EZEKIEL
Ezekiel
Ezekiel tuh BC 586 kum kya Jerusalem aro maw te aro kou lyakhe Babilon ram kya a um. Kyng hae zah Babilon um hae paw te Jerusalem khua um hae paw hanlan hynh-e bya hynh a hopaw nynh thua. Ezekiel ccauh kyahin abyapipaw akonglang ccangtaruh a um: (1) Pachia nynh Ezekiel kha profeh lang konaw; (2) A minphuin hae nynh Pachia byapianaw a teing lan hae paw kong te Jerusalem aronaw lanpaw kong raeringnaw pyanaw; (3) A ccungccaw hae kha vawsawnaw pya hae zah a cciakhaesei hae paw minphuin ccangpaw hae tungvaw byapianaw te asekuhpaw Bawipaw bya; (4) Jerusalem aroh koute Israel hae hanlan lungtangnaw bya te malang ccyh ahoypaw hanlan byakinpyakunaw; (5) Gog siapharan kha rawsenawpaw profehbya; (6) Raethui lanpaw Beikinn te Israel minphuin muinsan kha Ezekiel nynh muihdaenaw.
Ezekiel tuh Pachia kha myarya a zynpaw te tuanaw-roihnaw aphuinphuin a hoipaw ccungccaw nynh thua. A muihpaw patae kha vizin pungsan te hopah hae zah a ho rypaw bya kha ccaerarihpaw muihsahnaw ryalaw te a langsahpya hae. Ezekiel nynh alungkhu lang e thinlung thawpaw te tuanaw thawpaw abyapi athuanaw kong te pyn raveih seinaw hanlan pyn raveih kya tavuan a um cipaw kha a langsah. Aning nynh Israel minphuin hiinnaw a thawthui lanpaw a ngaehoinaw kong kha a ho. Ranpibawi thua zah profeh mah athua keiccuze Beikinn te thyaa ahonaw kong kha myarya a peki.
1
Marangle Vizin
1 Kum sung thum kum, sawpaw sah palinaw, nin pangaw nin kya Khebar vawkhu kin khe kyngte ramccang lang a cciakhae hae paw kya ka um lyakhe vaawlui tuh yn hungkuh zah Pachia kya-e vizin kha ka muih.Ref 1.1: Bya 19.11
2 Tuh-e sawpaw nin pangaw nin khe (tuin nin tuh Jehoiakhin Siapharan kha kyngte ramccang lang a cciakhaenaw hae kum pangawnaw kum nynh thua),Ref 1.2: 2Si 24.10-16; 2Sh 36.9-10
3 Khaldi ram, Khebar vawkhu kin khe Bawipaw bya tuh Buzi ccapaw ranpibawi Ezekiel kalan yn thua; te tuin kyakhe Bawipaw kuih tuh a tungvaw khe a um.
4 Ngawran ka do lyakhe, myarya rupaw khise tuh thahlang te yn zaw: tuh-e khise kyakhe phaephae akpaw nynh phang koihlupaw myarya lepaw maeking te dalahdalah awpaw maee a um, te maee lungkhu tuin sohin hawte a awpaw awnaw a um.
5 Tuh-e maee lungkhu tuin ahiinpaw ahysuepaw ccangpali a um. Tuh-e hae mih muinsan tuh: ccungccaw muinsan lo hae zah,Ref 1.5: Bya 4.6
6 ccangkheit ze mitmae ccangpali hoi hae zah sake ccangpali cci a hoi hae.
7 Mih ccu tuh lawbabin lan cih zah mih ccukaw tuh vaetuataw ccukaw nynh alo; phaephae akpaw sohin hawte a ak hae.
8 Mih sake kaw, mih pyn san pali khe ccungccaw kuih a hoi hae. Tuh-e ccangpali hae nynh mitmae hae te sake hae a hoi hae:
9 mih sake hae tuh ccangkheit te ccangkheit a tungkuh hae; tuh-e hae tuh a ccia hae ze maeku leite malang lawbabin lan a cceih hae.
10 Mih mae muinsan tuh: ahiinpaw ahysuepaw ccangpali hae maesue tuh ccungccaw maesue hoi hae zah, mih ranglang khe chindeih maesue, mih voilang khe tangnuapaw maesue, mosipi maesue a hoi hae;Ref 1.10: Eze 10.14; Bya 4.7
11 tuh hawte nynh mih maesue tuh athua hae. Mih sake kha mih luki langkhe tharae a daw hae; ahiinpaw ahysuepaw ccangkheit cci nynh sake bua ning cci a hoi hae, mih sake bua kheit tuh ccangpaw ahiinpaw ahysuepaw sake te tungsakuh hae zah ccangpaw bua kheit nynh mih pyn kha a bong.
