9
Israel Ronaw
1 Silawhang pe a thadynpaw Bawipaw kha ka muih, te aning nynh a hopaw tuh:
Thuakawtung hae tuh ahy mawlaezung hae thuakawtung adung hae kha buatua;
ccungccaw hae lu vawlan a ccawphu nawlan hae, thuakawtung hae kha khyatua hae;
a laehy hae paw kha thaloi te
ka theih cih hae;
lu kheit sanmah ccue lan khyh hae,
lu kheit sanmah lue lan khyh hae.
2 Sheol lang cia laephi a thaeku hae zemah,
tuin kyate poh ka thuaa cih hae;
vaawlang cia a kaethung hae zemah,
tuin kyate ka sahbung cih hae.
3 Karmel mua dung kya a reku hae zemah,
ka ccung cih hae zah,
tuin kyate ka kyng cih hae;
rili kaw khe ka muihnaw kyate
a reku hae zemah, rili kya-e
hupi kha kaw ka pya cih zah,
a khyh cih hae.
4 Mih rhaw hae nynh kyng hae zah
a cciakhae hae zemah, tuin kyakhe
thaloi kha kaw ka pya cih zah,
minmin kha a theih cih hae.
hoynaw hanlan thua leite,
vawsawnaw hanlan
minmin kha riri ka do cih hae.
5 Bawipaw, vaaw PACHIA nynh
laephi kha ty zah laephi tuh phe atui,
laephi kya um hae paw balyn tuh
a rah a khui hae,
Nal vawpi hawte thokuh hae zah,
Izip ram e Nal vawpi hawte,
bua a ccahbung hae;
6 Bawipaw nynh vaawlang khe
avawlan khaan kha raekuh zah,
laephi luki khe adawkuhpaw
vaawlui kha a rae;
rili tui kha ko zah,
laephi vawlan khe a bu—
a min tuh Bawipaw a cikuh.
7 Pou Israel hae, nanning tuh
ka hanlan Ethiopia hae te
na lokuh khyh oh tou? cite
Bawipaw nynh a ci.
Israel kha Izip ram kyate,
Filistin hae kha Kaftor ram kyate,
Aramean hae kha Kir ram kyate
ka cciakhae khyh hae tou?
8 Bawipaw PACHIA mit nynh
aseipaw peenaw kha riri do zah,
laephi vawlan kyate ka roh cih,
thuasalama Jakob ciihan hae kha
mih cii phe mih lan
ka roh lan khyh hae, cite
9 Kaw ka tho cih zah, looh kha
pasaryh te ryh hawte,
minphuin hae balyn laku kya
Israel hae kha ka ryh cih hae,
ccathae pynkheit sanmah
laekhu lang ccah lan khyh.
10 “Hoyleinaw nynh kaening kha
oun phah lan khyh, tung mah
kae tung lan khyh,” cite a ho hae paw,
ka ccungccaw misei hae balyn tuh
thaloi te a chih cih hae.
David Peenaw Muethuinaw
11 Tuin nin vae tuh a pu vae paw David bu kha
ka thadynsah thui cih,
pang a uanaw kha ka pingthui cih zah,
a ronaw kha ka cyihthui cih,
bu kha langmawlya hawte ka sakthui cih.Ref 9.11-12: Loc 15.16-18
12 Tuhteze nynh Edom ram kya
a laehy hae paw te
ka min te ko athua hae paw
minphuin hae balyn kha minmin nynh
a ccou cih hae, cite
e rya a lahtupaw Bawipaw nynh a ci.
13 Bawipaw nynh a hopaw tuh,
lei a thuepaw nynh looh a ruetupaw kha
a phya ccyh te misutui a sutupaw nynh
acii a lintupaw kha
a phya ccyh tuh yn thua ccaccing cih;
mua hae kyate misutui abya ccyh te
sangpyng hae balyn kyate
misutui alua ccyh tuh yn thua ccaccing cih.
14 Ka ccungccaw Israel hae kha
ka kikhae cih hae,
aroh vae paw khuapi hae kha
a raethui cih hae zah a umnah cih hae;
misu khokhu kha a raekuh cih hae zah,
mih misutui kha a neih cih hae,
khokhu kha a raekuh cih hae zah,
mih thingthae kha a ae cih hae.
15 Minmin kha mih laephi vawlan khe
ka lin cih hae zah,
ka pya vae hae paw laephi kyate
minmin kha poh khaeethui
papin thua vae lan khyh hae, cite