KOLOSE HAE
KALAN PAUL CCAKY
Colossians
Paul nynh ahmepaw Khriccaaw phung te hynh-e ccangpyanaw hae tuh a rawsekuh hae cite a zei. A ccaw nynh abyapi lante a ho rypaw tuh: Jesu Khri tuh accingpaw khumnaw oun pyatu thua zah, ccangpaw zynnaw te cyisahnaw miakaw tuh Jesu kyate oun cciakhaeseitu hae nynh athua hae. Khri liate Pachia nynh laephi rae zah Khri liate amaw kalan khe bua oun kikhae cih. Khri te kyngkunaw kyalya te rou nynh laephi hynh khumnaw a ccou cih cite ngaehoinaw a um. Te Paul nynh hynh-e ccangpyanaw hynh zyntu hae hiinnaw pawcitemou asuilan a hoi cipaw kha a langsaku.
Paul nynh Filemon kalan ccaw a zeipyapaw Onesimas hynh see thua zah, Kolose khua kalan Tikhikas nynh ccaw a phu lyaze a zuipaw nynh thua.
1
Beihlangnaw
1 Pachia rynaw liate Khri Jesu locceihtu athuapaw kae, Paul te kae unopaw Timote nynh,
2 Kolosa khua um hae paw mithyaa hae te Khri kya a lungzipaw uno hae kalan ccaw kae ky oh. Ah Paaw Pachia kyate thawccinaw te daenaw tuh nae kya la um vae sah.
Lungtua Sawsangnaw
3 Nae hanlan saw kae sang vae ze, ah Bawipaw Jesu Khri a Paaw athuapaw Pachia kalan lungtuabya zungzae kae ho,
4 pawccecize Khri Jesu kha na zyn oh cipaw te mithyaa hae balyn kha na sungsah oh cipaw kha kae thae zah,
5 vaawlang khua kya nae hanlan nungpya athuapaw ngaehoinaw keiccu nynh thua. E ngaehoinaw kong hynh nae kalan yn thuapaw byaccing bya athuapaw thehoypaw kya langmawlya phe na thae vae oh.
6 Tuh-e thehoypaw tuh laephi pynpi kya athae thae zah alethung hawte, nanning nynh mah tuh-e tuh na thae nin oh kyate nae kya athae thae zah Pachia thawccinaw kha hmerarih lan na thaethya oh.
7 E kong hynh kae sungsahpaw te rya kae lahkheihpaw Epafras kyate phe na ccangku vae oh. Aning tuh nanning hanlan Khri kya-e a lungzipaw ryalahtu nynh thua.Ref 1.7: Kol 4.12; Phlm 23
8 Muisaw liate na sungsakunaw oh paw kong kha aning nynh kaening oun hopya.
9 Hynh-e keiccuze kaening mah tuh-e kae thae nin te nae hanlan saw palei kae sangpah oh, te muisaw lante hawnaw te thaethyanaw balyn kyakhe Pachia rynaw nynaw khate phe na bia nawlan oh kae ngiapya oh,
10 tuhteze nynh ahoypaw ryalaw miakaw kya athae na thae cih oh zah Pachia nynaw kya lethungte pawpaw balyn kya amaw lungrythua lante Bawipaw te angaekuhpaw hiinnaw te na hiin cih oh.
11 Pawpaw kya balyn lungtua biate lungsaete na ngaesang kho nawlan oh, Pachia phu-enaw huhan kyate yn thuapaw thawzung balyn khate nae thaw ae saesah oh sah.
12 Awnaw kya um hae paw mithyaa hae rho kha ae neesakuh bua oh paw Paaw kalan lungtuabya ho oh.
13 Aning nynh aening kha mohnaw huhan kyate oun luesah zah a sungsahpaw a Ccapaw kya-e peenaw lungkhu lang oun teesah.
14 Ccapaw liate seingaethyanaw athuapaw shawkhawnaw kha ah mue oh.Ref 1.14: Efe 1.7
Khri Hanghuaccenaw
15 Ccapaw tuh muih kho leipaw Pachia muinsan nynh thua, raepaw balyn kyaze ccatawccaw nynh thua.
16 Pawccecize vaaw te lae kya a umpaw, muih khopaw te muih kho leipaw, bawitungkhung hae, uknaw kaw hae, uktu hae, kawhoinaw hae, pawpaw balyn tuh Ccapaw liate rae athua—pawpaw balyn tuh amaw liate rae thua zah amaw hanlan nynh thua.
17 Ccapaw tuh pawpaw balyn a um mawze um zah pawpaw balyn tuh amaw kya kyngkute a um hae.
18 Khri tuh khriccaawbuu athuapaw pyn kya-e lu nynh thua; aning tuh pawpaw balyn kya ahang huaccepaw athua nawlan, athotakawnaw thua zah a chih hae paw kyaze ccatawccaw nynh thua.Ref 1.18: Efe 1.22-23
19 Pawccecize Pachia a ccingnaw balyn tuh Ccapaw kya a um,
20 a vaelantung kya-e a chiise liate rhaw kha daesah zah, laephi kya umpaw uccaw hae thuasah, vaawlang umpaw uccaw hae thuasah pawpaw balyn kha Ccapaw liate amaw te bua ccawkuthui lan Pachia nynh a ry.Ref 1.20: Efe 2.16
21 Nanning tuh langmawlya ahoy leipaw rya na law oh keiccuze Pachia te na sawkuh oh zah nae tuanaw kya rhaw hae nynh na la thua oh,
22 tuhzemah atu tuh nanning kha athyaapaw, ccaenaw um leipaw te seinaw hoi leipaw lante Pachia malang thuakhae khylan amaw a pyn kya chinaw liate phe ae ccawsakuthui vae oh.
23 Na thae oh paw thehoypaw kya-e ngaehoinaw kyate nueku leite, zynnaw kya tynkaring lan na bingkuh cih oh zah po na tyn cih oh, tuh-e thehoypaw tuh vaawlui zakaw umpaw raepaw miakaw kya phy thua zah, kae, Paul tuh tuh-e thehoypaw hanlan ryalahtu nynh ka thua.
Khri hanlan Paul Ryalawnaw
24 Nae hanlan vawsaw ka teingnaw kya atu ka lungtua, khriccaawbuu athuapaw amaw pyn hanlan Khri a teingnaw kya ahobou ungpaw kha ka pynsaw kya ka ccingsah.
25 Pachia bya kha phe ccing lan ho khylan nanning hanlan kamaw yn pyapaw Pachia kya-e synriatu thuanaw thyhte kae tuh khriccaawbuu kya ryalahtu lang ka tang.
26 Tuh-e byakhupaw tuh she hae kya te ciihan hae kya thuruh a la thua, thuasalama atu tuh a mithyaa hae kya langsahpya athua vae.
27 E byakhupaw a phu-enaw kya-e hoirumnaw tuh hohcihmou ale cipaw Zenta hae kha nysah khylan Pachia nynh tuh-e mithyaa hae tuh a po hae; tuh-e byakhupaw tuh phu-enaw kya-e ngaehoinaw athuapaw, nae kya a umpaw Khri kha nynh thua.
28 Kaening nynh ccungccaw miakaw kha Khri kya accingpaw lante kae thuakhae nawlan, ccungccaw miakaw kha raeringnaw pyate, hawnaw balyn khate ccangpyate Khri kong kha kae ho.
29 E ryalaw hanlan ka lungkhu kya myarya athawsae lante Khri nynh yn pyapaw thungnaw balyn khate zuakute rya ka lah.