4
1 Bawi hae, nae see hae kha dingnaw te hoyte ccuepe oh, pawccecize nanning mah vaawlang khua kya Bawi kae hoi cipaw na ny oh.Ref 4.1: Efe 6.9
Tuhlaepaw Ccangpyakunaw
2 Saw tyty sang oh, lungtuabya hote kyhrarih lante sawsang oh.
3 Khri kya-e byakhupaw kha kae ho kho nawlan, Pachia nynh a byaho khonaw thuakaw kha kaening oun hungpya nawlan saw oun la sangpah oh; tuh-e byakhupaw keiccuze kae tuh thong ka ccah,
4 tuh-e byakhupaw tuh ho lan ka ccan thyhte ccaerarih lan ka ho kho nawlan saw yn la sangpah oh.
5 Atolang e ccungccaw hae kya hawnaw te la um oh lah, accyh miakaw kha hoyte la mang oh.Ref 4.5: Efe 5.16
6 Ccungccaw miakaw kha pawtemou byakhung lan cipaw na nythya nawlan oh, nae byaho tuh loi te ekhaekuh sah lah, ngae ry um zungzae sah.
Nyathya Beihlangnaw
7 Taikhikas nynh ka konglang balyn kha ae la hopah cih oh; aning tuh Bawipaw kya a lungzipaw ryalahtu, rya kae lahkheihpaw te sungsahpaw ka neitaw nynh thua.Ref 4.7: Loc 20.4; 2 Tim 4.12Ref 4.7-8: Efe 6.21-22
8 Kae konglang na ny nawlan oh te aning nynh nae thinlung kha thawpya khylan amaw kha nae kalan kae saw.
9 Aning tuh Onesimas ryte oun cceih hae, Onesimas tuh nanning laku e lu kheit thua zah a lungzipaw te kae sungsahpaw kae neitaw nynh thua. Minmin nynh hein kya acyihkuhpaw balyn kha ae hopah cih oh.Ref 4.9: Phlm 10-12
10 Kae te thong kae ccahkheihpaw Aristarkhas te Barnabas a neitaw lanpaw Mark nynh nanning kha ae beihlang oh. Mark tuh nae kalan yn thua ze leh la khan oh cite amaw konglang kha bya kae tawsya vae oh.Ref 4.10: Loc 19.29, 27.2; Phlm 24; Loc 12.12, 25, 13.13, 15.37-39
11 Justas a ci hae paw Jesu nynh nanning kha ae beihlang oh. Vingdungawkuh hae paw kyaze minmin kyalya nynh Pachia peenaw hanlan rya kae lahkheihpaw te lungtangnaw yn pya hae paw athua hae.
12 Nanning lakuze lu kheit athuapaw, Khri seepaw Epafras nynh ae beihlang oh. Nanning nynh accingpaw lante na thadyn oh zah Pachia rynaw balyn kha phe ccing lan na zui nawlan oh aning nynh zungzae zuakute saw ae sangpah oh.Ref 4.12: Kol 1.7; Phlm 23
13 Nanning hanlan te Laodisia khua te Hierapolis khua kya um hae paw hanlan aning tuh thawte rya a lah cipaw kae nynh ccaekia ka khan.
14 Kae sungsahpaw sibawi Luka te Demas nynh ae beihlang oh.Ref 4.14: 2 Tim 4.10, 11; Phlm 24
15 Laodisia khua e uno hae te Nimfa te a inn kya umpaw khriccaawbuu kalan ka beihlangnaw hae kha yn la hopah oh.
16 E ccaky hynh naemaw kya he na ria kou oh te, Laodisia khriccaawbuu kya mah la riasah oh; tuhawte Laodisia kyate na mue oh paw ccaky kha mah la riabua oh.
17 Arkhippas kha, “Bawipaw kya na muepaw ryalaw kha na lyn nawlan pe la ki,” cite la hopah oh.Ref 4.17: Phlm 2
18 Kae, Paul nynh hynh-e beihlangnaw hynh kamaw kuih te nynh ka zei. Khiikunaw ka teingpaw hynh la liathui oh. Thawccinaw tuh nae kya la um sah. Amen.