12
Paul A Vizin hae te Byaphy hae
1 Ka pooku aho ung; tuh-e pookunaw liate mue lanpaw pawsang a um khyh zemah, Bawipaw kya-e vizin te byaphy kong kha ka ho ung cih.
2 Anuhlang kum haw lae pali lyakhe Khri kya a tynpaw lu kheit tuh vaawlang khang thumnaw kalan lawthung athuapaw kha ka ny—pyn ryte tou, pyn umbia leite tou cipaw ka nyh khyh; Pachia nynh a nyh.
3-4 Tuh-e paw tuh paradis lungkhu lang lawthung thua zah ccungccaw nynh ho lan accan leipaw bya te ho kho leipaw bya kha aning nynh a thae. Tuhcihawpaw ccungccaw tuh ka ny—pyn ryte tou, pyn umbia leite tou cipaw ka nyh khyh; Pachia nynh a nyh.
5 Tuhcihawpaw ccungccaw ccelang ka pookuh cih, tuhzemah kamaw hanlan tuh ka thawzyanaw kong laelan ccangpaw kong ka pookuh lan khyh.
6 Pawccecize ka pooku ry zemah byaccing kha ka ho cih zah mingaeepaw ka thua lan khyh. Ccungccaw lu kheit nynh kamaw yn muihpaw laelan, kamaw kong a thaepaw laelan kae kha ahang lante yn tuasei khyh nawlan pooku leite ka sungku.
7 Ka muihpaw byaphy hae tuh myarya alung keiccuze ka lysaku sei khyh nawlan ka ngesaw kya hinpaw kha yn pya, tuh-e tuh ka lysaku sei khyh nawlan vawsaw yn pyapaw Satan a locceihtupaw nynh thua.
8 Hynh-e konglang te tuh-e uccaw nynh kae kha yn poutaw nawlan Bawipaw kalan vae thum ka ngiaku,
9 thuasalama Bawipaw nynh kae kha, “Ka thawccinaw tuh na hanlan azaw; pawccecize ka thungnaw tuh thawzyanaw kyakhe ccingsah athua,” yn cipya. Tukeiccuze Khri thungnaw tuh ka tungvaw atyn nawlan, ka thawzyanaw kyakhe lungtuate houh ka pookuh cih.
10 Tukeiccuze Khri hanlan thawzyanaw, saryanaw, vawsawnaw, tuaasahkunaw te vawsawrunaw hae kha ka lungrythuakhaekuh. Pawccecize ka thawzya vae ze, thawzung ka hoi.
Korin Khriccaawbuu elang Paul Thinphangnaw
11 Kae tuh ka ngaee vae; nanning nynh tuhte nae nangse oh. Thanccingte nanning nynh kae hynh thehoysah lan ka ccan, pawccecize kae tuh pawsang ka thua khyh zemah abyapi huapaw locceihtu hae laeze ka nyaahua khyh.
12 Locceihtu ccaccing ka thuanawpaw syntawnaw hae tuh, lungsaenaw balyn te nae kya ka langsakupaw syntawnaw hae, ngaeangnaw hae te athungpaw ryalaw hae kha nynh thua.
13 Ccangpaw khriccaawbuu hae laeze nanning tuh pawtemou na nyaahua oh? Kae tuh nae hanlan phupaw ripaw ka thua khyhpaw kyalya thua khyh tou? Hynh-e ka meseinaw hanlan yn ngaethya oh!
14 Atu nae kalan vae thumnaw ccia lan ka paccynkuh. Nae hanlan phupaw ripaw ka thua lan khyh; pawccecize ka rypaw tuh nae uccaw kha thua leite naemaw kha nynh thua; pawccecize ccaaw hae nynh nungpaaw hae hanlan uccaw ccakhungpya lan ccan khyh, nungpaaw hae nynh ccaaw hae hanlan ccakhungpya lan accan.
15 Kae tuh nanning hanlan ka hoipaw kha myarya lungtuate ka mang cih zah ka pyn hynh mah ka mang ung cih; kae nynh myarya mang kae sungsah oh pite kae hynh beihbeihte tou nae sungsah cih oh?
16 Tuhte athua ze la thua sah, nanning kha phupaw kae risah khyh oh. Tuhzemah kae tuh ka thyaruh keiccuze nanning kha hynbya te nynh oun kyng na ci oh.
17 Nae kalan kae saw hae paw lukhakheit liate nae kyate amia kha ka lawkuh tou?
18 Titu kha nae kalan ccia lan ka ngia zah uno lu kheit kha amaw kya kae sawbua. Titu nynh nae kya-e amia a lawkuh tou? Kaening tuh alokuhpaw tuanaw te rya kae lahkheih khyh tou? Alokuhpaw laanpi kha kae zuikheih khyh tou?
19 Kaening nynh kaemaw te kaemaw hynh nae malang kae daangsaku cite tou po nae tua oh? Pachia malang khe Khri min te nynh bya kae ho. Ka sungsah hae, kaening nynh kae cyipaw miakaw hynh nanning bawmnaw hanlan nynh thua.
20 He kae thua te, nanning kha ka ry hawte kae muih lan khyh oh paw te kae kha na ry oh hawte nae muih lan khyh oh paw kha ka thinphang; nae kya pekunaw, eiungkunaw, thinrianaw, karankunaw, thethya hokunaw, thanrynaw, tansakunaw, keisukeilae umnaw a umsei cih cipaw mah ka thinphang.
21 Bua kae thua te, ka Pachia nynh kae kha maethyate yn umsah cih cipaw ka thinphang; nungsikunaw, ohhuakunaw, ohhuaku rynaw khate sei hae zah a ngaesikuh lei hae paw patae hanlan ka raw lanpaw kha mah ka thinphang.