1 Khuanin kaw kya ka muihpaw hoyleinaw a um, tuh-e tuh ccungccaw tungvaw kya rikalae lan phang a um: 2 Ccungccaw nynh a rypaw balyn kha hobounaw a um khyh ccaw cite, Pachia nynh sisua, hoirumnaw te sawtuanaw kha a pya, tuhzemah khah-e uccaw hae kyakhe lungtuakhaekunaw kha Pachia nynh a pya khyh keiccuze mingccangpaw nynh a lungtuakhaekuh. Tuh-e tuh accakaepaw thua zah ngaethya lan umpaw hoyleinaw nynh thua. 3 Ccungccapaw nynh ccaaw za kheit saahkute kum patae a hiin kho; thuasalama hiin hoynaw kya lungtuakhaeku leite, shawku kya uukunaw a um khyh lanze, tuh-e paw laeze chite yn puipaw imua tuh ahoyhua. 4 Pawccecize tuh-e imua tuh accakaepaw lang yn pui zah mohnaw kalan a cceih, a min tuh mohnaw khate bong athua; 5 tuhpiaze tuh-e imua tuh khuanin kha muih boi khyh zah pawpaw mah nyh khyh. 6 Masaty e ccungccapaw tuh kum thong ning a la hiin zemah hoynaw kha a lungtuakhaekuh khyh, atyn-are hynh san kheit kalan khaw a ccia hae?

7 Ccungccaw nynh thawte rya a lawpaw balyn hynh khalang lungkhu lang bawku khylan a la thua zemah, ae rynaw thinlung tuh a hoi mamin. 8 A hawpaw tuh a ngaeepaw laeze pawmou a thanehua? A hiin hae paw malang khe pawtemou um lan cipaw a nykuh hae paw ryachi hae tuh pawmou a thane hae? 9 Mit te muihpaw thanenaw hynh rylenaw thinlung te vaevui laeze ahoyhua; e hynh zemah accakaepaw thua zah khisan nulang deekupaw nynh thua.

10 A la umty vae paw pawpaw zemah minphuty vae paw nynh thua, ccungccaw hynh pawmou athua cipaw ny athua, te ccungccaw tuh amaw laeze athung huapaw te rawseku kho thua khyh. 11 Bya patae ho ze accakaepaw houh alung, tuhte athua lanze ccungccaw hanlan pawmou athane? 12 Mynlyh hawte azothyapaw, accakaepaw ccungccaw hiinnaw syntaraw hanlan pawmou ahoy cipaw hummou a nyh? Amaw a chih koute khuanin kaw kya pawmou yn cyihkuh cih cipaw hum nynh mou a hopah kho?