4
Khri Pyn kya Lungngingnaw
1 Tukeiccuze Bawipaw keiccuze thongccahpaw kae, Paul nynh ko na thua oh paw nanning kha, tuh-e konaw te angaekuh lante na hiin nawlan oh kae ngia oh.
2 Pawpaw balyn kya zakawsangsakunaw, lungnenaw, lungsaenaw te um oh, sungsakunaw kya lu kheit te lu kheit ngaesangnaw hoi oh,Ref 4.2: Kol 3.12-13
3 nanning ae suelua oh paw daenaw liate Muisaw kya-e lungngingnaw kha tynsah khylan thawte zuakuh oh.
4 Nanning ae konuathe oh paw ngaehoinaw tuh ccangkheit kyalya athua hawte, pyn pynkheit, Muisaw ccangkheit kyalya nynh a um,
5 Bawipaw ccangkheit, zynnaw ccangkheit, baptisma ccangkheit,
6 pawpaw balyn Paaw athuapaw Pachia ccangkheit nynh a um; tuh-e Pachia tuh pawpaw balyn luki a umpaw, teitei balyn kya a umpaw te pawpaw balyn kya a umpaw nynh thua.
7 Thuasalama Khri nynh oun pyapaw lasung tounawpaw thyhte aening lu raveih nynh thawccinaw kha ah mue oh.
8 Tukeiccuze,
“Aning nynh ahangnaw lang
he a kaethung te,
kyngpaw ccungccaw hae kha
a cciakhae hae;
a ccungccaw hae kha
lasung a pya hae,”
cite a ho.Ref 4.8: Sam 68.18
9 (“Aning tuh a kaethung” a cipaw hynh, aning tuh laephi ane huanaw kalan mah a rungbung cinawpaw nynh thua.
10 Yn rungbungpaw aning tuh pawpaw balyn kha phe biasah khylan, vaawlang abalyn hae luki lang a kaethungpaw kha nynh thua.)
11 Aning nynh a pya hae paw lasung tuh, ccungccaw abang kha locceihtu lang, abang kha profeh lang, abang kha thehoypaw phytu lang, abang kha pastor lang te ccangpahtu lang a nung hae,
12 tuhte a pya hae paw tuh Khri pyn kha thawzung tynsah khylan, ryalawnaw hanlan mithyaa hae kha paccyn khylan nynh thua;
13 tuh-e paccynnaw tuh aening balyn nynh zynnaw kya thuasah, Pachia Ccapaw nynaw kya thuasah lunglokunaw ah hoi oh zah, Khri kya-e accingpaw ccungccaw tounawpaw thyhte piccan athuakuh cia paccynnaw nynh thua;
14 ou tuhte ccungccaw hae nynh hynpyanaw liate, a cyisakuh thyapaw thyaruhnaw te a pheethyapaw pheenaw kya ccangpyanaw khisan miakaw nynh po cciakhae hae zah nulang malang a hekuh hae paw imua hae thua vae leite,
15 sungsakunaw kya byaccing kha hote, aening tuh lu athuapaw Khri kyakhe pawpaw kya balyn ah lethung nawlan oh,
16 tuh-e lu kyate atungkunaw miakaw nynh thawpya zah pyn balyn tuh rekuhmamia lan tungkuh hae zah akyngkuh hae, pyn kya-e raveih nynh ccungkia lan rya a law hae thyhte, sungsakunaw kya tuh-e pyn tuh tynsathung nawlan pyn kha a lethungsah.Ref 4.16: Kol 2.19
Hiinnaw Arynpaw te Athawpaw
17 Tukeiccuze tuhlaepaw Zenta hae nynh accakaepaw mih tuanaw kya a hiin hae hawte nanning nynh na hiinbua khyh nawlan oh e hynh ka ho zah Bawipaw kya ccaekia ka khan.
18 Minmin kya nythyanaw kharouh a um khyh keiccu, mih thinlung mitmoh keiccu, mih thaethyanaw tuh karae amoh, Pachia kya-e hiinnaw kyate phe a phiakuh vae hae.
19 Minmin tuh maethya ny leite, eih duaanaw te nungsikunaw tynre kha cyi khylan mimaw te mimaw kha ohhuaku rynaw kalan a apku hae.
20 Thuasalama nanning tuh Khri kong kha tuhte na ccangkuh khyh oh;
21 byaccing tuh Jesu kya a um hawte, amaw kong kha nanning nynh phe na thae vae oh zah amaw nynh phe ae ccangpya vae oh lanze,
22 langmaw nae ozia te asekuh lante ahynthyapaw ryduaanaw thyhte phe aroh vae paw arynpaw ccungccaw kha na vua nawlan oh,Ref 4.22: Kol 3.9
23 te nae thinlung te nae tuanaw kha thawsah te na um nawlan oh,
24 te ahmepaw dingnaw kya te thyaanaw kya Pachia hawmawte rae athuapaw, athawpaw ccungccaw kha nanning nynh na lawku nawlan oh nynh thua.Ref 4.24: Gen 1.26; Kol 3.10
Hiinnaw Thawpaw elang Phung hae
25 Tukeiccuze hynbya kha nung biate, nanning lu raveih nynh nae innpaw hae ryte byaccing kha ho oh, pawccecize aening tuh lu kheit te lu kheit pyn kya-e hae nynh ah thua oh.Ref 4.25: Zek 8.16
26 Nae thinria salamah sei nan oh, nae thinrianaw khate khuanin ccawsah nan oh.Ref 4.26: Sam 4.4 (LXX)
27 Satan kha umnaw ua nan oh.
28 Aruhpaw ccungccaw nynh kharouh ruh nan vae sah, thuasalama ahoboupaw ccungccaw kha pyabua lanpaw a hoi nawlan, amaw a kuih te ahoypaw ryalaw kha zuakute lah sah.
29 Anungsikuhpaw bya kaw kheit san nae khalang kyate pou nan sah. Thuasalama a thaetu hae kha Pachia thawccinaw a neethungbua nawlan, thawzung tynsathungnaw hanlan athanepaw ahoypaw bya palia kha pousah oh.
30 Sawkhawnaw nin hanlan nanning tazeih ae khianaw oh paw, Pachia Thyaa Muisaw kha thinlungccisah nan oh.
31 Thinlung kya phang poipaw balyn, bungpawnaw, thinrianaw, sianuakupaw, te thethya hokupaw, milae rosah rynawpaw balyn kha nae kyate vua oh.
32 lu kheit te lu kheit thawccihkuh thya oh lah ngaethyaumsakuh oh, Khri kya Pachia nynh ae ngaethya vae oh hawte lu kheit te lu kheit ngaethyakuh oh.Ref 4.32: Kol 3.13