan te tuanaw a pyatu hae nynh Jerusalem kya umpaw Israel Pachia hanlan mimaw lungthote a hlu hae paw sui te ngun thuasah,
16 Babilonia ram pynpi kya na mue cih paw sui te ngun balyn thuasah, ccungccaw hae te ranpibawi hae nynh Jerusalem kya umpaw mih Pachia inn hanlan lungthote a pya hae paw lungthote silawnawpaw thuasah na la phu cih.
17 E phua hynhte tangnuapaw hae, tuutepaw hae, tuutaw hae ryte mih ccathae silawnawpaw te mih niapaw silawnawpaw hae kha arangte na re cih zah, tuh-e hae tuhte Jerusalem kya umpaw na Pachia inn silawhang vawlan khe si na law cih.
18 Tuhlaepaw sui te ngun kha nang te na uno hae nynh ahoy na ci oh hawte, nae Pachia rynaw hawte na mang cih oh.
19 Na Pachia inn ryalawnaw hanlan ae pya hae paw angphe hae kha Jerusalem khua Pachia malang khe na la pya cih.
20 Na Pachia inn hanlan ccangpaw aho ungpaw miakaw, nang nynh mang lan accanpaw kha siapharan phua kya-e kha na la mang cih.
21 “Kae, Artazaksis nynh Vaw Khuraw lang ram kya umpaw phua ccytu hae balyn kalan kaw ka tho: Vaawlang Pachia kawbya sazaepaw, ranpibawi Ezra nynh ae ngia oh paw miakaw kha
22 ngun talent za kheit cia, chanvuih kor za kheit cia, misutui bath za kheit cia, chitui bath za kheit cia, te loi aho zeih kha pekite na pya cih oh.
23 Vaawlang Pachia nynh kaw a pyapaw miakaw tuh, siapharan te a rhoccoutu hae peenaw kya a thinrianaw accaw khyh nawlan, Pachia inn hanlan zuakute cyi thua sah.
24 Ranpibawi hae, Levi phin hae, hlawsahtu hae, thuakaw ngawtu hae, beikinn ryalahtu hae, e Pachia inn e ccangpaw ryalahtu hae humhung kalan mah ngunto, uccaw hoi mee te laanpi mang mee hae kha na khoi lan khyh oh cipaw kae thaesah bia oh.
25 “Nang, Ezra nynh na hoipaw Pachia pyapaw hawnaw thyhte, na Pachia kawbya a thaethya hae paw Vaw Khuraw lang ram e ccungccaw balyn kha bya a pia cih hae paw uktu bawi hae te byapiatu hae kha rya na khang cih hae; tuh-e kawbya a nyh lei hae paw kha na ccangpah cih hae.
26 Na Pachia kawbya te siapharan kawbya a zui leipaw balyn tuh chianaw, ram kyate deenaw, mih uccaw luanaw, thongsawnaw hae khate athathyhte byapianaw palou a ing cih hae,” a ci.
27 Bawipaw , kae minpaaw hae Pachia tuh thehoyte um sah. Jerusalem kya umpaw Bawipaw inn kha phu-esah khylan e uccaw hynh aning nynh siapharan thinlung kya sang zah,
28 siapharan te tuanaw a pyatu hae malang te siapharan kuihkaw e athungpaw bawi hae balyn malang khe atynpaw a sungsahnaw kha ka tungvaw a lesah. Bawipaw , ka Pachia thungnaw tuh ka tungvaw a um keiccuze kae tuh ka rawthung zah kamaw ryte cciathung khylan Israel ccungccaw cciakhaetu hae kha ka suelua hae.