DANIEL
Daniel
Daniel ccauh hynh zynleitu siapharan kuihkaw kya Judah hae nynh vawsawnaw te tuaasahnaw myarya a teing lya hae zeipaw ccauh nynh thua. Ccawzeitu nynh phungpaw hae te vizin hae kha mangte, e ahoy leipaw siapharan hae hynh Pachia nynh a vua cih hae zah Pachia minphuin hae tuh luenaw a muethui cih hae cite ngaehoinaw khate thawzung a pya hae.
E ccauh hynh phuin ning lang phia kho athua: (1) Daniel te a ruiban hae nynh see lang tang hae paw kong. E hae nynh Pachia a zynnaw hae te a doliakunaw hae liate mih rhaw hae kha a tae hae. E phungpaw hynh Babilon te Persia uknaw ccyh kya acyihkuhpaw nynh thua. (2) Daniel nynh vizin hae kha po kyngkuh lan muih zah, tuh-e hae tuh Babilon accozah kyate tho zah accozah patae tuh oun langkuh hae zah aro hae paw kong nynh thua; zynleitu siapharan nynh a shung lanpaw kong te Pachia ccungccaw hae nynh taenaw a mue lan hae paw kong kha a hodae.
1
Babilon kya Israel Ccangvae Lu Pali
1 Jehoiakim nynh Judah siapharan lang a tangnaw kumthumnaw kum khe Babilon siapharan Nebukhadnezzar nynh Jerusalem lang yn thua zah a koihlu.Ref 1.1: 2Si 24.1; 2Sh 36.5-7
2 Bawipaw nynh Nebukhadnezzar tuh Judah siapharan Jehoiakim kha kyngsah zah, Pachia inn kya-e uccaw abang kha a lawsah. Tuh-e uccaw hae tuh Shinar ram lang cciakhae zah, a pachia hae inn kya sisua nungnaw khaan kyakhe a nung.Ref 1.2-4: 2Si 20.17-18, 24.10-16; 2Sh 36.10; Isa 39.7-8
3 Te siapharan nynh a inn kya-e bawi Ashpenaz kha kawpya zah, kyng athua hae paw Israel hae kya-e siapharan phuin te sawtuanaw a ccoupaw phuin lungkhu e,
4 a pyn ccaenaw um leipaw te a puithyapaw, a hawpaw, nythyanaw te tuathyanaw a hoipaw, siapharan inn kya rya a lahthya cih paw ccangvae hae kha potua hae; minmin nynh Khaldi hae ccaw te bya kha ccangkuh hae sah.
5 Nin takyh a ae lan hae paw looh te a nia lan hae paw misutui tuh siapharan nynh a aepaw kya-e athua cih, cite siapharan nynh a ci. Kum thum lungkhu a ccangkuh cih hae zah, tuh-e ccyh athang te, siapharan inn kya rya a lah cih hae.
6 Tuh-e hae kyakhe Judah phin kya-e Daniel, Hananiah, Mishael te Azariah tuh a umbua hae.
7 Siapharan inn kya-e bawi nynh ccangpaw min kha phuthui hae zah: Daniel kha Belteshazzar, Hananiah kha Shadrak, Mishael kha Meshak, Azariah kha Abednego cite a phu hae.
8 Daniel nynh siapharan inn e looh te misutui khate amaw toulou kha thusaku lei lante a tuaku; tukeiccuze amaw toulou kha a thusaku khyh nawlan siapharan inn e bawi kha a ngiaku.
9 Pachia nynh siapharan inn e bawi kha Daniel tungvaw thawccinaw te ngaethyaumsahnaw a hoisah.
10 Siapharan inn e bawi nynh Daniel kha, “Ka bawipaw siapharan kha ka rih; aning nynh looh te misutui kha ae paccynpya oh. Nae kum alokuhpaw ccangvae hae laeze na ngethyapaw kha a muih zetuh, siapharan nynh ka lu yn zo vae cih,” a cipya.
11 Tetuh Daniel nynh amaw, Hananiah, Mishael te Azariah tungvaw do-oihtu lang cite siapharan inn e bawi nynh a khangpaw ccungccaw rintu kha ngia zah:
12 Nin haw lungkhu kaening hynh oun syntawtua oh. Ae lanpaw enaw-rohnaw te nia lanpaw tui kyalya kha beih oun pyatua oh.
13 Siapharan inn e tui te looh a ae hae paw ccangvae hae mae te kae mae hynh oun dokhia tua lah, nae muihnaw thyhte kae tungvaw oun cyitua, a cipya.
14 Tukeiccuze ccungccaw rintu nynh tuh-e bya tuh a nawccah zah, nin haw lungkhu a syntawtua hae.
15 Nin haw accing nin khe he a do hae tuh, siapharan inn e looh a ae hae paw ccangvae hae balyn laeze mih ngesaw hoyhua zah a thohua lante a lang hae.
16 Tukeiccuze ccungccaw rintu nynh siapharan inn e mih looh te a nia lan hae paw misutui kha ccaring lah zah, enaw-rohnaw kha a pya hae.
17 Pachia nynh khah-e lu pali hae kha nynaw, ccaw lante thyanaw te hawnaw kha a pya hae; Daniel mah vizin te maan balyn kha leihthyanaw akhupaw nynaw a hoi.
18 Siapharan inn lungkhu lang teekhae lan cite khyapaw accyh he accing te, siapharan inn e bawi Ashpenaz nynh minmin kha Nebukhadnezzar malang thuakhae hae zah,
19 siapharan nynh bya a hokhae hae. Mih balyn laku kyaze Daniel, Hananiah, Mishael, Azariah te khinkhia lanpaw lu kheit sanmah um khyh hae; tukeiccuze minmin tuh siapharan inn kya ryalahtu lang khang athua hae.
20 Siapharan nynh a khia hae paw hawnaw bya te nythyanaw bya miakaw kyakhe minmin tuh a ram pynpi kya umpaw mitleihthya hae paw te beidinhothya hae paw balyn laeze leit haw a thyahua hae paw kha a muih.
21 Te Sairas Siapharan nynh siapharan lang a tangnaw kum kheitnaw kyacia Daniel tuh tuin kya po a um.