9
1 E uccaw balyn hynh akaw-aleih do mamiate ka tua zah miding hae te mihaw hae tuh mih cyisahnaw balyn ryte Pachia kuih kya nynh a um hae; sungsakunaw tou athua, huakunaw tou athua cipaw ny kho um khyh. Ka malang pawmou a um cipaw a nyh khopaw hum san um khyh.
2 Ccungccaw balyn kalan phe lokuhpaw uccaw kha yn thua, a dingpaw te a ding leipaw, a hoypaw te a hoy leipaw, a thyaapaw te a thyaa leipaw, silawnaw a raepaw te a rae leipaw tungvaw yn thuapaw uccaw tuh phe lokuh. Ccungccaw hoy hae paw tuh misei hae te lokuh hae zah, bya a kinkuh hae paw tuh bya a kinkuh lei hae paw te phe lokuh hae.
3 Khuanin kaw kya acyihkuhpaw balyn kyaze ahoy leipaw ccangkheit tuh: ccungccaw miakaw nynh uccaw ccangkheit kha ah tung kalang oh. Tuhpiaze, ccungccaw hae thinlung tuh hoyleinaw te phe abeih; mih hiin lungkhu balyn ngaeenaw tuh mih thinlung kya phang a um, tukoute michi hae kalan a cceih hae.
4 Thuasalama a hiin hae paw ryte a umkheihpaw miakaw tuh ngaehoinaw a hoi, pawccecize ahiinpaw ui tuh achihpaw chindeih laeze ahoyhua.
5 A hiin hae paw nynh tuh kae chih cih cipaw a nyku hae, thuasalama a chih hae paw nynh tuh pawpaw mah nyh vae khyh hae; mue lanpaw lasung mah hoi vae khyh hae zah, minmin kha ning athua vae hae.
6 Mih sungsakunaw, mih huakunaw te mih eiungkunaw hae tuh phe azo vae; khuanin kaw kya acyihkuhpaw balyn hynh papin sekuh bua vae lan khyh hae.
7 Cceih, na looh kha lungtuate ae lah, na misutui kha lungpawte neih; pawccecize Pachia nynh na cyipaw kha a naw phe ccaw vae.
8 Na boeining tuh rawpaping lan zungzae um sah; na lu kya thuhkupaw atui kha rousah nan.
9 Khuanin kaw kya Pachia nynh ae pyapaw, accakaepaw na hiinnaw ccyh balyn kha na sungsahpaw na zu ryte lungpawte mang oh, pawccecize tuh-e tuh khuanin kaw na hiin lungkhu na hanpaw thua zah, thawte rya na law mee nynh thua.
10 Na law lanpaw ryalaw miakaw kha na thawzung balyn te lawtua; pawccecize na cceih cihnaw Sheol kya tuh ryalaw, tuanaw, nynaw te hawnaw um vae khyh.
11 Khuanin kaw kya bua ka muihpaw tuh: ccuetaekunaw kya arang huapaw nynh tae zungzae khyh, rhawtukkunaw kya a thawsae huapaw nynh tae zungzae khyh, ahawpaw ccungccaw nynh looh hoi zungzae khyh, hawnaw a hoipaw nynh mihoipaw lang tang zungzae khyh, cyithyanaw a hoi huapaw nynh maehoynaw mue zungzae khyh; accyh te ccyhhoypaw tuh ccungccaw balyn hanlan a um cipaw ka muih.
12 Humhung nynh mah ro ccyh kha nyhty khyh. Mia kya a kaepaw ngasaw hawte thuasah, kaang a kaepaw pavaw hawte thuasah ccungccaw hae kha shethya nynh vaekheitmawte he a thuanua hae tuh, shethya kaang a kae hae.
Ngaeenaw laeze Hawnaw Ahanghua
13 Khuanin kaw kya hynh-e hawnaw kong tousenaw hynh mah ka muih, hynh-e hynh ka hanlan myarya abyapipaw nynh thua cite ka tua.
14 Khua khuakheit la um zah, tuin kya ccungccaw beihtaraw la um hae. Alesaepaw siapharan lu kheit nynh tuh-e khua tuh thiing lan la ccianua zah a la koihlu, thungkhawkunawpaw kha a la raenua.
15 Tuh-e khua kyatuin a ryachipaw mihawpaw lu kheit la um zah, tuh-e paw nynh a hawnaw liate khua kha a la khum. Tuhzemah tuh-e ryachipaw tuh lu kheit nynh sanmah nyh khyh hae.
16 Tukeiccuze, “Hawnaw hynh thawzung laeze ahoyhua; tuhzemah ryachipaw hawnaw kha theihrya hae zah, a bya kha pawlangria khyh hae,” cite ka ho.
17 Uktu nynh mingaee hae laku
thawte a siapaw laeze
a hawpaw nynh zyazyate
a hopaw bya ngae tuh ahoyhua.
18 Hawnaw tuh rhawtuknawpaw
zunghe laeze ahoyhua,
thuasalama misei lu kheit nynh
hoynaw patae kha a ro.