6
1 Kaening tuh Pachia ryte pynkheihlan ryalah hae paw kae thua keiccuze nanning nynh mah Pachia thawccinaw kha alakaw lan na ccou khyh nawlan oh kae ngia oh.
2 Pawccecize Pachia nynh hynhte a ho:
“Lehkhan lan accan ccyh kya
na bya kha kae thaepya vae,
khumnaw nin kya nang kha
kae bawm vae,” a ci.
Dotua, atu hynh lehkhan lan accan ccyh nynh thua; dotua, atu hynh khumnaw nin nynh thua!Ref 6.2: Isa 49.8
3 Kae ryalaw tuh ccae athua khyh nawlan, ming hae laanpi kya khuliakunawpaw kha kae nungkhaw khyh hae.
4 Pachia ryalahtu hae kae thuanawpaw kha pawpaw kya balyn langsaku khylan: riathaenaw, vawsawnaw, myarya ccihpaw vawsawnaw,
5 ziaku buakunaw, thongsawnaw, keisukeilae nungnaw, arupaw ryalawnaw, i leite umnaw te haedangte umnaw kha phang kae ngaesang;Ref 6.5: Loc 16.23
6 thinlung thyaanaw, nynaw, lungsaenaw, thawccithyanaw, muisaw kya-e thyaanaw, ahmepaw sungsakunaw,
7 byaccing honaw, Pachia thungnaw, voilang kuih te ranglang kuih kya kyngpaw dingnaw zunghe liate,
8 sawtuanaw te sawtua leinaw kha thuasah, thehoynaw te thethyanaw kha thuasah kaening nynh kae tung. Kaening kha hynbya ho hae paw hawte oun ccuepe hae zemah ahmepaw ccungccaw hae nynh kae thua;
9 a ny lei hae paw hawte kae thua zemah, hoyte a ny hae paw nynh kae thua; a chih hae paw hawte kae thua zemah, dotua oh, kaening tuh kae hiin; detahnaw a ing hae paw hawte kae thua zemah, chia tuh oun theih khyh hae;
10 ngaethah hae paw hawte kae thua zemah zungzae kae lungtua; ryachi hae hawte kae thua zemah ccungccaw patae kha kae hoirumsah hae; pawsang a hoi lei hae paw hawte kae thua zemah, pawpaw balyn marya kae hoi.
11 Pou Korin hae, ccaerarih lan kae hopya vae oh; kae thinlung kha kobalae lan kae hungpya oh.
12 Kaening nynh kae khawsung khyh oh, naemaw rynaw te nynh na khawsungku oh.
13 Nanning nynh zemah liaru nawlan nae thinlung kha kobalae lan hungbua oh, tuh-e tuh ccaaw hae hawte nynh kae hopya oh.
Ahiinpaw Pachia Beikinn
14 Zynleitu hae ryte anginkuh leipaw puihnawpaw ccong kha puihkheih nan oh. Pawccecize adingpaw te ading leipaw tuh pawtemou a mungkuh kho cih hae? Awnaw te mohnaw tuh pawtemou a vaeccawkuh kho cih hae?
15 Khri tuh Belial te paw nawccawnaw mou a hoi? Tuhkhyhze zyntu nynh zynleitu te paw neethungkunaw mou a hoi?
16 Pachia beikinn nynh zohtuh hae te paw nawccawnaw mou a hoi? Pawccecize Pachia nynh,
“Minmin kya ka um cih zah
minmin laku ka cceih cih,
kae tuh mih Pachia ka thua cih zah
minmin tuh ka ccungccaw hae
athua cih hae,” a ci hawte,
nanning tuh ahiinpaw
Pachia beikinn nynh na thua oh.Ref 6.16: Lev 26.12; Eze 37.27; 1Ko 3.16, 6.19
17 Tukeiccuze Bawipaw nynh,
“Minmin kyate pou oh lah
phiakuh oh;
athyaa leipaw kha hae nan oh;
tetuh nanning kha
kae ccou cih oh.Ref 6.17: Isa 52.11
18 Kae tuh nae Paaw
ka thua cih zah nanning tuh
ka ccapaw hae te
ka ccanung hae na thua cih oh,
cite Alesaepaw Bawipaw nynh
a ci,” cite a ho.Ref 6.18: 2 Sam 7.14; 1 Chr 17.13; Isa 43.6; Jer 31.9