EFESA HAE
KALAN PAUL CCAKY
Ephesians
Efesa hae kalan Paul Ccaky hynh masaty lan, “Ccyh yn ccing te Pachia nynh rae lan a paccynkupaw tuh: vaawlang kya thuasah, laephi kya thuasah, raepaw uccaw balyn hynh marya suelua zah Khri kha lupi lang nung kha nynh athua cipaw hynh abyapi lante a nung (1.10). Te Pachia ccungccaw hae kya ccungccaw balyn nynh pynkheihlan thuanaw lanpaw hynh a paccyn huapaw athua hawte asuilan hoite hiin lanpaw kha a ngia hae.
Hynh-e Efesa athotakawnaw kya ccawzeitu nynh ccangkheit thuanaw lanpaw paccynkunawpaw a ho. Hynh-e kya hynh Pachia nynh ccungccaw a ponaw zia te Thyaa Muisaw liate alepaw Pachia byakinnaw aamahkhannaw zia balyn a ho. Ccangningnaw kya ccawriatu hae kha Khri lungkhu kya ccangkheit athuanaw hae paw lu kheit te lu kheit ahmepaw mih hiinnaw ccangkheitpaw lang a ngia hae.
Ccangkheitpaw Pachia ccaaw hae nynh Khri te a kyngkunaw hae liate langsakunaw lanpaw ho rypaw a langsakuhtu tousenaw kha mangte a ho, khriccaawbuu tuh pyn hawte thua zah, Khri tuh lu hawte nynh thua; khriccaawbuu tuh inn hawte thua zah Khri tuh inn apaki e lung hawte nynh thua; khriccaawbuu tuh zu hawte thua zah Khri tuh vawpaw hawte nynh thua a ci. Khri kya a langsahkupaw Pachia thawccinaw nynh ccawzeitu a tuanaw kha a hangsah. A hopaw balyn kya Khri sungsahnaw, a pyn pyakunaw, seingaethyanaw, thawccinaw te a thyaanaw hae kha oun muih sah.
1
Beihlangnaw
1 Pachia rynaw thyhte Khri Jesu locceihtu athuapaw Paul nynh Efesa khua e mithyaa hae te Khri Jesu kya lungzi hae paw kalan ccaw kae ky oh.Ref 1.1: Loc 18.19-21, 19.1
2 Ah Paaw Pachia te Bawipaw Jesu Khri kya-e thawccinaw te daenaw tuh nae kya la um vae sah.
Khri kya Muisaw Hythuanaw
3 Ah Bawipaw Jesu Khri a Paaw Pachia tuh thehoyte um sah. Pawccecize Khri liate vaawlang e muisaw hythuanaw aphuinphuin kha aening oun pya vae.
4 Aening tuh Pachia malang ah thyaa nawlan oh te ccaenaw um leipaw ah thua nawlan oh, laephi rae mawze aening kha Khri kya phe oun po vae.
5 Pachia nynh amaw a rynaw thyhte, Jesu Khri liate aening kha a ccaaw hae lang phe oun la paccynde vae,
6 a sungsahpaw Ccapaw liate alakaw te aening oun pyapaw aphu-epaw a thawccinaw kha thehoysah khylan nynh thua.
7 Khri chiise liate shawkhawnaw athuapaw aening seinaw ngaethyanaw kha myarya lepaw Pachia thawccinaw thyhte Ccapaw liate ah mue oh,Ref 1.7: Kol 1.14
8 tuh-e thawccinaw tuh aening kha paepae lui lan oun pya vae.
9 Pachia nynh Khri kya a paccyn ty vae paw ahoypaw a lungrythuanaw thyhte, hawnaw te thaethyanaw balyn khate a rynaw kya-e byakhupaw kha aening phe oun nysah vae,
10 tuhcite accyh yn ccing te, vaawlang umpaw te laephi vaw umpaw pawpaw balyn kha Khri kya marya suelua lan a paccyn.
11 Amaw a rynaw te a khuakhannaw thyhte pawpaw balyn a cyihtupaw Pachia nynh a eenaw thyhte a paccyn ty vae hawte aening mah Khri liate rhoccounaw kha ah mue oh,
12 tuh-e tuh Khri kha masaty a ngaehoi hae paw aening nynh a phu-enaw kha thehoysah khylan ah hiin nawlan oh nynh thua.
13 Nae kya-e khumnaw thehoypaw athuapaw byaccing bya kha he na thae oh te, amaw kha na zyn oh zah Pachia nynh bya a kinkupaw Thyaa Muisaw khate tazeihkhia na thua vae oh.
14 Pachia nynh amaw ccungccaw lang oun shawkhawnaw konglang te, Muisaw tuh aening rho hanlan aamahkhan nynh thua, tuh-e tuh Pachia phu-enaw kha thehoysah nawlan nynh thua.
Paul Sawsangnaw
15 Bawipaw Jesu na zynnaw oh paw te mithyaa hae balyn na sungsahnaw oh paw kha he ka thae tuh,
16 nanning hanlan Pachia kalan dae leite lungtuabya ka ho zah ka sawsangnaw kya tyty kae lia oh.
17 Ah Bawipaw Jesu Khri a Pachia, phu-enaw Paaw nynh amaw ny nawlan hawnaw muisaw te byaphy kha ae pya nawlan oh thuasah,
18 thaethya nawlan nae thinlung mit ae awsah oh zah, nanning ae konua oh paw ngaehoinaw tuh pawmou athua cipaw na ny nawlan oh thuasah, mithyaa hae nynh a ccou hae paw rho a phu-enaw tuh hohcihmou ale cipaw na ny nawlan oh thuasah,
19 alesaepaw a thungnaw nynh rya a law thyhte, a zyn hae paw aening hanlan a thungnaw tuh tou kho um lei lan hohcihmou ale cipaw na ny nawlan oh thuasah saw kae sangpya oh.
20 Khri kha chinaw kyate thoosah zah vaawlang khua kya a ranglang khe a haungsah lya, Pachia nynh tuh-e thungnaw khate Khri kya rya a law,Ref 1.20: Sam 110.1
21 Khri kha uknaw, kawhoinaw, thungnaw te peenaw kaw balyn kya ahanghua lante a haungsah, atu she kyalya thua leite yn thua cih paw she kyacia minphukuhpaw min miakaw kya ahanghua lante a nung.
22 Pawpaw balyn kha Khri a ccuphe kaw marya nung zah khriccaawbuu hanlan pawpaw balyn kya lu lang a nung,Ref 1.22: Sam 8.6Ref 1.22-23: Kol 1.18
23 tuh-e khriccaawbuu tuh Khri pyn thua zah pawpaw balyn kha pawpaw balyn kyakhe phe a ccingsahtupaw Khri accingnaw nynh thua.