9
Jerusalem e Khriccaaw hae elang Khoipyanaw
1 Mithyaa hae elang ryalawpyanaw te asekuh lante nae kalan ccaw zei lanpaw tuh ka hanlan ho khyh.
2 Pawccecize na bawm ry oh paw kha ka ny, tuh-e hanlan inkhawkum te Akhai ram um hae paw tuh paccynkute a um vae hae cite Mesidonia hae kya nanning kong ka pooku vae; te nae lungthonaw nynh ccungccaw patae kha myarya mih lungthosah bua hae.
3 Tuhzemah nanning kong kae pookupaw hynh alakaw lan a tang khyh nawlan, ka hopaw bya thyhte na paccynku ccaw oh cite uno hae kha nae kalan kae nynh kae saw hae.
4 Tukhyhze tuh, Mesidonia hae tuh kamaw ryte oun thuabua hae zah paccynku leite na um oh paw kha oun muih hae ze, nanning maethyanaw tuh la um hin sah, rawhoyte kae la pookupaw kha kae maethahsei cih.
5 Tukeiccuze bya phe na kinku vae oh paw, hysahte na pya oh paw lasung kha paccyn ty khylan uno hae kha nae kalan cciaty lan hyy aho cite ka tua. Tuhte tuh-e lasung tuh hysah leipaw uccaw hawte thua leite, hysahnaw te paccyn typaw athua nawlan nynh thua.
6 Ccacii pyhtari a tupaw nynh looh pyhtari nynh a rue cih, ccacii patae a tupaw nynh looh patae a rue cih cipaw hynh nyh oh.
7 Ccungccaw miakaw nynh a thinlung kya a khyaku thyhte pya sah, hysah leinaw te pya nan sah, pya khyh ze hoy khyh cipaw thinlung te pya nan sah, pawccecize lungtuate a pyatupaw kha Pachia nynh a sungsah.
8 Pachia nynh nanning kha myarya lungpaw hythuanaw aphuinphuin ae bawm kho oh, tuhte nanning tuh atyn-are phe zaw lan zungzae na hoi cih oh zah, ahoypaw ryalaw miakaw kya patae na bawm kho cih oh.
9 Ccathyaa kyaze,
“Aning nynh hysahte
ryachi hae kha a pya hae;
a dingnaw tuh zungzae atyn,”
cite azeiku hawte nynh thua.Ref 9.9: Sam 112.9
10 Ccacii a tupaw kha ccacii a pyatu te ae lanpaw sanlou a pyatu Pachia nynh nae ccacii kha ae pya cih oh zah ae pungsahpah cih oh; nae dingnaw athae kha ae lungsahpah cih oh.Ref 9.10: Isa 55.10
11 Hysahnaw te patae na pya nawlan oh nanning tuh pawpaw kya balyn hoirumsah na thua cih oh zah, kae kyate a mue hae paw nae lasung liate Pachia kha a thehoysah cih hae,
12 pawccecize hynh-e bawmpaw ryalaw nynh mithyaa hae hobounaw kyalya kha a bawm buapaw thua leite, Pachia kalan lungtuabya honaw patae kha mah a thuakhae.
13 E bawmnaw ryalaw langsakunaw liate, Khri thehoypaw na kyngku oh paw kawngaenaw liate thuasah, mithyaa hae te mingccang hae balyn kha hysahte na bawm oh paw liate thuasah ccungccaw patae nynh Pachia kha a phu-esah hae.
14 Pachia nynh ae pya oh paw a thawccinaw asung-epaw keiccuze minmin nynh nanning kha ae ngae oh zah nae hanlan saw ae sangpya oh.
15 Ho kho um leipaw a lasung hanlan Pachia kya thehoynaw um sah!