12 Ahiinpaw ahysuepaw ccangkheit cci tuh muisaw nynh a ccianaw miakaw langkhe ccanglang maeku leite malang khe lawbabin lan a cceih hae.
13 Tuh-e ahiinpaw ahysuepaw hae ngaelung khe maee-e aruapaw alopaw, ahiinpaw ahysuepaw hae laku kya nulang malang a nuekuh bungthungpaw maeekhua alopaw a um; maee tuh phaephae ak zah maee kyate khozaw alaekuh.
14 Ahiinpaw ahysuepaw hae tuh khozawlaekuhpaw hawte nulang malang rangtareih lan a ccue bungthung hae.
15 Ahiinpaw ahysuepaw hae kha ka do lyakhe, tuh-e ccangpali hae mih pepan raveih khe leccu ccangkheit cci kha laekhu khe ka muih.Ref 1.15-21: Eze 10.9-13
16 Leccu hae muinsan te a raenaw hae paw tuh hynhte nynh thua: mih muinsan tuh phaephae akpaw, aphutepaw lung te lokuh zah, ccangpali mawte mih muinsan pong lokuh hae; a raenaw hae paw tuh leccu ccangkheit lungkhu a umpaw leccu ccangkheit te nynh aloku.
17 He a ccia hae ze, leccu ccangpali hae tuh ccanglang pawpaw kalan mah maeku leite pynkheit lan a cceihthya hae.
18 Leccu hae tuh hang hae zah ri lan a um hae, pawccecize tuh-e leccu hae ccangpali mawte po voilu lan mit a hoi hae.Ref 1.18: Bya 4.8
19 Ahiinpaw ahysuepaw hae tuh he a ccia vae hae ze, mih pe khe leccu hae tuh a cceihbua hae; ahiinpaw ahysuepaw hae tuh laephi kyate he a hangku vae hae ze, leccu hae mah a hangkuh bua hae.
20 Muisaw nynh a ccianaw miakaw langkhe minmin tuh cceihbua hae zah, minmin ryte leccu hae tuh a hangkuh bua hae; pawccecize ahiinpaw ahysuepaw hae muisaw tuh leccu hae kya a um.
21 Ahiinpaw ahysuepaw hae tuh a ccia hae ze, leccu hae mah cceihbua hae zah, a thadyn vae hae ze leccu hae mah a thadynbua hae; laephi kyate he a hangku hae ze, leccu hae mah a hangkuh bua hae; pawccecize ahiinpaw ahysuepaw hae muisaw tuh leccu hae kya a um.
22 Ahiinpaw ahysuepaw hae lu luki khe adawkuhpaw te lokuh zah muinsado hawte a akpaw, mih lu luki tharae dawkuhpaw a um.Ref 1.22: Bya 4.6
23 Adawkuhpaw zakaw khe mih sake hae kha ccangkheit nynh ccangpaw ccangkheit kalan khe lawbabin lan a daw hae, tuh-e ahysuepaw hae ccangkheit cci nynh mih pyn abongpaw sake ccangning cci a hoi hae.
24 He a ccia hae ze, tui alepaw roi hawte thuasah, Alesaepaw kya-e kholungthyhpaw hawte thuasah mih sake roi kha ka thae, ngaluin-ngaluin accaepaw roi tuh rhawkaw hae roi hawte nynh athua; he a thadyn hae ze, mih sake kha a sawbung hae.Ref 1.24: Bya 1.15, 19.6
25 Te mih lu luki umpaw adawkuhpaw kyate roi roikheit yn ccae; he a thadyn hae ze, mih sake kha a sawbung hae.
26 Mih lu luki umpaw adawkuhpaw vawlan khe nilar lung alopaw, bawitungkhung tahawpaw a um; tuh-e bawitungkhung vawlan tuin ccungccaw muinsan alopaw tuh a haung.Ref 1.26: Eze 10.1; Bya 4.2-3
27 Atae alopaw kyate palung lang kyakhe phaephae akpaw sohin te alokuhpaw, po voilu lan maee te alokuhpaw kha ka muih; atae alopaw kyate alia lang kyakhe maee te alokuhpaw, po voilu lan dalahdalah akpaw kha a um.Ref 1.27: Eze 8.2
28 Tuhte po voilu lan dalahdalah akpaw muinsan tuh khuaaraw ccyh lya maeking kya alangkuhpaw sawdoih te nynh aloku. E hynh Bawipaw phu-enaw te alokuhpaw muinsan nynh thua.
Tuh-e tuh he ka muih te, ka mae ka sahbung, te lukhakheit nynh bya a hopaw roi kha ka thae.