3
Korin Khriccaawbuu kya Phiakunaw
1 Uteno hae, nanning kha muisaw ccungccaw hae hawte kae hopah kho khyh oh, pynsaw ccungccaw hae hawte, Khri kya nosi hae hawte nynh kae hopya oh.
2 Nanning kha samatei te nynh kae kua oh, looh tangpaw kha kae dang khyh oh; pawccecize looh tangpaw kha na ae kho loh khyh oh. Atu cia na ae kho loh khyh oh.Ref 3.2: Heb 5.12-13
3 Pawccecize nanning tuh pynsaw ccungccaw hae nynh na thua ung oh. Pawccecize nanning laku eiungkunaw, pekunaw te phiakunaw phang a um lungkhu tuh pynsaw ccungccaw hae na thua khyh oh tou? Huatawpaw ccungccaw hae hawte na um khyh oh tou?
4 Pawccecize lu kheit nynh, “Kae tuh Paul zuitu nynh ka thua,” ci zah mingccangpaw nynh, “Kae tuh Apollos zuitu nynh ka thua,” a ci; tuhte na ci oh paw tuh pynsaw ccungccaw hae na thua khyh oh tou?Ref 3.4: 1Ko 1.12
5 Paul tuh hummou athua? Apollos tuh hummou athua? Bawipaw nynh ccungccaw miakaw kha a pya thyhte, kaening tuh zynnaw kalan ae thuakhae oh paw Pachia ryalahtu hae nynh kae thua.
6 Kae nynh ka lin, Apollos nynh tui bu, thuasalama a lesahthungtu tuh Pachia nynh thua.Ref 3.6: Loc 18.4-11, 24-28
7 Tukeiccuze a lintupaw hynh pawsang thua khyh, tuibupaw mah pawsang thua khyh, a lesahthungtupaw Pachia rou nynh abyapi athua.
8 Atu a lintupaw te tuibupaw tuh pynkheihpaw nynh thua, milu raveih nynh amaw a ryalawnaw thyhte a ryalaw mee kha a mue cih.
9 Pawccecize kaening tuh Pachia rya a lahkheihtu hae nynh kae thua, nanning tuh Pachia loo, Pachia inn nynh na thua oh.
10 Pachia nynh yn pyapaw a thawccinaw thyhte, inn myarya sakthyapaw hawte kae nynh aleihpaw kha ka bing zah mingccangpaw nynh tuh-e vawlan khe a sak. Inn saktupaw miakaw nynh tuh-e vawlan pawtemou sak lan cipaw kha raeringkuh sah.
11 Pawccecize Jesu Khri athuapaw phe bingkuh vae paw aleihpaw laelan ccangpaw aleihpaw kha hum nynh sanmah bing kho vae khyh.
12 Atu lukhakheit nynh tuh-e aleihpaw vawlan khe sui te, phua te, aphutepaw lung hae te, thing te, lonua ku te, ccatanphue te a sak lanze—
13 inn saktu milu raveih ryalaw tuh ccaerarih lan alangkuh cih; pawccecize Nin nynh tuh-e tuh pong a langsakuh cih. Pawccecize tuh-e tuh maee te langsaku athua cih, milu raveih ryalaw kha pawcihawpaw ryalaw nynh thua cipaw maee nynh a syntawtua cih.
14 Lukhakheit nynh tuh-e aleihpaw vawlan a sakpaw a ryalaw tuh atyn lanze, aning tuh ryalaw mee a mue cih.
15 Lukhakheit ryalaw kha maee nynh phe a u lanze, aning tuh a shung cih; thuasalama maee kyate lue hawte amaw tuh khum athua cih.
16 Nanning tuh Pachia beikinn na thua oh paw te Pachia Muisaw nae kya a umpaw kha na nyh khyh oh tou?Ref 3.16: 1Ko 6.19; 2Ko 6.16
17 Lukhakheit nynh Pachia beikinn kha a ro lanze, Pachia nynh amaw kha a roh cih. Pawccecize Pachia beikinn tuh athyaa; nanning tuh tuh-e beikinn nynh na thua oh.
18 Nanning nynh naemaw toulou kha lingkuh nan oh. Hynh-e she kya ka haw cite na tuaku oh ze, a hawpaw lang na tang nawlan oh, a ngaeepaw lang tangty oh.
19 Pawccecize hynh-e laephi hawnaw tuh Pachia malang ngaeenaw nynh thua. Pawccecize Ccathyaa kyaze,
“Pachia nynh mihaw hae kha
mimaw thyaruhnaw khate
a kyng hae,”
cite azeikuh.Ref 3.19: Job 5.13
20 Tukoute Ccathyaa kyaze,
“Mihaw hae tuanaw tuh
accakaepaw nynh thua cipaw
Bawipaw nynh a ny,”
cite bua azeikuh.Ref 3.20: Sam 94.11
21 Tukeiccuze hum nynh sanmah ccungccaw hae kong kya pookuh nan sah. Pawccecize pawpaw balyn tuh naemaw kya-e nynh thua.
22 Paul thuasah, Apollos thuasah, Sefas thuasah, laephi thuasah, hiinnaw thuasah, chinaw thuasah, atu she thuasah, malang she thuasah abalyn mawte naemaw kya-e nynh thua.
23 Nanning tuh Khri kya-e nynh na thua oh; Khri tuh Pachia kya-e nynh thua.