3
Byakin Thaw kya-e Ryalahtu hae
1 Kaening tuh kaemaw te kaemaw tou bua kae thehoysakuh? Abang ccungccaw hae hawte, thehoysahnawpaw ccaw hae kha nae kalan thuasah, tuhkhyhze nanning kyate thuasah phuku lan kae peki tou?
2 Nanning tuh kae thinlung kya azeikuhpaw ccaw, ccungccaw balyn nynh ny lanpaw te ria lanpaw kae ccaw nynh na thua oh;
3 nanning tuh Khri kya-e ccaw, kaening nynh kae phupaw nynh na thua oh cipaw ccaerarih lan alang; tuh-e ccaw tuh ccatui te zeipaw thua leite, a hiinpaw Pachia Muisaw te zeipaw nynh thua, lungphe kya zeipaw thua leite, ccungccaw thinlung lungphe kya zeipaw nynh thua.Ref 3.3: Exo 24.12; Jer 31.33; Eze 11.19, 36.26
4 Kaening tuh Khri liate Pachia malang khe tuhcihawpaw zynkunaw kae hoi.
5 Ccangkhakheit tuh kaening kyate nynh yn thua cite ho lan ciate kaemaw nynh kae cyi khopaw um khyh, kaening cyi khonaw tuh Pachia kyate nynh yn thua,
6 byakin thaw kya-e ryalahtu hae lang tang khylan Pachia nynh kaening kha cyi khonaw oun pya vae; tuh-e byakin thaw tuh zeipaw kawbya kya-e thua leite, Muisaw kya-e nynh thua; pawccecize zeipaw kawbya nynh tuh hiinnaw kha a chia, thuasalama Muisaw nynh tuh hiinnaw kha a pya.Ref 3.6: Jer 31.31
7 Azopaw Moses mae kya-e phu-enaw keiccuze Israel ccungccaw hae nynh a mae kha riri a do kho lei lan hae ciate, lungphe vawlan khiate zeipaw, chinaw a thuakhaepaw ryalawnaw tuh tuhcite a phu-e lan thua ze,Ref 3.7: Exo 34.29
8 Muisaw ryalawnaw tuh phu-enaw te houh beih lan khyh tou?
9 Pawccecize seibenaw ryalawnaw kya phu-enaw a um lanze, dingnaw ryalawnaw tuh phu-enaw te houh abeih cih.
10 Tuh-e ale huapaw phu-enaw keiccuze langmaw lyaze phu-enaw a la hoi boi paw uccaw kha tuh a phu-enaw azo vae.
11 Pawccecize azopaw uccaw nynh a phu-e lanze, po atynpaw uccaw tuh houh a phu-e cih!
12 Tuhcihawpaw ngaehoinaw kae hoi keiccuze kaening tuh rawhoyte nynh kae ho.
13 Azo cciamangpaw phu-enaw athangnaw kha Israel hae nynh riri do nan hae sah cite a mae a bongkuhpaw Moses hawte kae thua khyh.Ref 3.13: Exo 34.33
14 Thuasalama mih lungkhung zah, atunin cia byakin rynpaw kha he a ria vae hae ze, tuh-e mae bongkupaw tuh lawpya leite phang a um ung; tuh-e mae bongkupaw tuh Khri kya rou nynh zosah athua.
15 Atunin cia Moses Kawbya kha he a ria vae hae ze, mih thinlung kha mae bongkupaw nynh phang a bong ung.
16 Tuhzemah ccungccaw lu kheit nynh Bawipaw kalan he a paleihku vae ze, mae bongkupaw kha lawpya athua vae.Ref 3.16: Exo 34.34
17 Bawipaw tuh Muisaw nynh thua; Bawipaw Muisaw a umnaw kya tuh luenaw a um.
18 Aening balyn tuh ah mae bongku leite muinsado kya lang hawte Bawipaw phu-enaw kha ah langsah oh, aening tuh phu-enaw ccangkheit kyate ccangkheit kalan lethungte amaw muinsan alo lante rulae ah thua oh; pawccecize tuh-e rulaenaw tuh Muisaw athuapaw Bawipaw kyate yn thuapaw nynh thua.