13
Lingthya Profeh hae Seisahnaw
1 Bawipaw bya tuh ka kya yn thua zah:
2 Ccungccapaw, profehbya ho hae paw Israel profeh hae kha rawsete profehbya hotua; mimaw tuanaw te profehbya ho hae paw kyakhe, “Bawipaw bya hynh thaetua oh!” cite hopah hae.
3 Paw sanmah muih leite, mimaw tuanaw thyhte a ho hae paw, tuanaw hoi leipaw profeh hae hanlan ngaethya lan kou um!
4 Pou Israel, na profeh hae tuh arohpaw apumkuhpaw laku kya a umpaw suizaw hae hawte nynh athua hae.
5 Bawipaw nin, rhawtuknaw kya Israel tuh tynkaring lan a thadyn kho nawlan, minmin nynh khualungrua aronaw kalan kae khyh hae, Israel hae hanlan khualungrua kha raethui khyh hae.
6 Minmin nynh hynbya te lingkunawpaw vizin kha a muih hae; Bawipaw nynh minmin kha a saw lei hae pite, “Bawipaw nynh a ho,” a ci hae, tuhzemah mih bya accing lanpaw kha a ngaw hae!
7 Kae nynh ka ho lei pite, “Bawipaw nynh a ho,” cite ahme leipaw vizin, lingthya profehbya a ho hae paw kha na thae khyh oh tou?
8 Tukeiccuze Bawipaw PACHIA nynh a hopaw tuh: Nanning nynh hynbya na ho oh zah lingkunawpaw vizin kha na muih oh keiccuze nanning kha kae rawse cih oh, cite Bawipaw PACHIA nynh a ci.
9 Ahme leipaw vizin muih hae zah lingkunawpaw bya a ho hae paw profeh hae kha ka kuih nynh a rawse cih hae; minmin tuh ka ccungccaw hae tungkunaw kya umbua lan khyh hae, Israel hae ccazing kya zeibua thua lan khyh hae, Israel ram lungkhu lang tee lan khyh hae; nanning nynh kae tuh Bawipaw PACHIA ka thuapaw kha na nyh cih oh.
10 Pawccecize, thanccingte, minmin nynh ka ccungccaw hae kha cciakhaesei hae zah, daenaw a um lei pite, “Daenaw,” cite a ho hae keiccu nynh thua, te ccungccaw hae nynh lungrua kha a rua hae ze, e profeh hae nynh lungrua kha arawpaw sii a thuhthin hae keiccu nynh thua.Ref 13.10: Jer 6.14, 8.11
11 Lungrua tuh a ting cih, cite lungrua kya arawpaw sii thuh hae paw kha hopah hae. Khuaa thawte arah cih, hya lepaw accah cih zah khise atho cih.
12 Lungrua tuh he a ting te, “Lungrua kya na thuhpaw arawpaw sii kha teimou a um vae?” cite nanning kha ae khia lan khyh oh tou?
13 Tukeiccuze Bawipaw PACHIA nynh hynhte a ho: Ka bungpaw keiccuze khise ka thosah cih, ka thinria keiccuze khuaa thawte arah cih zah, hya nynh tuh-e lungrua tuh aroh cih.
14 Nanning nynh arawpaw sii na thuh oh paw lungrua kha laekhu kyacia ka ting cih; tuhteze nynh athonaw aleihpaw tuh azo cih; lungrua tuh he a ting te, nanning mah lungrua kyakhe na rohbua cih oh; te nanning nynh kae tuh Bawipaw ka thuapaw kha na nyh cih oh.
15 Tuhcite tuh-e lungrua kya te arawpaw sii a thuh hae paw tungvaw khe ka thinrianaw kha ka mang cih; lungrua tuh um vae khyh, lungrua sii a thuhtu hae—
16 daenaw a um lei pite Jerusalem hanlan daenaw vizin muih hae zah Jerusalem konglang profehbya a hotu hae Israel profeh hae mah um vae khyh hae cipaw kha nanning kya kae hopah cih oh, cite Bawipaw PACHIA nynh a ci.
17 Ccungccapaw, mimaw tuanaw thyhte profehbya a ho hae paw na ccungccaw hae kya-e nopi hae kha rawsete na mae hawiliatua hae; minmin kha profehbya honua hae lah,
18 Bawipaw PACHIA nynh hynhte a ho: Ccungccaw hiinnaw kha kyng khylan ccungccaw miakaw kuihnyng kya khiikupaw kha huipah hae zah, lu miakaw hanlan lu bongkupaw boei taraw kha a raepah hae paw nopi hae hanlan ngaethya lan kou um! Ka ccungccaw hae laku kya hiinnaw kha kyngdete nae hiinnaw kha na khynsakuh cih oh tou?
19 Barli phaw kuihphe kheit te sanlou beihtaraw hanlan ka ccungccaw hae laku kya the nae thyasah vae oh, hynbya a ngae hae paw ka ccungccaw hae kya hynbya hopyanaw liate, chi lan accan leipaw kha na theih oh zah, hiin lan accan leipaw kha na hiin oh.
20 Tukeiccuze Bawipaw PACHIA nynh hynhte a ho: Ccungccaw hiinnaw na kyngdenaw oh paw kuih kya khiikupaw kha ka hua; khah-e kha nae kuih kyate thoh ka pae cih zah, pavaw bite na bi oh paw ccungccaw hae hiinnaw kha ka luesah cih.
21 Nae kya-e bongkupaw boei taraw kha ka seii cih zah, nae kuih kyate ka ccungccaw hae kha ka khum cih hae; minmin tuh nae kuih kya umpaw saw thua vae lan khyh hae; tetuh kae tuh Bawipaw ka thuapaw kha na nyh cih oh.
22 Miding hae kha rawthyanaw ka pya lei hae pite, mih raw na thyasah oh keiccu thuasah, ccungccaw hoylei hae paw kha ahoy leipaw mih laanpi kyate a maeleihku khyh nawlan hae thawzung na pya oh zah mih hiinnaw kha na khum oh keiccu thuasah,
23 nanning nynh ahme leipaw vizin kha na muih vae lan khyh oh zah, profehbya kha na ho vae lan khyh oh; ka ccungccaw hae kha nae kuih kyate ka khum cih hae. Tetuh kae tuh Bawipaw ka thuapaw kha na nyh cih oh.