13
Sungsakunaw
1 Ccungccaw hae bya te vaaw hae bya kha ka hothya salamah sungsakunaw ka hoi khyh ze, kae tuh dawkhua tupaw roi te lanchi khuapaw roi hawte nynh ka thua.
2 Kae nynh profehbya ho khonaw thungnaw ka hoi zah byakhupaw balyn te nynaw balyn kha ka thaethya zemah thuasah, mua hae nuesaku khonaw zynnaw balyn ka hoi zemah thuasah, sungsakunaw ka hoi khyh ze, kae tuh accakaepaw nynh ka thua.Ref 13.2: Mat 17.20, 21.21; Mar 11.23
3 Ka hoipaw balyn kha ming hae ka pya hae zemah thuasah, ka pyn hynh maee te uku lan ciate ka pyaku zemah thuasah sungsakunaw ka hoi khyh ze, tuh-e nynh ka hanlan pawsang thane khyh.
4 Sungsakunaw tuh a lungsae zah thawccinaw a hoi; sungsakunaw tuh eiungnaw hoi khyh; sungsakunaw tuh pookuh khyh, lysakuh khyh,
5 a othah khyh. Amaw thanenaw hanlan ccungkuh khyh, a thinriathya khyh, cyiseinaw kha phang ccyke khyh;
6 hoyleinaw kya a lungtua khyh, thuasalama byaccing kya a lungtua;
7 sungsakunaw tuh pawpaw balyn kha a ngaesang kho, pawpaw balyn kha a zyn, pawpaw balyn kha a ngaehoi, pawpaw balyn kha phang a ngaesang.
8 Sungsakunaw tuh thang boi khyh. Thuasalama profehbya ho khonaw a um zemah a zo cih; bya aphuinphuin hothyanaw a um zemah adae cih; nynaw a um zemah a zo cih.
9 Pawccecize aening tuh abang-asung nynh ah ny oh, abang-asung nynh profehbya ah ho oh.
10 Thuasalama accingpaw he yn thua vae tetuh, abang-asungpaw kha tuh a zo cih hae.
11 Ka imua lya tuh imua hawte nynh bya ka ho, imua hawte ka nyh zah imua hawte nynh ka tua; thuasalama piccan ka thua tetuh imua uccaw hae kha pong ka vua vae.
12 Pawccecize atu aening tuh muinsado kya valyvaly te nynh ah muih oh; thuasalama tuin ccyh vae tuh mitmae hawiliakute muih lan vae. Atu kae tuh abang-asung nynh ka ny, thuasalama tuin ccyh vae tuh Pachia nynh kae hynh phe ccing lan yn ny hawte kae mah phe ccing lan ka nyh vae cih.
13 Atu tuh zynnaw, ngaehoinaw te sungsakunaw, hynh-e hae ccangthum hynh atyn; hynh-e hae kyaze abyapi huaccepaw tuh sungsakunaw nynh thua.